କୁଜଙ୍ଗ,୨୧।୧୨(ଡି.ଏନ୍.ଏ.): ପ୍ରସ୍ତାବିତ ଜେଏସ୍ଡବ୍ଲ୍ୟୁ ପ୍ରକଳ୍ପକୁ ବିରୋଧ କରୁଥିବା ଜଗତ୍ସିଂହପୁର ଜିଲା ଏରସମା ତହସିଲ ଅନ୍ତର୍ଗତ ଢିଙ୍କିଆ ଗ୍ରାମରେ ସୋମବାର ସୀମା ନିର୍ଦ୍ଧାରଣକୁ କେନ୍ଦ୍ର କରି ପୋଲିସ ଓ ଗ୍ରାମବାସୀ ମୁହାଁମୁହିଁ ହୋଇଛନ୍ତି। ୨ ମାସ ପୂର୍ବେ ରାଜସ୍ବ ଗ୍ରାମର ମାନ୍ୟତା ପାଇଥିବା ପଡ଼ାଗ୍ରାମ ମାହଳର ସୀମା ନିର୍ଦ୍ଧାରଣ ପାଇଁ ପ୍ରଶାସନିକ ଅଧିକାରୀମାନେ ଆସିଥିଲେ। ପୂର୍ବ ନୋଟିସ ଅନୁଯାୟୀ, ଏରସମା ତହସିଲଦାର ପ୍ରଜ୍ଞାନନ୍ଦ ଦାସ, ଅତିରିକ୍ତ ଏସ୍ପି ନିମାଇଁ ଚରଣ ସେଠୀ, ଅଭୟଚାନ୍ଦପୁର ଥାନା ଅଧିକାରୀ ଜୀବନାନନ୍ଦ ଜେନାଙ୍କ ସମେତ ୧୫ ପ୍ଲାଟୁନ ପୋଲିସ ଫୋର୍ସ ଓ ଅନ୍ୟାନ୍ୟ ରାଜସ୍ବ କର୍ମଚାରୀ ମାହାଳ ସୀମାରେ ପହଞ୍ଚତ୍ ମାପଚୁପ ଆରମ୍ଭ କରିଥିଲେ।
ଏହି ସମୟରେ ଢିଙ୍କିଆ ଗ୍ରାମର ବହୁ ଲୋକ ଘଟଣାସ୍ଥଳକୁ ମାଡିଆସିଥିଲେ। ଏହାଦେଖି ପ୍ରଶାସନିକ ଅଧିକାରୀମାନେ ସୀମା ନିର୍ଦ୍ଧାରଣ ଛାଡି ସେଠାରୁ ଚାଲିଆସିଥିଲେ। ଗ୍ରାମବାସୀ ଢିଙ୍କିଆରେ ନ ଥିବା ବେଳେ ପ୍ରକଳ୍ପ ବିରୋଧୀ ନେତା ଦେବେନ୍ଦ୍ର ସ୍ବାଇଁଙ୍କ ଦାଦା ଅଯୋଦ୍ଧା ସ୍ବାଇଁ ଏବଂ ତାଙ୍କ ଝିଅ ମିଲ୍ଲି ସ୍ବାଇଁଙ୍କୁ ପୋଲିସ ଗିରଫ କରିଥିଲା। ଏ ସମ୍ପର୍କରେ ଜାଣିବା ପରେ ଢିଙ୍କିଆର ଲୋକେ ଉତ୍ତ୍ୟକ୍ତ ହୋଇ ବହୁ ସଂଖ୍ୟାରେ ପଟଣାଠାରେ ଅସ୍ଥାୟୀଭାବେ ଖୋଲିଥିବା ପୋଲିସ କ୍ୟାମ୍ପରେ ଆକ୍ରମଣ କରିବାକୁ ମାଡ଼ିଯାଇଥିଲେ। ସେମାନେ ପୋଲିସ ଆଡ଼କୁ ଢେଲାପଥର ମାଡ଼ କରିଥିଲେ। ପୋଲିସ ପକ୍ଷରୁ ମଧ୍ୟ ଢେଲାପଥର ମାଡ଼ କରାଯାଇଥିଲା। ଏନେଇ କିଛି ସମୟ ପାଇଁ ଉତ୍ତେଜନାମୂଳକ ପରିସ୍ଥିତି ସୃଷ୍ଟି ହୋଇଥିଲା। ଏହି ଘଟଣା ପରେ ପୋଲିସ ସତର୍କ ରହିଥିବାବେଳେ ବିରୋଧୀମାନେ ଫୁଲଖାଇ ମନ୍ଦିରରେ ଏକତ୍ର ହୋଇ ଭିଟାମାଟିର ସୁରକ୍ଷା ପାଇଁ ପ୍ରସ୍ତୁତ ରହିବାକୁ ରଣହୁଙ୍କାର ଦେଇଛନ୍ତି। ଗତ ୩ ତାରିଖ ରାତିରେ ପ୍ରକଳ୍ପ ସପକ୍ଷରେ ଥିବା ଢିଙ୍କିଆ ପଞ୍ଚାୟତର ଗୋବିନ୍ଦପୁରର ପ୍ରଭାତ ରାଉତଙ୍କ ଘର ଉପରେ ବୋମା ମାଡ଼ ହୋଇଥିଲା। ୪ ତାରିଖରେ ପୋଲିସ ଏହି ଘଟଣାର ତଦନ୍ତ କରିବାକୁ ଯାଇଥିବାବେଳେ ଅଭୟଚାନ୍ଦପୁର ଥାନା ସବ୍ଇନ୍ସପେକ୍ଟର ଆଶୁତୋଷ ହୋତାଙ୍କୁ ଢିଙ୍କିଆର କେତେଜଣ ଲୋକ ଅଟକାଇ ମାଡ଼ମାରିବା ସହ ବନ୍ଧୁକ ଛଡାଇ ନେଇଥିଲେ। ଏହି ଅଭିଯୋଗରେ ଅଯୋଦ୍ଧା ଓ ମିଲ୍ଲିଙ୍କ ସମେତ ଦେବେନ୍ଦ୍ର ସ୍ବାଇଁ, ନିତ୍ୟାନନ୍ଦ ସ୍ବାଇଁ, ଶାନ୍ତି ସେଠୀ, କୁନି ମଲ୍ଲିକ ପ୍ରମୁଖଙ୍କ ନାମରେ ପୋଲିସ ମାମଲା(ନଂ. ୧୨୭/୨୧)ରୁଜୁ କରିଥିଲା। ଏହି ମାମଲାରେ ଅଯୋଦ୍ଧା ଓ ତାଙ୍କ ଝିଅକୁ ଗିରଫ କରାଯାଇଛି ବୋଲି ଥାନା ଅଧିକାରୀ ଜେନା ସୂଚନା ଦେଇଛନ୍ତି।
