ଅନୁଗୋଳ ଅଫିସ,୨୭।୮: ରାତି ଅଧରେ ଜଣେ ମହିଳାଙ୍କ ଘର କବାଟ ବାଡ଼େଇ ପଶିଥିଲେ ପୋଲିସ ବାବୁ। ମହିଳା ଜଣଙ୍କ କିଛି ପଚାରିବା ପୂର୍ବରୁ ରଙ୍ଗିଲା ପୋଲିସ ବାବୁ ଜଣଙ୍କ ଆରମ୍ଭ କରିଦେଇଥିଲେ ଦୁର୍ବ୍ୟବହାର। ମହିଳା ଜଣଙ୍କ ଏଭଳି କରିବାକୁ ମନା କରିବା ସତ୍ତ୍ୱେ ମଧ୍ୟ ପୋଲିସ ବାବୁ ତାହା ଶୁଣି ନ ଥିଲେ। ଏପରିକି ଅସଦାଚରଣର ସବୁ ସୀମା ଅତିକ୍ରମ କରିଯାଇଥିଲେ। ମହିଳା ଜଣଙ୍କ ଏହାର ଏକ ଭିଡିଓ ଫୁଟେଜ୍ କରିଥିଲେ। ଶେଷରେ ତାଳଚେର ଥାନାକୁ ଫୋନ କରିବାରୁ ରଙ୍ଗିଲା ପୋଲିସ ବାବୁ ସେଠାରୁ ଚାଲିଯାଇଥିଲେ। ମାତ୍ର ଏହି ଭିଡିଓ ବର୍ତ୍ତମାନ ଭାଇରାଲ ହେବା ପରେ ଚର୍ଚ୍ଚା ଜୋର ଧରିଛି। ତେବେ ଏଭଳି ଲଜ୍ଜାଜନକ ଘଟଣା ଘଟିଛି ଅନୁଗୋଳ ଜିଲାରେ।
ସୂଚନାଯୋଗ୍ୟ, ତାଳଚେର ଥାନା ଅଧୀନ ସ୍ବତନ୍ତ୍ର ପୋଲିସ ଅଧିକାରୀ ଭାବେ ନିଯୁକ୍ତି ପାଇଥିବା ନୀଳମଣି ମହାନ୍ତି ହାଇୱେ ପାଟ୍ରୋଲିଂ ଦାୟିତ୍ୱରେ ଥିଲେ। ରାତିଅଧରେ ତାଳଚେର ଥାନା ଅଞ୍ଚଳର ଜଣେ ମହିଳାଙ୍କ ଘର କବାଟ ବାଡ଼େଇ ସେ ଭିତରକୁ ପଶିଥିଲେ। ଏମିତିକି ଘରେ ପଶି ଦୁର୍ବ୍ୟବହାର ପ୍ରଦର୍ଶନ କରିଥିବା ନେଇ ମହିଳାଜଣକ ଥାନାରେ ଅଭିଯୋଗ କରିଥିଲେ। ପରେ ତାଳଚେର ପୋଲିସ ସମ୍ପୃକ୍ତ ଅଧିକାରୀଙ୍କୁ ଗିରଫ କରି କୋର୍ଟଚାଲାଣ କରିଛିି।
