ସୁଦୀକ୍ଷାଙ୍କ ମୃତ୍ୟୁକୁ ନେଇ ରାଜନୀତି
9:35 amAugust 12, 2020August 12, 2020 / 01

ବୁଲନ୍ଦସହର,୧୨ା୮ : ଉତ୍ତରପ୍ରଦେଶର ଗୌତମବୁଦ୍ଧ ନଗରରେ ଜଣେ ମେଧାବୀ ଛାତ୍ରୀଙ୍କ ମୃତ୍ୟୁକୁ ନେଇ ବିବାଦ ସୃଷ୍ଟି ହୋଇଛି। ଆମେରିକାର ଏକ କଲେଜରେ ପଢ଼ୁଥିବା ୨୦ ବର୍ଷୀୟା ସୁଦୀକ୍ଷା ଭାଟି ସୋମବାର ସ୍କୁଟିରେ ଯାଉଥିବାବେଳେ ବୁଲନ୍ଦସହରର ଅଉରଙ୍ଗାବାଦ ଅଞ୍ଚଳରେ ଦୁର୍ଘଟଣାର ଶିକାର ହୋଇଥିଲେ। ସେ ତାଙ୍କ ସାନଭାଇଙ୍କ ସହ ସ୍କୁଟିରୁ ଖସିପଡ଼ିଥିଲେ। ଏଥିରେ ସୁଦୀକ୍ଷାଙ୍କ ମୃତ୍ୟୁ ଘଟିଥିବାବେଳେ ସାନଭାଇ ଆହତ ହୋଇଛନ୍ତି। ଗୌତମବୁଦ୍ଧ ନଗରସ୍ଥିତ ଦାଦ୍ରି ତହସିଲସ୍ଥିତ ଦେରି ସ୍କାନର ଗ୍ରାମରୁ ଖାନପୁରରେ ଥିବା ନିଜ ମାମୁଙ୍କ ଘରକୁ ଯାଉଥିବାବେଳେ ଏହି ଦୁର୍ଘଟଣା ଘଟିଥିଲା। ଆମେରିକାର ମାସାଚ୍ୟୁଟ୍ସସ୍ଥିତ ବାବସୋନ କଲେଜର ଛାତ୍ରୀ ସୁଦୀକ୍ଷା କରୋନା ଭାଇରସ୍‌ ଯୋଗୁ ଭାରତ ଚାଲିଆସିଥିଲେ। ଆସନ୍ତା ୨୦ ତାରିଖରେ ସେ ପୁଣି ଆମେରିକାକୁ ପାଠ ପଢ଼ିବା ପାଇଁ ଫେରିଥାନ୍ତେ। କେତେଜଣ ଦୁର୍ବୃତ୍ତ ବୁଲେଟରେ ସୁଦୀକ୍ଷାଙ୍କୁ ପିଛା କରିବାରୁ ଦୁର୍ଘଟଣା ଘଟିଥିବା ତାଙ୍କ ପରିବାର ଲୋକେ ଅଭିଯୋଗ କରିଛନ୍ତି। ଏନେଇ କଂଗ୍ରେସ ନେତ୍ରୀ ପ୍ରିୟଙ୍କା ଗାନ୍ଧୀ ଭଦ୍ରା ରାଜ୍ୟର ଯୋଗୀ ଆଦିତ୍ୟନାଥ ସରକାରଙ୍କୁ ସମାଲୋଚନା କରିଛନ୍ତି। ଉତ୍ତରପ୍ରଦେଶରେ ଆଇନ ପ୍ରତି କାହାରି ଭୟ ନାହିଁ। କମେଣ୍ଟ ମରାକୁ ନେଇ ସରକାର କିଛି କରୁନାହାନ୍ତି ବୋଲି ପ୍ରିୟଙ୍କା କହିଛନ୍ତି।