ନୂଆପଡ଼ା ଅଫିସ,୧୫।୪: ଆଦିବାସୀ ଅଧ୍ୟୁଷିତ ନୂଆପଡା ଜିଲାରେ ଲଘୁବନଜାତ ଦ୍ରବ୍ୟର ସର୍ବନିମ୍ନ ମୂଲ୍ୟ ନିର୍ଦ୍ଧାରଣ କରାଯାଉ ନ ଥିବାରୁ ଚାଷୀ ଅଭାବୀ ବିକ୍ରିର ଶିକାର ହେବାକୁ ପଡ଼ୁଛି। ଦଲାଲମାନେ ମହୁଲଫୁଲ କ୍ରୟ କରି ବଦଳରେ ପାତଳଘଣ୍ଟା ଓ ଆଳୁ ପ୍ରଦାନ କରୁଛନ୍ତି। ବର୍ତ୍ତମାନ ବଜାରରେ ମହୁଲ ଦର ୨୦ ଟଙ୍କା ଥିବାବେଳେ ପାତଳଘଣ୍ଟା (ଟମୋଟ) ୧୦ ଓ ଆଳୁ ୧୫ ଟଙ୍କା ରହିଛି। ମରୁଡି ପ୍ରପିଡିତ ତଥା ଆଦିବାସୀ ଅଧ୍ୟୁଷିତ ଜିଲାରେ ଅଧିକ ଲୋକ ଜଙ୍ଗଲଜାତ ଦ୍ରବ୍ୟ ଉପରେ ନିର୍ଭର କରିଥାନ୍ତି। ରାଜ୍ୟ ସରକାରଙ୍କ ପକ୍ଷରୁ ୨୦୦୦ ମାର୍ଚ୍ଚରେ ଲଘୁବନଜାତ ଦ୍ରବ୍ୟର ସଂଗ୍ରହ ଦାୟିତ୍ୱ ଗ୍ରାମପଞ୍ଚାୟତ ହାତରେ ନ୍ୟସ୍ତ କରାଯାଇଥିଲା। ହେଲେ ସରକାରଙ୍କ ଏହି ଦାୟିତ୍ୱ ଉପରେ ଗ୍ରାମପଞ୍ଚାୟତ ଗୁରୁତ୍ୱ ଦେଉ ନ ଥିବାରୁ ଏହାର ସଂଗ୍ରହ ଏକ ପ୍ରହସନରେ ପରିଣତ ହୋଇଛି। କେବଳ ସେତିକି ନୁହେଁ ବନଜାତ ଦ୍ରବ୍ୟର ନିର୍ଦ୍ଧାରିତ ମୂଲ୍ୟ ପଞ୍ଚାୟତ କାର୍ଯ୍ୟାଳୟ କାନ୍ଥରେ ଲେଖାଯିବା ପାଇଁ ନିୟମ ଥିବାବେଳେ ତାହା ପାଳନ କରାଯାଉ ନାହିଁ। ଫଳରେ ବାହାର ଅଞ୍ଚଳର ଦଲାଲ ଶ୍ରେଣୀର ଲୋକେ ଗ୍ରାମାଞ୍ଚଳରେ ଆଡ୍ଡା ଜମାଇ ଆଦିବାସୀଙ୍କୁ ଶୋଷଣ କରିବାରେ ଲାଗିଛନ୍ତି। ବନଜାତ ଦ୍ରବ୍ୟ ସଂଗ୍ରହ ପାଇଁ ଗ୍ରାମପଞ୍ଚାୟତ ଧାରା ୧୯୯୬ ଅନୁସାରେ ସରକାରୀ କର୍ପୋରେସନ କିମ୍ବା ବ୍ୟବସାୟୀମାନେ ଅଗ୍ରୀମ ୧୦୦ ଟଙ୍କା ଦେଇ ନାମ ପଞ୍ଜୀକରଣ କରିବା କଥ, ମାତ୍ର ତାହା କରାଯାଉ ନାହିଁ। ଫଳରେ ଛତିଶଗଡର ଅଣପଞ୍ଜୀକୃତ ଦଲାଲମାନେ ସରଳ ଆଦିବାସୀଙ୍କୁ ଶୋଷଣ କରୁଛନ୍ତି। ବର୍ତ୍ତମାନ ବଜାରରେ ମହୁଲଫୁଲ କେଜି ପ୍ରତି ୨୦ ରହିଛି। ମାତ୍ର ବେପାରୀ କେଜିଏ ମହୁଲଫୁଲ ନେଇ ବଦଳରେ ବ୍ୟକ୍ତିଙ୍କୁ ପାତଳଘଣ୍ଟା ଦେଉଛନ୍ତି। ବଜାରରେ ବର୍ତ୍ତମାନ ପାତଳଘଣ୍ଟା ମୂଲ୍ୟ ୧୦ ଟଙ୍କା ରହିଛି। ବଜାର ଠିକ ଦର ସମ୍ପର୍କରେ ଲୋକମାନେ ଅବଗତ ନ ଥିବାରୁ ତାଙ୍କୁ ଶୋଷଣ କରାଯାଉଛି। ସେହିପରି ତେନ୍ତୁଳି, ଅଁଳା, ବାହାଡା, ହରିଡା, ଲାଖ, ମହୁ, ଝୁଣା, ଲସା ଇତ୍ୟାଦିର କୌଣସି ନିର୍ଦ୍ଧିଷ୍ଟ ଦର ନାହିଁ। ସରକାରଙ୍କ ପକ୍ଷରୁ କୌଣସି ନିର୍ଦ୍ଧିଷ୍ଟ ଦର କରାଯାଇ ନ ଥିବାରୁ ଶାଗମାଛ ମୂଲ୍ୟରେ ସଂଗ୍ରହକାରୀଙ୍କଠାରୁ ବେପାରୀମାନେ କିଣି ଲାଭବାନ ହେଉଛନ୍ତି। ଜିଲା ପ୍ରଶାସନର ଆଦୌ ଦୃଷ୍ଟି ନ ଥିବାରୁ ସଂଗ୍ରହକାରୀ ହତାଶ ଏବଂ ବେପାରୀ ମାଲେମାଲ ହେଉଛନ୍ତି। ଏ ସକ୍ରାନ୍ତରେ କୋମନା ବନ ବିଭାଗ ରେଞ୍ଜର ଦେବଦତ ସୁତାରଙ୍କୁ ପଚାରିବରୁ ବନ ବିଭାଗ ହାତରେ ଥିବାବେଳେ ସରକାର ହଜାର ହଜାର କୋଟି ଟଙ୍କାର ରାଜସ୍ବ ପାଉଥିଲା। ଯେତେବେଳେ ସରକାର ପଞ୍ଚାୟତକୁ ନ୍ୟସ୍ତ ଦେବାପଠାରୁ ଚୋରା ବେପାରୀମାନେ ପଞ୍ଚାୟତିରାଜ ବିଭାଗକୁ ହାତବାରିଶି କରି କୋଟି କୋଟି ଟଙ୍କାର ରାଜସ୍ବ ଲୁଟି ଖାଉଛନ୍ତି। କୋମନା ବିଡିଓ ସୁଶାନ୍ତ ରଣାଙ୍କୁ ପଚାରିବାରୁ ଏହି ସବୁ ପଞ୍ଚାୟତ ହାତରେ ନାହିଁ ବୋଲି କହିଥିଲେ।
