ମୁମ୍ବାଇ: ଚଳିତ ଆର୍ଥତ୍କ ବର୍ଷ ତୃତୀୟ ତ୍ରୈମାସରେ ଦେଶର ଜିଡିପି ଅଭିବୃଦ୍ଧି ସକାରାତ୍ମକ ରହିବ। କୋଭିଡ୍-୧୯ ଯୋଗୁ ଅର୍ଥ ବ୍ୟବସ୍ଥାକୁ ଶକ୍ତ ଧକ୍କା ଲାଗିଥିଲା। ହେଲେ ସୁଧାର ପ୍ରକ୍ରିୟା ଆଶାଠାରୁ ଅଧିକ ରହିଥିବା ଆର୍ବିଆଇ ଷ୍ଟେଟ୍ ଅଫ୍ ଇକୋନୋମି ବୁଲେଟିନ ନାମକ ଏକ ରିପୋର୍ଟରେ ପ୍ରକାଶ କରିଛି। ଚଳିତ ଆର୍ଥତ୍କ ବର୍ଷ ପ୍ରଥମ ତ୍ରୈମାସରେ ଜିଡିପି ୨୩.୯% ହ୍ରାସ ହୋଇଥିଲା। ସେହିଭଳି ଦ୍ୱିତୀୟ ତ୍ରୈମାସରେ ଜିଡିପି ୭.୫% ଖସିଛି। ସେପ୍ଟେମ୍ବର ମଧ୍ୟଭାଗରେ କୋଭିଡ୍ ମହାମାରୀ ସଂକ୍ରମଣର ଚେନ୍କୁ ଭାଙ୍ଗିବା ଲାଗି ପ୍ରୟାସ ଜୋର୍ଦାର ରହିଥିଲା। ପ୍ରଧାନମନ୍ତ୍ରୀ ଗରିବ କଲ୍ୟାଣ ପ୍ୟାକେଜ ହେଉ କିମ୍ବା ଆତ୍ମନିର୍ଭର ଭାରତ ୨.୦ ଏବଂ ୩.୦ ଭଳି ପଦକ୍ଷେପ ସରକାର ହାତକୁ ନେଇଛନ୍ତି। ଏହା ବଜାର ଉପରେ ଭଲ ପ୍ରଭାବ ପକାଇଛି।
୨୦୨୦-୨୧ର ଦ୍ୱିତୀୟ ଭାଗରେ ଅର୍ଥନୈତିକ କାର୍ଯ୍ୟକଳାପ ପୁଣି ଥରେ ବ୍ୟବସ୍ଥିତ ହେଉଥିବା ନଜରକୁ ଆସୁଛି ବୋଲି ଆର୍ବିଆଇ ରିପୋର୍ଟରେ ପ୍ରକାଶ ପାଇଛି। ଭାରତ ଉପରେ କରୋନା ଦ୍ୱିତୀୟ ଲହର ପ୍ରଭାବ ଏଯାଏ ଦେଖାଯାଇନାହିଁ। ଏଭଳି ସ୍ଥିତିରେ ବିଭିନ୍ନ ସରକାରୀ ନୀତି ଏବଂ ଅନ୍ଲକ ପ୍ରକ୍ରିୟା ଅର୍ଥ ବ୍ୟବସ୍ଥାର ଉନ୍ନତୀକରଣ ଦିଗରେ ଯୋଗଦାନ ରଖିଛି। ଦରଦାମ ଏବେ ଉଚ୍ଚରେ ରହିଥିବା ବେଳେ ଏହା ଯେଭଳି ଅଭିବୃଦ୍ଧି ବେଶି କ୍ଷତିଗ୍ରସ୍ତ ନ କରେ ତାକୁ ଧ୍ୟାନରେ ରଖିବାକୁ ମଧ୍ୟ ରିପୋର୍ଟରେ ଉଲ୍ଲେଖ କରାଯାଇଛି।
ସୂଚନାଯୋଗ୍ୟ, ଦ୍ରୁତ ଅଭିବୃଦ୍ଧିଶୀଳ ଅର୍ଥ ବ୍ୟବସ୍ଥା ମଧ୍ୟରେ ଭାରତ ସବୁଠାରୁ ବେଶି କ୍ଷତିଗ୍ରସ୍ତ ହୋଇଛି। ଲକ୍ଡାଉନରେ ସାରା ଦେଶରେ ଆର୍ଥତ୍କ କାର୍ଯ୍ୟକଳାପକୁ ଶକ୍ତ ଧକ୍କା ଲାଗିଛି। ଫଳରେ ଜିଡିପିରେ ବୃହତ୍ ପରିମାଣର ହ୍ରାସ ଦେଖିବାକୁ ମିଳିଛି। ମାତ୍ର ଲକ୍ଡାଉନ ପରେ ଏହି ଧାରାରେ ଏବେ ପରିବର୍ତ୍ତନ ଦେଖାଯାଇଛି। ଆର୍ଥତ୍କ କାର୍ଯ୍ୟକଳାପ ଟ୍ରାକ୍କୁ ଫେରୁଥିବା ବିଶ୍ୱସ୍ତରୀୟ ଏଜେନ୍ସିଗୁଡିକ ଆକଳନ କଲେଣି। ଏଜେନ୍ସି ଭାରତର ଜିଡିପି ଆକଳନକୁ ପରିବର୍ତ୍ତନ କରୁଥିବା ଦେଖାଯାଇଛି।
