କଟକ ଅଫିସ,୨।୮: ଅନ୍ଲାଇନ୍ କ୍ଲାସ୍ ଚାଲିଥିଲା। ପଞ୍ଚମ ଶ୍ରେଣୀର ଛାତ୍ରୀଛାତ୍ର ଅନ୍ଲାଇନ୍ରେ ପାଠ ପଢୁଥିଲେ। ହଠାତ୍ ମୋବାଇଲ ସ୍କ୍ରିନରେ ଅଶ୍ଳୀଳ ଫଟୋ ଦେଖାଯିବା ପରେ ଶିକ୍ଷୟିତ୍ରୀ, ଶିକ୍ଷକ, ଛାତ୍ରୀଛାତ୍ର ସମସ୍ତେ ଅସହଜ ହୋଇଗଲେ। କଟକର ଏକ ଶହେବର୍ଷ ପୁରୁଣା ବିଦ୍ୟାଳୟ ପକ୍ଷରୁ ଅନ୍ଲାଇନ୍ ପାଠପଢ଼ା ବେଳେ ଏଭଳି ଅଭାବନୀୟ ପରିସ୍ଥିତି ସୃଷ୍ଟି ହୋଇଛି। ବିଦ୍ୟାଳୟର ପ୍ରଧାନଶିକ୍ଷକ ହିଁ ଏପରି କରିଥିବା ଅଭିଭାବକମାନେ ଅଭିଯୋଗ କରିଛନ୍ତି। ଜିଲାପାଳଙ୍କୁ ମଧ୍ୟ ଏନେଇ ଦାବିପତ୍ର ଦିଆଯିବା ସହ ଅଶ୍ଳୀଳ ଫଟୋ ପକାଇଥିବା ଶିକ୍ଷକଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି ହୋଇଛି। ଦରଘାବଜାର ଥାନାରେ ମଧ୍ୟ ଏନେଇ ଏତଲା ଦିଆଯାଇଛି। ଗତ ୩୦ ତାରିଖରେ ଏଭଳି ଘଟିଥିବା ଅଭିଯୋଗକାରୀ ଅରୁଣ ସେଠୀ ନିଜ ଅଭିଯୋଗରେ ଦର୍ଶାଇଛନ୍ତି। ସମ୍ପୃକ୍ତ ପ୍ରଧାନଶିକ୍ଷକ କହିଛନ୍ତି ଯେ ତାଙ୍କ ଅଜାଣତରେ ଏଭଳି ଘଟିଛି। ପରିବାରର ଛୋଟ ପିଲା ତାଙ୍କ ମୋବାଇଲ ବ୍ୟବହାର କରୁଥିବା ସମୟରେ ଏହା ଭୁଲ୍ବଶତଃ ପୋଷ୍ଟ ହୋଇଛି। ସହଯୋଗୀ ଶିକ୍ଷକଙ୍କଠାରୁ ଏହା ଜାଣିବା ପରେ ସେ ପୋଷ୍ଟଟିକୁ ଡିଲିଟ୍ କରି ଦେଇଥିବା କହିଛନ୍ତି। ଅନ୍ୟପକ୍ଷରେ ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ସମୀର ଦାସ ଜିଲାପାଳଙ୍କ ଜରିଆରେ ଘଟଣାର ତଦନ୍ତ ପାଇଁ ଜିଲା ଶିକ୍ଷା ଅଧିକାରୀ ନିରଞ୍ଜନ ବେହେରାଙ୍କୁ କହିବା ସହ ସୋମବାର ସୁଦ୍ଧା ରିପୋର୍ଟ ଦେବାକୁ ନିର୍ଦ୍ଦେଶ ଦେଇଛନ୍ତି। ରିପୋର୍ଟ ଆସିବା ପରେ ସମ୍ପୃକ୍ତ ପ୍ରଧାନଶିକ୍ଷକଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ମନ୍ତ୍ରୀ ଦାସ କହିଛନ୍ତି।
