ପାଟନା,୩ ।୧୦: ରାଜନୀତିର ଚାଣକ୍ୟ କୁହାଯାଉଥିବା ପ୍ରଶାନ୍ତ କିଶୋର ରବିବାର ୨ ଅକ୍ଟୋବର ଅର୍ଥାତ୍ ଗାନ୍ଧୀ ଜୟନ୍ତୀରେ ପଶ୍ଚିମ ଚମ୍ପାରନ ଜିଲାର ଭିତିହାରବା ସ୍ଥିତ ଗାନ୍ଧୀ ଆଶ୍ରମରୁ ତାଙ୍କର ‘ଜନ ସୁରାଜ’ ପଦଯାତ୍ର ଆରମ୍ଭ କରିଛନ୍ତି । ଏହି ସମୟରେ ସେ ପୁଣିଥରେ ବିହାର ମୁଖ୍ୟମନ୍ତ୍ରୀ ନୀତୀଶ କୁମାରଙ୍କୁ ଟାର୍ଗେଟ କରିଛନ୍ତି । ସେ କହିଛନ୍ତି ବିହାର ଆଜିବି ୧୯୯୦ ଭଳି ରହିଛି । ୩୦-୪୦ ବର୍ଷରେ କିଛି ବି ପରିବର୍ତ୍ତନ ହୋଇନାହିଁ ।
ପ୍ରଶାନ୍ତ କିଶୋର କହିଛନ୍ତି, ଆମେ ୩୦-୪୦ ବର୍ଷ ହେବ ଶୁଣି ଆସିଛୁ ଯେ ଶିକ୍ଷା ଓ ସ୍ୱାସ୍ଥ୍ୟ ସେବାରେ ସୁଧାର ଆସିବ । ହେଲେ ରାଜ୍ୟରେ କିଛି ବି ବଦଳି ନାହିଁ । ୧୯୯୦ରେ ବିହାର ସବୁଠାରୁ ଗରିବ ଓ ସବୁଠାରୁ ପଛୁଆ ରାଜ୍ୟ ଥିଲା । ଆଜି ୨୦୨୨ରେ ବି ସେହି ସ୍ଥିତିରେ ରହିଛି ବିହାର । ଲୋକେ ରାଜ୍ୟ ଛାଡି ବାହାର ରାଜ୍ୟକୁ ଚାଲି ଯିବାକୁ ଶ୍ରେୟ ମଣୁଛନ୍ତି ।
ସୂଚନାଯୋଗ୍ୟ, ପ୍ରଶାନ୍ତ କିଶୋରଙ୍କ ‘ଜନ ସୁରାଜ’ ପଦଯାତ୍ରା ୩,୫୦୦ କିଲୋମିଟର ଦୂର ଅତିକ୍ରମ କରିବ । ସେ ଯାତ୍ରା ଆରମ୍ଭ କରିବା ପୂର୍ବରୁ ଟୁଇଟ କରି ଲେଖିଛନ୍ତି, ଦେଶର ସବୁଠାରୁ ଗରିବ ଓ ପଛୁଆ ରାଜ୍ୟ ବିହାରରେ ବ୍ୟବସ୍ଥା ପରିବର୍ତ୍ତନର ଦୃଢ ସଂକଳ୍ପ, ପ୍ରଥମ ମହତ୍ୱପୂର୍ଣ୍ଣ ପଦକ୍ଷେପ ସମାଜର ସହଯୋଗରେ ଏକ ନୂଆ ଓ ଭଲ ରାଜନୈତିକ ବ୍ୟବସ୍ଥା ପ୍ରସ୍ତୁତ କରିବାକୁ ଆଗାମୀ ୧୨-୧୫ ମାସ ମଧ୍ୟରେ ବିହାରର ସହର, ଗାଁ ଓ ଗଳିରେ ୩୫୦୦ କିଲୋମିଟର ପଦଯାତ୍ରା, ଭଲ ଓ ବିକଶିତ ବିହାର ପାଇଁ ପ୍ରଶାନ୍ତ କାମ କରିବେ ।
