ତେନ୍ତୁଳିଖୁଣ୍ଟ,୮ା୬( ଡି.ଏନ୍.ଏ): ନବରଙ୍ଗପୁର ଜିଲା ତେନ୍ତୁଳିଖୁଣ୍ଟି ବ୍ଳକ ଅଞ୍ଚଳର ରାସ୍ତା କଡରେ ବଡ଼ ବଡ଼ ଧାନ ମିଲ ଓ ବ୍ଲକ ମାର୍କେଟ ସ୍ଥାନରେ ପଲିଥିନର ବହୁଳ ବ୍ୟବହାର ଯୋଗୁ ଦିନକୁ ଦିନ ପ୍ରଦୂଷଣ ବୃଦ୍ଧି ପାଇବାରେ ଲାଗିଛି। ଏହାକୁ ନିୟନ୍ତ୍ରଣ ପାଇଁ ପ୍ରଶାସନ ପକ୍ଷରୁ କଡ଼ା ପଦକ୍ଷେପ ନିଆଯାଉ ନ ଥିବା ଅଭିଯୋଗ ହେଉଛି। ସରକାରୀ ନିୟମକୁ ଅବମାନନା କରି ରାସ୍ତା କଡରେ ଗଢ଼ି ଉଠିଛି ଅନେକ ଧାନ ମିଲ । ରାତି ଦିନ ମିଲ ଚାଲୁ ଥିବାରୁ ଧାନଗୁଣ୍ଡ ଉଡ଼ୁଥିବାରୁ ରାସ୍ତାରେ ଯାତାୟାତ କରୁଥିବା ଶତାଧିକ ଯାତ୍ରୀ ଓ ନିକଟରେ ଥିବା ଶିକ୍ଷା ଅନୁଷ୍ଠାନ, ସରକାରୀ କାର୍ଯ୍ୟାଳୟକୁ ଆସୁଥିବା ଲୋକେ ନାକେଦମ ହୋଇପଡ଼ୁଥିବା ଦେଖିବାକୁ ମିଳୁଛି। ଧାନ ଗୁଣ୍ଡ ଆକତ୍ ଓ ନାକରେ ପଶିଯାଉଥିବାରୁ ଲୋକେ ଆଖି ରୋଗଠାରୁ ଆରମ୍ଭ କରି ଯକ୍ଷ୍ମା, କାଶ ଭଳି ଅନେକ ମାରାତ୍ମକ ରୋଗରେ ଆକ୍ରନ୍ତ ହେଉଛନ୍ତି। ଧାନ ମିଲ୍ଗୁଡ଼ିକ ରାସ୍ତା କଡ଼ରୁ ଉଠାଇ ଅନ୍ୟତ୍ର ସ୍ଥାନାନ୍ତର ପାଇଁ ସ୍ଥାନୀୟ ଲୋକେ ବାରମ୍ବାର ଦାବି କରୁଥିଲେ ମଧ୍ୟ ସ୍ଥାନୀୟ ପ୍ରଶାସନ ଓ ପ୍ରଦୂଷଣ ବୋର୍ଡ଼ ସବୁ ଜାଣି ନୀରବ ରହୁଥିବା ଅଭିଯୋଗ ହେଉଛି। ଅନ୍ୟପକ୍ଷେ ରାଜ୍ୟ ପ୍ରଦୂଷଣ ବୋର୍ଡ଼ ପଲିଥିନ ବ୍ୟବହାର ଉପରେ କଟକଣା ଲଗାଇଥିବାବେଳେ ତେନ୍ତୁଳିଖୁଣ୍ଟି ବ୍ଳକ ଅଞ୍ଚଳରେ ପଲିଥିନ ବ୍ୟବହାର ମଧ୍ୟ ବଢ଼ି ଚାଲିଛି। ତେନ୍ତୁଳିଖୁଣ୍ଟି ବ୍ଳକରେ ଦୈନିକ ୫୦କିଲୋ ପଲିଥିନ ବ୍ୟବହାର ହେଉଥିବା ଏକ ବେସରକାରୀ ସଂସ୍ଥା ସର୍ଭେରୁ ଜଣା ପଡୁଛି। ଦୋକାନଗୁଡ଼ିକରେ ପଲିଥିନ ବିକ୍ରି କରାଯାଉଥିବାବେଳେ ଚାରିଆଆଡେ ପଲିଥିନ ବିକ୍ଷିପ୍ତ ଭାବେ ପଡି ରହୁଛି। ଅସରାଏ ବର୍ଷା ହେଲେ ନାଳ ନର୍ଦ୍ଦମା ଚାରିଆଡ଼େ ପଲିଥିନ୍ ଜମା ହୋଇ ଦୂଷିତ ପାଣି ନିଷ୍କାସନ ହୋଇ ପାରୁନାହିଁ। ଫଳରେ ଗାଁ ଗହଳିରେ ମଶା ମାଛି ସଂଖ୍ୟା ବୃଦ୍ଧି ପାଇବା ସହ ମ୍ୟାଲେରିଆ ରୋଗୀଙ୍କ ସଂଖ୍ୟା ବଢ଼ି ଚାଲିଛି । ଗତ ଦ୨ ଦିନ ତଳେ ତେନ୍ତୁଳିଖୁଣ୍ଟି କାର୍ଯ୍ୟାଳୟ ପରିସରରେ ବିଶ୍ୱ ପରିବେଷ ଦିବସ ପାଳନ କରାଯାଇଥିବା ବେଳେ ଦୂଷିତ ପରିବେଷକୁ ଦେଖିଲେ ଏହା କେବଳ କାଗଜ କଲମରେ ସୀମିତ ଥିବା ଅଭିଯୋଗ ହେଉଛି। ପଲିଥିନ ବଦଳରେ କାଗଜ ଓ କପଡା ବ୍ୟାଗ ଉପରେ ଗୁରୁତ୍ୱ ଦେଲେ ନିଶ୍ଚିତ ରୂପେ ଏହି ଦିବସ ପାଳନର ମହତ୍ତ୍ୱ ରହିବ ବୋଲି ବୁଦ୍ଧିଜୀବୀ ପ୍ରକାଶ କରିଛନ୍ତି।
