ମୁମ୍ବାଇ,୧୭।୮: ମହାରାଷ୍ଟ୍ରର ବିଡରେ ଜାତୀୟତାବାଦୀ କଂଗ୍ରେସ ପାର୍ଟି (ଏନସିପି) ମୁଖ୍ୟ ଶରଦ ପାୱାର(ଦାଦା)ଙ୍କ ରାଲି ପୂର୍ବରୁ ଦଳର ବିଦ୍ରୋହୀ ଅଜିତ ପାୱାର(ପୁତୁରା)ଙ୍କ ଗୋଷ୍ଠୀ ତାଙ୍କୁ ସ୍ବାଗତ କରିବା ପାଇଁ ପୋଷ୍ଟର ଲଗାଇଛନ୍ତି।
ପାର୍ଲିରେ ଶରଦ ପାୱାରଙ୍କ ସମାବେଶର କିଛି ଘଣ୍ଟା ପୂର୍ବରୁ ଉଭୟ ପାୱାରଙ୍କ ଫଟୋ ଥିବା ଏନସିପି ପୋଷ୍ଟର ସବୁ ବିଡରେ ଲଗାଯାଇଛି। ଏଥିରେ ଶରଦଙ୍କଠାରୁ ରାଜନୈତିକ ଭାବେ ଅଲଗା ହୋଇଥିବା ଅଜିତଙ୍କୁ ‘ଆଶୀର୍ବାଦ’ ଦେବାକୁ ମଧ୍ୟ ଅନୁରୋଧ କରାଯାଇଛି।
ମହାରାଷ୍ଟ୍ରର ବିରୋଧୀ ଦଳ ମହାବିକାଶ ଅଗାଡି (ଏମ୍ଭିଏ) – କଂଗ୍ରେସ, ଶିବସେନା (ଉଦ୍ଧବ ଠାକରେ ଦଳ) ଏବଂ ଏନସିପି (ଶରଦ ପାୱାର ଦଳ) ମଧ୍ୟରେ ଚାଲିଥିବା ବାକ୍ଯୁଦ୍ଧ ମଧ୍ୟରେ ଏହି ପୋଷ୍ଟରଗୁଡିକ ଜାରି କରାଯାଇଛି।
ପୁଣେରେ ଶରଦ ପାୱାର ଏବଂ ଏନସିପିର ବିଦ୍ରୋହୀ ଦଳର ନେତା ଅଜିତ ପାୱାରଙ୍କ ମଧ୍ୟରେ ହୋଇଥିବା ସାକ୍ଷାତ ମହାରାଷ୍ଟ୍ରରେ ରାଜନୀତି ସରଗରମ ହୋଇଥିଲା। ଏମ୍ଭିଏର ଅଂଶବିଶେଷ ଥିବା କଂଗ୍ରେସ ଏବଂ ଶିବସେନା-ଉଦ୍ଧବ ବାଲାସାହେବ ଠାକରେ (ଶିବସେନା-ୟୁବିଟି) ଦାଦା ଏବଂ ପୁତୁରାଙ୍କ ମଧ୍ୟରେ ହୋଇଥିବା ଏହି ବୈଠକକୁ ନେଇ ଦ୍ୱନ୍ଦ୍ୱ ଦୂର କରିବାକୁ ଏନସିପି ମୁଖ୍ୟଙ୍କୁ କହିଥିଲେ।
ସୂଚନାନୁସାରେ, ଶନିବାର ପୁଣେରେ ଜଣେ ବ୍ୟବସାୟୀଙ୍କ ବାସଭବନରେ ଶରଦ ପାୱାର ଏବଂ ଅଜିତ ପାୱାରଙ୍କୁ ଭେଟିଥିଲେ। ଏହାପୂର୍ବରୁ ଗତ ମାସରେ ମହାରାଷ୍ଟ୍ରରେ ଅଜିତ ପାୱାର ଶରଦ ପାୱାରଙ୍କ ବିରୋଧରେ ବିଦ୍ରୋହ କରିଥିଲେ। ସେ ଶିବସେନା-ଭାଜପା ସରକାରରେ ଯୋଗଦେବାକୁ ନିଷ୍ପତ୍ତି ନେଇଥିଲେ ଏବଂ ଉପମୁଖ୍ୟମନ୍ତ୍ରୀ ଭାବରେ ଶପଥ ଗ୍ରହଣ କରିଥିଲେ। ଅଜିତ ପାୱାରଙ୍କ ସହ ତାଙ୍କୁ ସମର୍ଥନ କରୁଥିବା ଆଠ ଜଣ ଏନସିପି ବିଧାୟକ ମଧ୍ୟ ମନ୍ତ୍ରୀ ଭାବରେ ଶପଥ ଗ୍ରହଣ କରିଥିଲେ।
