ରୂପସା,୮।୬(ଡି.ଏନ.ଏ.) – ଉଭୟ କେନ୍ଦ୍ର ଓ ରାଜ୍ୟ ସରକାର ବିଭିନ୍ନ ଚାଷ ପାଇଁ ଚାଷୀଙ୍କୁ ପ୍ରୋତ୍ସାହନ ଯୋଗାଇଛନ୍ତି। ଚାଷୀଙ୍କ ଆର୍ଥତ୍କ ମାନଦଣ୍ଡ ବୃଦ୍ଧି ପାଇଁ ପର୍ଯ୍ୟାପ୍ତ ସବ୍ସିଡ଼ି ବ୍ୟବସ୍ଥା ଥିବାରୁ ଚାଷ କାର୍ଯ୍ୟରେ ଉତ୍ସାହ ଭରିରହିଛି। ହେଲେ ବିଭାଗୀୟ ଅଧିକାରୀଙ୍କ ବେପରୁଆ ଓ ଖାମଖିଆଲି ମନୋଭାବ ଯୋଗୁ ସରକାରଙ୍କ ଯୋଜନାର ସଫଳ ରୂପାୟନ ହେଉ ନ ଥିବା ଅଭିଯୋଗ ହୋଇଛି। ଏଭଳି ଘଟଣା ଦେଖିବାକୁ ମିଳିଛି ବାଲେଶ୍ୱର ଜିଲା ବସ୍ତା ବ୍ଲକ ଉଦ୍ୟାନକୃଷି ବିଭାଗ କାର୍ଯ୍ୟାଳୟରେ ।
୨୦୨୧ରେ ବ୍ଲକର ବିଭିନ୍ନ ପଞ୍ଚାୟତର ୭୭ହେକ୍ଟର ଜମିରେ ୨୪୫ଜଣ ହିତାଧିକାରୀ ଆଳୁ ଚାଷ କରିଥିଲେ। ଏଥିପାଇଁ ବିଭାଗଠାରୁ ଚାଷୀମାନେ ସରକାରୀ ଦରରେ କୁଇଣ୍ଟାଲ ପ୍ରତି ୧ହଜାର ଟଙ୍କାରେ ୧୧୫୦ କୁଇଣ୍ଟାଲ ଆଳୁ ବିହନ କ୍ରୟ କରି ଚାଷ କରିଥିଲେ। ଯୋଜନା ଅନୁଯାୟୀ ଏକ କୁଇଣ୍ଟାଲ ବିହନ ପ୍ରତି ୮ଶହ ଟଙ୍କା ସବସିଡ଼ି ଅର୍ଥ ସରକାର ହିତାଧିକାରୀଙ୍କ ଜମାଖାତାକୁ ପଠାଇବା କଥା। ୭ ମାସ ବିତିଯାଇଥିଲେ ହେଁ ୧୧୫୦ କୁଇଣ୍ଟାଲ ବିହନରେ ୨୪୫ ହିତାଧିକାରୀଙ୍କୁ ୯ଲକ୍ଷ ୨୦ହଜାର ଟଙ୍କା ସବ୍ସିଡ଼ି ଏଯାବତ୍ ମିଳୁ ନ ଥିବାରୁ ଅସନ୍ତୋଷ ଦେଖାଦେଇଛି। ବ୍ଲକ ସହକାରୀ ଉଦ୍ୟାନ କୃଷି ଅଧିକାରୀ ନିରଞ୍ଜନ ବେହେରା ଚାଷୀଙ୍କ ଫାଇଲରେ ଦସ୍ତଖତ କରୁ ନ ଥିବା ଚାଷୀ ଚୈତନ୍ୟ ଗିରି, ଦେବେନ୍ଦ୍ର ସେଠୀ, ସଞ୍ଜୟ ରଣା, ଛଚିନ୍ଦ୍ର ନାଥ ସେଠୀ, ବରେନ୍ଦ୍ର ଦଳେଇ, ବସନ୍ତ ସେଠୀ, ଦୁର୍ଗା ପ୍ରସାଦ ଦଳେଇ, ପରମାନନ୍ଦ ଦଳେଇ ପ୍ରମୁଖ ଜିଲାପାଳ ଓ ବିଭାଗୀୟ ଡେପୁଟି ଡାଇରେକ୍ଟରଙ୍କୁ ଭେଟି ଲିଖିତ ଅଭିଯୋଗ କରିଛନ୍ତି। ହେଲେ ଏଯାବତ୍ ଚାଷୀ ସେମାନଙ୍କ ହକ୍ରୁ ବଞ୍ଚତ୍ତ ଥିବାରୁ ଆନ୍ଦୋଳନାତ୍ମକ ପନ୍ଥା ଗ୍ରହଣ କରାଯିବ ବୋଲି ଚେତାବନୀ ଦିଆଯାଇଛି। ସେହିପରି ବ୍ଲକ ଅନ୍ତର୍ଗତ ୮ଜଣ ନଡ଼ିଆ ଚାଷୀ ଓ ୨୭ଜଣ ପରିବା ଚାଷୀଙ୍କ ଫାଇଲ୍କୁ ଅଧିକାରୀ ବେହେରା ସୁପାରିଶ କରୁ ନ ଥିବାରୁ ସେମାନେ ମଧ୍ୟ ଲକ୍ଷାଧିକ ଟଙ୍କା ସବ୍ସିଡ଼ି ପାଇ ପାରୁନାହାନ୍ତି। ଆଳୁ ଲଗାଇବାର ୪୫ ଦିନ ମଧ୍ୟରେ ସବ୍ସିଡ଼ି ଅର୍ଥ ବ୍ୟାଙ୍କ ଖାତାକୁ ଯିବା କଥା। କିନ୍ତୁ ଅମଳର ଦୀର୍ଘଦିନ ବିତିଯାଇଥିଲେ ମଧ୍ୟ ସବ୍ସିଡ଼ି ଅର୍ଥ ପାଇବାରୁ ଚାଷୀ ବଞ୍ଚତ୍ତ ହୋଇଛନ୍ତି। ଚାଷୀମାନଙ୍କୁ ପ୍ରୋତ୍ସାହନ ରାଶି ମିଳୁ ନ ଥିବାରୁ ସରକାରଙ୍କ ଘୋଷଣା ପାଣିର ଗାର ପାଲଟିଛି।
ଏ ସମ୍ପର୍କରେ ବସ୍ତା ବ୍ଲକ ସହକାରୀ ଉଦ୍ୟାନକୃଷି ଅଧିକାରୀ ନିରଞ୍ଜନ ବେହେରା କହିଛନ୍ତି, ଅଭିଯୋଗ ସମ୍ପୂର୍ଣ ମିଥ୍ୟା। କାଗଜପତ୍ରରେ ତ୍ରୁଟି ଥିବାରୁ ଠିକ୍ ଭାବେ ଯାଞ୍ଚ କରିବ ପରେ ତୁରନ୍ତ ସବ୍ସିଡ଼ି ରାଶି ପ୍ରଦାନ କରାଯିବାର ବ୍ୟବସ୍ଥା କରାଯିବ।
