ଚଣ୍ଡିଗଡ: ନିର୍ବାଚନ ସମୟରେ ପ୍ରାର୍ଥୀମାନେ ଭୋଟ ହାତେଇବା ପାଇଁ ଲୋକଙ୍କୁ ନାନା ପ୍ରକାର ସୁବିଧା ସୁଯୋଗ ଯୋଗାଇ ଦେବା ଲାଗି ପ୍ରତିଶ୍ରୁତି ଦେଇଥାନ୍ତି। ସେହିପରି ହରିୟାଣାର ସିରସାଢ଼ ଗ୍ରାମରେ ହେବାକୁ ଥିବା ସରପଞ୍ଚ ନିର୍ବାଚନ ପାଇଁ ପ୍ରତିଦ୍ୱନ୍ଦ୍ୱିତା କରୁଥିବା ଜୟକରଣ ଲାଥଓ୍ବାଲ ଭୋଟରମାନଙ୍କୁ ପ୍ରତିଶ୍ରୁତି ଦେଇ ଏବେ ଚର୍ଚ୍ଚାରେ। ତାଙ୍କ ପୋଷ୍ଟରରେ ସେ ଏହାକୁ ବର୍ଣ୍ଣନା କରିଥିବା ଦେଖିବାକୁ ମିଳିଛି। ଯଦି ଜୟକରଣ ସରପଞ୍ଚ ହୁଅନ୍ତି ତେବେ ଗ୍ରାମର ସମସ୍ତ ମହିଳାଙ୍କୁ ମାଗଣା ବ୍ୟୁଟି କିଟ୍ସ୍ ଦେବେ। ଏଥିସହ ଯେଉଁବ୍ୟକ୍ତିମାନେ ନିୟମିତ ମଦ୍ୟପାନ କରନ୍ତି, ସେମାନଙ୍କୁ ପ୍ରତିଦିନ ଗୋଟିଏ ଲେଖା ମଦ ବୋତଲ ଯୋଗାଯିବ। ଜୟକରଣଙ୍କ ପ୍ରତିଶ୍ରୁତି ସୂଚୀ ଏତିକିରେ ସରୁ ନାହିଁ। ଇନ୍ଧନ ଦର ବୃଦ୍ଧି ନେଇ ଲୋକେ ନାନା ଅସୁବିଧାରେ ସମ୍ମୁଖିନ ହେଉଛନ୍ତି। ା ସୌଭାଗ୍ୟବଶତଃ ସେ ଯଦି ସରପଞ୍ଚ ହୁଅନ୍ତି ତେବେ ଇନ୍ଧନ ଲିଟର ପିଛା ୨୦ ଟଙ୍କା କରିବା ସହ ଗ୍ୟାସ୍ ସିଲିଣ୍ଡର ଦର ୧୦୦ ଟଙ୍କା କରିଦେବେ। ଏଥିସହ ସେବା ଓ ଜିନିଷରେ ଲାଗୁ ଟାକ୍ସ ସେ ହଟାଇ ଦେବେ। ପ୍ରତ୍ୟେକ ପରିବାରକୁ ମାଗଣା ବାଇକ୍ ଓ ଗାଁରେ ମାଗଣା ଓ୍ବାଇଫାଇ ସୁବିଧା ଯୋଗାଇ ଦେବା କଥା ଜୟକରଣ କହିଛନ୍ତି।
ଗ୍ରାମ ସିରସାଢ଼ରୁ ଦିଲ୍ଲୀ ପର୍ଯ୍ୟନ୍ତ ମେଟ୍ରୋ ଟ୍ରେନ୍ର ବ୍ୟବସ୍ଥା କରିବା ସହ ପ୍ରତି ୫ ମିନିଟରେ ହାମଲେଟରୁ ଗୋହାନା ହେଲିକପ୍ଟର ଉଡ଼ିବ। ଜୟକରଣଙ୍କ ପ୍ରତିଶ୍ରୁତିର କେତେଅଂଶ ସତ ହେବ ତାହା ଅଜଣା। କିନ୍ତୁ ଏହା ଭୋଟରମାନଙ୍କୁ କେତେ ମାତ୍ରାରେ ଆକୃଷ୍ଟ କରିବ ତାହା ଭୋଟିଂରୁ ହିଁ ଜଣାପଡ଼ିବ। ଜୟକରଣଙ୍କ ପୋଷ୍ଟର ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଆଇପିଏସ୍ ଅରୁଣ ବୋଥ୍ରା ଏହାର ଫଟୋ ଟୁଇଟରରେ ଶେୟାର କରିଥିବା ଦେଖିବାକୁ ମିଳିଛି।
