ଦାରିଙ୍ଗବାଡ଼ି,୬ା୮(ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡ଼ି ବ୍ଲକ ବୁଡ଼ାଗୁଡ଼ା ଫାଣ୍ଡିକୁ ଖୋଲିବା ପାଇଁ କଥା ଦେଇ କଥା ରଖିଲେ କନ୍ଧମାଳ ଏସ୍ପି ହରିଶ ବିଶି। ଗାଁରେ ପୁଣି ଫେରିଛି ଶାନ୍ତି ଆଉ ବଢ଼ିଛି ପୋଲିସ ପ୍ରତି ଆତ୍ମବିଶ୍ୱାସ। ଅଞ୍ଚଳବାସୀଙ୍କ ବାରମ୍ବାର ଦାବି ପରେ ୪ ମାସ ଭିତରେ ଅର୍ଥାତ ଅଗଷ୍ଟ ୧୫ ସ୍ବାଧୀନତା ଦିବସରେ ଫାଣ୍ଡିର ପୁନଃ ଶୁଭାରମ୍ଭ କରାଯିବ ବୋଲି କନ୍ଧମାଳ ଏସପି ହରିଶ ବିଶି ପ୍ରତିଶ୍ରୁତି ଦେଇଥିଲେ କିନ୍ତୁ ପ୍ରତିଶ୍ରୁତିର ସମୟସୀମା ପୂର୍ବରୁ କନ୍ଧମାଳ ପୋଲିସ ବୁଡ଼ାଗୁଡ଼ା ଫାଣ୍ଡିକୁ ଶୁଭ ଉଦ୍ଘାଟନ କରିଥିବା ଚର୍ଚ୍ଚା ଜୋର ଧରିଛି।
ପ୍ରକାଶ ଯେ, ବ୍ରିଟିଶ ଅମଳରୁ ବୁଡ଼ାଗୁଡ଼ାଠାରେ ଏକ ଫାଣ୍ଡି ପ୍ରତିଷ୍ଠା ହୋଇଥିଲା। ଏଥିରେ ଦାରିଙ୍ଗବାଡ଼ି,କୋଟଗଡ଼ ଏବଂ ବାଲିଗୁଡ଼ା ବ୍ଲକର ପ୍ରାୟ ୧୦ଟି ପଞ୍ଚାୟତ ଉକ୍ତ ଫାଣ୍ଡି ଉପରେ ନିର୍ଭର କରୁଥିଲେ। ତେବେ ପୋଲିସ କର୍ମଚାରୀ ଅଭାବ ସାଙ୍ଗକୁ ଅଞ୍ଚଳରେ ମାଓବାଦୀ ଗତିବିଧି ବୃଦ୍ଧି ପାଇଥିଲା ଫାଣ୍ଡି ସମ୍ମୁଖରେ ବିଭିନ୍ନ ସମୟରେ ମାଓବାଦୀ ନାମରେ ପୋଷ୍ଟର ବ୍ୟାନର ଲାଗୁଥିବା ବେଳେ ପୋଲିସ ବାରାକ କିମ୍ବା ପୋଲିସ ବଳ ଉକ୍ତ ଫାଣ୍ଡି ଭିତରେ ସେହି ସମୟରେ କମ୍ ରହିଥିବାରୁ ଧିରେ ଧିରେ ଫାଣ୍ଡିଟିକୁ କୌଣସି କାରଣରୁ ବନ୍ଦ କରି ଦିଆଯାଇଥିଲା। ଗତ ୨୦୧୭ ରୁ ଏଥିରେ ତାଲା ଝୁଲିଥିଲା। ସେହିଦିନଠାରୁ ଅଞ୍ଚଳବାସୀ ପୁଣି ଏହି ଫାଣ୍ଡି ଖୋଲିବାକୁ ବାରମ୍ବାର ଦାବି କରି ଆସୁଥିଲେ ମଧ୍ୟ ସମ୍ଭବ ହୋଇ ନ ଥିଲା। ପରବର୍ତ୍ତୀ ସମୟରେ କନ୍ଧମାଳ ପୋଲିସ ପକ୍ଷରୁ ନୂତନ ଫାଣ୍ଡି ନିର୍ମାଣ କରାଯାଇଥିଲେ ମଧ୍ୟ ଫାଣ୍ଡି ବିଧିବଧ ଭାବରେ ଆରମ୍ଭ ହୋଇ ନ ଥିଲା। ସରପଞ୍ଚ ତାତୁରା ପ୍ରଧାନ, ସମିତିସଭ୍ୟ ଶ୍ରୀକାନ୍ତ ପ୍ରଧାନଙ୍କ ନେତୃତ୍ୱରେ ଅଞ୍ଚଳବାସୀ ବାରମ୍ବାର କନ୍ଧମାଳ ଏସ୍ପି, ବାଲିଗୁଡ଼ା ଏସ୍ଡିପିଓଙ୍କ ଦୃଷ୍ଟିକୁ ନେଇଥିଲେ। ଏବେ ଫାଣ୍ଡି ଖୋଲିବା ସହ ପୋଲିସର ସ୍ବତନ୍ତ୍ର ସଶସ୍ତ୍ର ବାହିନୀ ଏବଂ ଜଣେ ପୋଲିସ ଅଫିସର ଓ ହୋମଗାର୍ଡମାନଙ୍କୁ ନିୟୋଜିତ କରାଯାଇଛି। ଫଳରେ ଅଞ୍ଚଳରେ କନ୍ଧମାଳ ପୋଲିସକୁ ଅଞ୍ଚଳବାସୀ ସାଧୁବାଦ ଜଣାଇବା ସହ ଏହା ଖୋଲିବା ଦ୍ୱାରା ଅଞ୍ଚଳରେ ଖୋଲିବାଦିନଠାରୁ ଶାନ୍ତି ମିଳିଛି। ଉକ୍ତ ଅଞ୍ଚଳରେ ଫାଣ୍ଡି ବନ୍ଦ ଯୋଗୁ ଚୋରାମଦ କାରବାର ବୃଦ୍ଧି ସହ ଅସାମାଜିକ କାର୍ଯ୍ୟକଳାପ, ଚୋରି ଆଦି ବୃଦ୍ଧି ପାଇଥିଲା ବୋଲି ସରପଞ୍ଚ ତାତୁରା ପ୍ରଧାନ, ସମିତିସଭ୍ୟ ଶ୍ରୀକାନ୍ତ ପ୍ରଧାନ ପ୍ରମୁଖ କହିଛନ୍ତି।
