ବରଗଡ଼/ଅତାବିରା,୧୧।୧(ପ୍ରେମାନନ୍ଦ ଖମାରୀ/ଯୁଧିଷ୍ଠିର ମହାପାତ୍ର): ବରଗଡ଼ ଜିଲାରେ ଖରିଫ୍ ଧାନ ସଂଗ୍ରହ ପ୍ରକ୍ରିୟାକୁ ଆଉ ସପ୍ତାହକ ପରେ ୨ ମାସ ପୂରିବ। କିନ୍ତୁ ଏପର୍ଯ୍ୟନ୍ତ ଧାନବିକ୍ରି ଅବ୍ୟବସ୍ଥା ଲାଗି ରହିଛି। ଜିଲାର ଅନେକ ଚାଷୀ ଏବେ ସୁଦ୍ଧା ଧାନବିକ୍ରି ପଞ୍ଜୀକରଣରୁ ବାଦ୍ ପଡ଼ି ଥିବାବେଳେ ବହୁଚାଷୀଙ୍କୁ ଧାନବିକ୍ରି ଟୋକନ ମିଳିପାରି ନାହିଁ। ସେହିପରି ମଣ୍ଡିରେ ଧାନ ଉଠାଣ ବିଳମ୍ବ ହେଉଥିବା ବେଳେ କଟ୍ନୀଛଟ୍ନୀ ଜୋର୍ ଧରିଥିବା ଚାଷୀମାନେ ଅଭିଯୋଗ କରି ଆସୁଛନ୍ତି। ହେଲେ କୌଣସି ସୁଫଳ ମିଳୁ ନ ଥିବା ଅଭିଯୋଗ କରି ଜିଲାର ଚାଷୀମାନେ ତାତି ଉଠିଛନ୍ତି। ଶନିବାର ଚାଷୀ ସଂଗଠନ ଜୟ କିଷାନ ଆନ୍ଦୋଳନ ପକ୍ଷରୁ ଅତାବିରା ମଣ୍ଡି ପରିସରରେ ଏକ ବୈଠକ ଅନୁଷ୍ଠିତ ହୋଇଥିଲା। ଏଥିରେ ସମସ୍ତ ଚାଷୀ ମଣ୍ଡି ସମ୍ମୁଖ ୫୩ ନମ୍ବର ଜାତୀୟ ରାଜପଥକୁ ଆସି କିଛି ସମୟ ଧରି ଅବରୋଧ କରିଥିଲେ। ପୋଲିସ ସେଠାରୁ ଆନ୍ଦୋଳନରତ ୬୦ଜଣ ଚାଷୀଙ୍କୁ ଉଠାଇ ନେଇ ବରଗଡ଼ ରିଜର୍ଭ ପୋଲିସ ଏବଂ ବରଗଡ଼ ଗ୍ରାମାଞ୍ଚଳ ଥାନାରେ ଅଟକ ରଖିଥିଲା। ସନ୍ଧ୍ୟା ପ୍ରାୟ ୫ଟାରେ ଚାଷୀମାନଙ୍କୁ ପୋଲିସ ଛାଡ଼ିଥିଲା।
ପୂର୍ବ ନିର୍ଦ୍ଧାରୀତ କାର୍ଯ୍ୟକ୍ରମ ଅନୁସାରେ, ଧାନବିକ୍ରି ଅବ୍ୟବସ୍ଥାକୁ ନେଇ ପୂର୍ବାହ୍ନ ପ୍ରାୟ ୧୦ଟାରୁ ଅତାବିରା ମଣ୍ଡି ପରିସରରେ ଜୟ କିଷାନ ଆନ୍ଦୋଳନର ବୈଠକ ହୋଇଥିଲା। ଜୟ କିଷାନ ଆନ୍ଦୋଳନର ଜିଲା ସଭାପତି ସୁଶୀଲ କୁମାର ସାହୁଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ପଶ୍ଚିମ ଓଡ଼ିଶା କୃଷକ ସଙ୍ଗଠନ ସମନ୍ବୟ ସମିତିର ଆବାହକ ଲିଙ୍ଗରାଜ, ଜୟ କିଷାନ ଆନ୍ଦୋଳନର ସମ୍ପାଦକ ହର ବଣିଆଁ, ବରିଷ୍ଠ ଚାଷୀନେତା ଶିବ ପ୍ରସାଦ ପ୍ରଧାନ, ମହାଦେବ ପ୍ରଧାନ, ଅରୁଣ ପ୍ରଧାନ, ଜିତୁ ବେହେରା, ଭଞ୍ଜନ ବାରିକ, କୁନା ବେହେରା, ଚଞ୍ଚଳ ପ୍ରଧାନ, ସୁରେନ୍ଦ୍ର ମେହେର, ସରୋଜ ପ୍ରଧାନ, ସିଲିଂ ସାହୁ, କିଶୋର ସାହୁ, ମିନିଷ୍ଟର ବାରିକ ପ୍ରମୁଖ ଉଦ୍ବୋଧନ ଦେଇଥିଲେ ଏବଂ ଧାନବିକ୍ରି ଅବ୍ୟବସ୍ଥାକୁ ନେଇ ଉଭୟ ରାଜ୍ୟ, କେନ୍ଦ୍ର ସରକାରଙ୍କୁ କଡ଼ା ସମାଲୋଚନା କରିଥିଲେ।
ବୈଠକରେ ପଶ୍ଚିମ ଓଡ଼ିଶା କୃଷକ ସଂଗଠନ ସମନ୍ବୟ ସମିତିର ଆବାହକ ଲିଙ୍ଗରାଜ କହିଥିଲେ, ବର୍ତ୍ତମାନ ଯେଭଳି ଢଙ୍ଗରେ ଧାନ କିଣାବିକା ଚାଲିଛି, ଚାଷୀମାନେ ସେମାନଙ୍କ ଅମଳ ଧାନ ବିକ୍ରି କରିପାରିବେ କି ନାହିଁ, ସେହି ସନ୍ଦେହରେ ରହିଛନ୍ତି। ମିଲର୍ସମାନେ ଗତ ୫ତାରିଖରୁ ୩ଦିନ ଧାନ ଉଠାଣ ବନ୍ଦ କରିଥିଲେ। ଗୋଟିଏ ଦାବି ମାନିନେବା ପରେ ମିଲର୍ସମାନେ ଧାନ କିଛି କିଛି ଉଠାଉଛନ୍ତି। ମାତ୍ର ବାକି ଦାବି ପୂରଣ ପାଇଁ ମିଲର୍ସମାନେ ରାଜ୍ୟ ସରକାରଙ୍କୁ ୧୫ଦିନର ମହଲତ୍ ଦେଇଛନ୍ତି। ଫଳରେ ପୁଣି ୧୫ଦିନ ମଧ୍ୟରେ ମିଲର୍ସମାନେ ଆନ୍ଦୋଳନକୁ ଓହ୍ଲାଇବାର ଆଶଙ୍କା ଦେଖାଯାଇଛି। ଏଭଳି ସ୍ଥିତିରେ ସରକାରଙ୍କୁ ଜବାବ୍ ଦେବା ପାଇଁ ୨୦୦୧ ଭଳି ଚାଷୀ ଆନ୍ଦୋଳନକୁ ଓହ୍ଲାଇବା ପାଇଁ ଲିଙ୍ଗରାଜ ଆହ୍ବାନ କରିଥିଲେ।
ଏହାପରେ ଅପରାହ୍ନ ୧ଟା ୧୫ମିନିଟ୍ରେ ସମସ୍ତ ଚାଷୀ ପ୍ରତୀକାତ୍ମକଭାବେ ଏକ ଘଣ୍ଟା ରାଜପଥ ଅବରୋଧ ପାଇଁ ବୈଠକରୁ ଉଠି ୫୩ ନମ୍ବର ଜାତୀୟ ରାଜପଥକୁ ଯାଇଥିଲେ ଏବଂ ରାଜପଥ ଉପରେ ବସିଥିଲେ। ସେଠାରେ ଉପସ୍ଥିତ ପୋଲିସ ଆନ୍ଦୋଳନରତ ଚାଷୀଙ୍କୁ ଉଠାଇ ନେଇଥିଲା। ତେବେ ଆସନ୍ତା ୭ଦିନ ମଧ୍ୟରେ ରାଜ୍ୟ ସରକାର ସମସ୍ତ ଚାଷୀଙ୍କୁ ଟୋକନ ପ୍ରଦାନ ସହିତ ଅମଳ ଧାନ କିଣାଯିବା ଦିଗରେ ତ୍ୱରିତ୍ ପଦକ୍ଷେପ ନିଆ ନ ଗଲେ ଆନ୍ଦୋଳନ ଆଗକୁ ଆହୁରି ତୀବ୍ର ହେବ ବୋଲି ଲିଙ୍ଗରାଜ ଚେତାବନୀ ଦେଇଥିଲେ।
