ଢେଙ୍କାନାଳ ଅଫିସ୍, ୨୫।୯: ‘ବାପ ଥିଲା ପୁଅ ସଭାରେ ହାରେନା’। ଓଡ଼ିଆ ଘରେ ପ୍ରଚଳିତ ଏହି ଆପ୍ତବାକ୍ୟ ହିଁ ଜନ୍ମଦାତାଙ୍କ ଗୁରୁତ୍ୱ ବଖାଣିବାକୁ ଯଥେଷ୍ଟ। ହେଲେ ପକ୍ଷାଘାତରେ ପୀଡ଼ିତ ବାପାଙ୍କ ପାଇଁ ଜଣେ ପୁଅ ନିଜ ସ୍ବପ୍ନକୁ ଜଳାଞ୍ଜଳି ଦେଇଦେବା ଭଳି ଘଟଣା ଏବର ସମାଜରେ ବିରଳ। ଢେଙ୍କାନାଳ ସହରରୁ ଆସିଛି ଏଭଳି ଏକ ଦୃଶ୍ୟ, ଯେଉଁଠି ରୋଗଣା ବାପା ନବଘନ ଧୁଡୁକାଙ୍କ ପାଇଁ ପୁଅ ଭୋଜରାଜ ସାଜିଛନ୍ତି ପୋଷ୍ଟମ୍ୟାନ୍। ପୂର୍ବାହ୍ନ ୮ଟାରୁ ୫ଟା ଯାଏ ସରକାରୀ ଚାକିରି କରିଥିବା ବାପାଙ୍କୁ ସ୍କୁଟିରେ ବସାଇ ଘର ଘର ବୁଲି ସେ ବାଣ୍ଟୁଛନ୍ତି ଚିଠି। ଏଥିପାଇଁ ଏହି ମେଧାବୀ ଯୁବକଙ୍କୁ ପାଠପଢ଼ାରେ ବାନ୍ଧିବାକୁ ପଡ଼ିଛି ଡୋରି। ତଥାପି ସମୟ ଓ ପରିସ୍ଥିତିକୁ ସମ୍ମାନ ଜଣାଇ ସେ ଆଗେଇ ଚାଲିଛନ୍ତି କର୍ତ୍ତବ୍ୟ ପଥରେ।
ଢେଙ୍କାନାଳ ଜିଲା ମୁଖ୍ୟ ଡାକଘରେ ଡାକବାଲା (ପୋଷ୍ଟମ୍ୟାନ୍) ଭାବେ ୨୦୧୭ରୁ କାମ କରୁଛନ୍ତି ନବଘନ। ବରଗଡ଼ ଜିଲା ଗାଇସିଲଟ ଥାନା ଗୌରାଙ୍ଗମୁଣ୍ଡା ଗ୍ରାମରେ ତାଙ୍କ ପୈତୃକ ଘର ହୋଇଥିବାବେଳେ ସପରିବାର ଢେଙ୍କାନାଳ ଭାଗୀରଥି ବିହାରରେ ଏକ ଭଡ଼ାଘରେ ରହୁଛନ୍ତି। କରୋନାର ଭୟାବହତା ମଧ୍ୟରେ ମଧ୍ୟ କର୍ମରୁ ମୁହଁ ଫେରାଇ ନ ଥିଲେ ନବଘନ। ତେବେ ୨୦୨୦ ଅକ୍ଟୋବରରେ ତାଙ୍କ ଉପରେ ଛିଣ୍ଡିପଡ଼ିଲା ଦୁଃଖର ପାହାଡ଼। ଟାଣଖରାରେ ଚିଠି ବାଣ୍ଟୁଥିବାବେଳେ ଉଚ୍ଚ ରକ୍ତଚାପ ପାଇଁ ପକ୍ଷାଘାତର ଶିକାର ହେଲେ ସେ। ତାଙ୍କର ଡାହାଣ ପାର୍ଶ୍ୱ ଅଙ୍ଗପ୍ରତ୍ୟଙ୍ଗ ଅଚଳ ହୋଇଗଲା। ଦୀର୍ଘଦିନ ଧରି ଛୁଟିରେ ରହିଲେ। ଇତିମଧ୍ୟରେ ପରିବାରର ଆର୍ଥିକ ସ୍ଥିତି ଶୋଚନୀୟ ହୋଇପଡ଼ିଲା। ତେଣୁ ଯନ୍ତ୍ରଣାକୁ ପଛରେ ପକାଇ ସେ କାମରେ ଯୋଗଦେଲେ। ତେବେ ପୂର୍ବ ଭଳି କାମ କରିବା ତାଙ୍କ ପକ୍ଷେ ଆଉ ସମ୍ଭବ ହେଲାନାହିଁ। ଏହାକୁ ନେଇ ଚିନ୍ତାରେ ପଡ଼ିଯାଇଥିଲେ ନବଘନ। ଏଭଳି କଠୋର ସମୟରେ ଆଶ୍ୱାସନା ଦେଲେ ଭୋଜରାଜ ଏବଂ ସାଜିଲେ ବାପାଙ୍କ ଆଶାବାଡ଼ି। ରାତି ପାହିଲେ ନିତ୍ୟକର୍ମ ସାରି ସକାଳ ୮ଟା ବେଳକୁ ଭୋଜରାଜ ସ୍କୁଟିରେ ବାପାଙ୍କୁ ବସାଇ ବାହାରିଯାଆନ୍ତି ଡାକଘରକୁ। ନବଘନଙ୍କ ପରାମର୍ଶକ୍ରମେ ଚିଠି, ପାର୍ସଲଗୁଡ଼ିକୁ କ୍ରମାନ୍ବୟରେ ସଜାଇ ରଖନ୍ତି। ପୂର୍ବାହ୍ନ ୧୦ଟାରୁ ଅପରାହ୍ନ ୫ଟା ଯାଏ ଉଭୟେ ସହର, ସହର ଉପକଣ୍ଠ ଗଁାରେ ଗଳିକନ୍ଦି ବୁଲି ସେଗୁଡ଼ିକୁ ବାଣ୍ଟନ୍ତି। ରୋଗଗ୍ରସ୍ତ ବାପାଙ୍କ ପରାମର୍ଶରେ ଡାକ ବାଣ୍ଟିବା ଭଳି ଗୁରୁତ୍ୱପୂର୍ଣ୍ଣ କାର୍ଯ୍ୟକୁ ନିଷ୍ଠାର ସହ ତୁଲାଇ ଆସିଛନ୍ତି ଭୋଜରାଜ। ଯୁକ୍ତ ୩ ବିଜ୍ଞାନ ପାସ କରିବା ପରେ ପିଜି ପାଇଁ ପ୍ରସ୍ତୁତି କରୁଥିବାବେଳେ ଏଭଳି କଷ୍ଟକର ସମୟର ସମ୍ମୁଖୀନ ହୋଇଥିଲେ ସେ। ଏଥିପାଇଁ ତାଙ୍କ ଉଚ୍ଚଶିକ୍ଷା ଅଧୁରା ରହିଯାଇଛି। ତଥାପି ସମୟର ଆହ୍ବାନକୁ ସ୍ବୀକାର କରି ସେ ନିଭାଇ ଚାଲିଛନ୍ତି ଦାୟିତ୍ୱ। ଏବେକାର ସମୟରେ ସାମାନ୍ୟ ସମ୍ପତ୍ତି ପାଇଁ ସମ୍ପର୍କ ମଳିନ ପଡୁଥିବାବେଳେ ବାପ-ପୁଅଙ୍କ ଏଭଳି ସମ୍ପର୍କକୁ ପ୍ରଶଂସା କରିଛନ୍ତି ସହରବାସୀ, ଡାକଘର କର୍ମଚାରୀ ଏବଂ ବୁଦ୍ଧିଜୀବୀ।
ଏ ସଂକ୍ରାନ୍ତରେ ନବଘନ କୁହନ୍ତି, ୨୦୨୦ରେ ସାଇକେଲରେ ଚିଠି ବାଣ୍ଟିବା ବେଳେ ପକ୍ଷାଘାତର ଶିକାର ହେଲି। ମୁହଁ ବଙ୍କା ହୋଇଗଲା। ଜଣେ ମହିଳା ଏବଂ ତାଙ୍କ ସ୍ବାମୀ ଡାକ କର୍ମଚାରୀଙ୍କୁ ସୂଚନା ଦେବା ପରେ ସେମାନେ ଜିଲା ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ। ସେଠାରୁ କଟକ ସ୍ଥାନାନ୍ତର କରାଗଲା। ଏବେ ସ୍ବାସ୍ଥ୍ୟାବସ୍ଥା ସାମାନ୍ୟ ଭଲ ଅଛି। ପୁଅ ସହାୟତାରେ ଡାକଘର କାମ କରିବା ସହ ଚିଠି ବାଣ୍ଟୁଛି। ଭୋଜରାଜ କୁହନ୍ତି, ବାପା ସବୁବେଳେ ପାଠ ପଢ଼ିବା ପାଇଁ ପ୍ରୋତ୍ସାହିତ କରୁଥିଲେ। କିନ୍ତୁ ତାଙ୍କ ଅବସ୍ଥା ଦେଖିବା ପରେ ଚାକିରିଟା ନିହାତି ଜରୁରୀ ବୋଲି ଅନୁଭବ ହେଲା। ତାଙ୍କୁ ସହାୟତା କରି ଖୁସି ଲାଗୁଛି। ଡେପୁଟି ପୋଷ୍ଟମାଷ୍ଟର ଅଶୋକ କୁମାର ନନ୍ଦ କୁହନ୍ତି, ନବଘନଙ୍କ ବାମପାର୍ଶ୍ୱ ଅଙ୍ଗ କାମ କରୁ ନ ଥିବା ସତ୍ତ୍ୱେ ସେ ଦାୟିତ୍ୱରେ ଖିଲାପ କରିନାହାନ୍ତି। କାର୍ଯ୍ୟରେ ତାଙ୍କ ମେଧାବୀ ପୁଅ ସହଯୋଗ କରୁଛନ୍ତି। ଦୁହେଁ ନିଷ୍ଠାପର ଭାବେ ଦାୟିତ୍ୱ ତୁଲାଉଛନ୍ତି।
