ବାଲିମେଳା,୧୧ା୮(ଶିବଦତ୍ତ ସାହୁ): ମାଲକାନଗିରି ଜିଲା ବାଲିମେଳାରେ ଥିବା ଓଏଚ୍ପିସି ସରକାରୀ କ୍ୱାର୍ଟର୍ସ ଜଳବିଦ୍ୟୁତ୍ କେନ୍ଦ୍ରରେ କାର୍ଯ୍ୟରତ କର୍ମଚାରୀଙ୍କ ନିମନ୍ତେ ଯୋଗାଇ ଦିଆଯାଉଛି। ଏହି କ୍ୱାର୍ଟର୍ସ ପରିସର ବିପର୍ଯ୍ୟସ୍ତ ପରିମଳ ବ୍ୟବସ୍ଥା ଅଞ୍ଚଳବାସୀଙ୍କ ପାଇଁ ଚିନ୍ତାର କାରଣ ହୋଇଛି।
ଡ୍ରେନ୍ଗୁଡିକରେ ଅଳିଆ ଆବର୍ଜନା ଭର୍ତ୍ତିହୋଇ ରହିଥିବା ବେଳେ ଅଞ୍ଚଳରେ ଲଗାଣ ବର୍ଷା କାରି ରହିଥିବାରୁ ମଶା ବଂଶ ବୃଦ୍ଧି ରୋଗର କାରଣ ହେଉଛି। ଏ ନେଇ ଅଞ୍ଚଳବାସୀ ଅଭିଯୋଗ କରିଛନ୍ତି। କଲୋନିରେ ଥିବା ଡ୍ରେନ୍ଗୁଡିକ ମଧ୍ୟରୁ କେତେକ ଭାଙ୍ଗିରୁଜିଗଲାଣି। ଫଳରେ ସାମାନ୍ୟ ବର୍ଷା ହେଲେ ନର୍ଦ୍ଦମାଜଳ ନିଷ୍କାସନ ହୋଇ ନ ପାରି ଏଣେ ତେଣେ ବୋହିଯାଉଥିବା ଲୋକେ ଅଭିଯୋଗ କରିଛନ୍ତି। କ୍ୱାର୍ଟର୍ସଗୁଡିକ ପଛପଟେ ଜଙ୍ଗଲ ହୋଇଛି। ପରିମଳ ବ୍ୟବସ୍ଥା ସୁଧାରିବା ପାଇଁ ବିଭାଗ ପକ୍ଷରୁ ଲକ୍ଷାଧିକ ଟଙ୍କା ଖର୍ଚ୍ଚ କରାଯାଉଛି। କିନ୍ତୁ ଦୀର୍ଘଦିନ ଧରି ନିୟମିତ ସଫା କରାଯାଉ ନ ଥିବାରୁ ସେଗୁଡିକ ଅବର୍ଜନାରେ ଭର୍ତ୍ତି ହୋଇ କଲୋନି ରାସ୍ତା ପାର୍ଶ୍ୱରେ ପଡି ଦୁର୍ଗନ୍ଧ ହେଉଛି। ଏଥିରୁ ଅଞ୍ଚଳରେ ସଂକ୍ରମଣ ରୋଗ ବ୍ୟାପିବା ଆଶଙ୍କା କରିଛନ୍ତି। ମଝିରେ ମଝିରେ ଜଣେ ଠିକାଦାର ଜଣକ ନାମକୁମାତ୍ର କେତେଜଣ ଶ୍ରମିକଙ୍କୁ ଆଣି ଉକ୍ତ ଡ୍ରେନ୍ରୁ ମାଟି ଓ ଆବର୍ଜନା ବାହାରକରି ନାଳ ପାର୍ଶ୍ୱରେ ଗଦାକରି ଛାଡି ଚାଲି ଯାଉଛନ୍ତି। ତା’ ପରଠାରୁ ସେଠାରୁ ଆଦୌ ଅଳିଆ ଆବର୍ଜନା କଢ଼ାଯାଉନାହିଁ କିମ୍ବା ସେ ଅଞ୍ଚଳରେ ଠିକାଦାରଙ୍କ ଆଉ ଦେଖା ମିଳୁନାହିଁ ବୋଲି ଲୋକେ ଅଭିଯୋଗ କରିଛନ୍ତି। ବିଭାଗୀୟ କର୍ତ୍ତୃପକ୍ଷଙ୍କ ଦାୟିତ୍ୱହୀନତା ଯୋଗୁ ପରିମଳ ବ୍ୟବସ୍ଥା ଠିକାଦାରଙ୍କ ଦ୍ୱାରା ଏପରି କରାଯାଉଥିବା ଅଞ୍ଚଳବାସୀ ଅଭିଯୋଗ କରିଛନ୍ତି।
ଫଳରେ ମଶା ବଂଶ ବୃଦ୍ଧିରେ ସହରବାସୀ ଅଣନିଃଶ୍ୱାସୀ ହୋଇ ପଡ଼ିଲେଣି। କେତେକ କଲୋନି ମୁଖ୍ୟ ରାସ୍ତା ପାର୍ଶ୍ୱରେ କୁଢ଼କୁଢ଼ ଅଳିଆ ଆବର୍ଜନା ଜମା ହୋଇ ରହିଥିବା ଦେଖିବାକୁ ମିଳିଛି। ଅନ୍ୟ ପକ୍ଷରେ କେତେକ ସ୍ଥାନରେ କ୍ୱାର୍ଟର୍ସକୁ ସଂଯୋଗ ହୋଇଥିବା ପାଇଖାନା ଟାଙ୍କି ଫାଟି ଯାଇଛି । ଫଳରେ ଟାଙ୍କିର ମଇଳା ପାଖରେ ଥିବା ଡ୍ରେନ୍ ଓ ଆଖ ପାଖ ଅଞ୍ଚଳରେ ଖେଳେଇ ହୋଇ ରହିବାରୁ ଅଞ୍ଚଳବାସୀ ବହୁ ଅସୁବିଧାର ସମ୍ମୁଖୀନ ହେଉଛନ୍ତି ।
ଏ ସମ୍ପର୍କରେ ବାଲିମେଳା ଓଏଚ୍ପିସି କଲୋନି ପରିଚାଳନା ଦାୟିତ୍ୱରେ ଥିବା କନିଷ୍ଠ ଯନ୍ତ୍ରୀ ରଞ୍ଜିତ ଦାସଙ୍କୁ ପଚାରିବାରୁ ଠିକାଦାରଙ୍କ ଦ୍ୱାରା କ୍ୱାର୍ଟର୍ସ ପଛପଟ ଅଞ୍ଚଳଗୁଡିକର ଡ୍ରେନ୍ ସଫା କରାଯାଇଛି। ଯଦି ସେଠାରୁ ଅଳିଆ ଆବର୍ଜନା କାଢି ନାହାନ୍ତି, ତେବେ ସେଗୁଡିକୁ ଶୀଘ୍ର କଢ଼ାଯିବ ବୋଲି କହିଛନ୍ତି। ଏ ସମ୍ପର୍କରେ ଓଏଚ୍ପିସିର କଲୋନି ଦାୟିତ୍ୱରେ ଥିବା ବିଭାଗୀୟ ଅଧିକାରୀ ଭିକରୀ ଚରଣ ମଲ୍ଲିକଙ୍କୁ ପଚାରିବାରୁ ଠିକା ସଂସ୍ଥାଦ୍ୱାରା ସଫେଇ କାର୍ଯ୍ୟ ଜାରି ରହିଛି। ଲୋକଙ୍କର କୌଣସି ସମସ୍ୟା ଯେପରି ନ ହୁଏ ସେଥିପ୍ରତି ଧ୍ୟାନ ଦେଇ ନିୟମିତ ଠିକ ଭାବେ କାର୍ଯ୍ୟ କରିବାକୁ ଠିକାଦାରଙ୍କୁ ତାଗିଦ କରାଯାଇଛି। ତଥାପି ଅଞ୍ଚଳ ପରିଦର୍ଶନ କରିବା ପରେ ତୁରନ୍ତ ପଦକ୍ଷେପ ଗ୍ରହଣ କରାଯିବ ବୋଲି ଅଧିକାରୀ ମଲ୍ଲିକ କହିଛନ୍ତି ।