ମାଲକାନଗିରି,୧୭ା୧୦(ଡି.ଏନ୍.ଏ.): ପୋଲିସ ନକ୍ସଲଙ୍କ ମଧ୍ୟରେ ଗୁଳିବିନିମୟ ହୋଇଛି। ଏଥିରେ ଜଣେ ଏଏସ୍ଆଇ ଆହତ ହୋଇଛନ୍ତି।
ସୂଚନାନୁଯାୟୀ, ମାଲକାନଗିରି ଜିଲା ସୀମାନ୍ତ ଛତିଶଗଡ଼ ବିଜାପୁର ଜିଲାର ତେରମ ଥାନା ଅଞ୍ଚଳରେ ଯବାନମାନେ କମ୍ବିଂ ଅପରେଶନ ସାରି ବେସ୍ କ୍ୟାମ୍ପକୁ ଫେରୁଥିବା ସମୟରେ ପୂର୍ବରୁ ଛକି ବସିଥିବା ନକ୍ସଲମାନେ ଯବାନଙ୍କ ଉପରକୁ ପ୍ରଥମେ ଗୁଳିଚାଳନା କରିଥିଲେ। ପରେଯବାନ ମାନେ ମଧ୍ୟ ଏହାର ପାଲଟା ଜବାବ ଦେଇଥିଲେ। ଏଥିରେ ରାଜେଶ ସୂର୍ଯ୍ୟବଂଶୀ ନାମକ ଜଣେ ପୋଲିସ ଏଥଏସଆଇ ଆହତ ହୋଇଛନ୍ତି। ସାଥୀ ଯବାନମାନେ ତାଙ୍କୁ ବିଜାପୁର ଜିଲା ମୁଖ୍ୟ ଚିକିତ୍ସାଳୟ ଆଣି ଚିକିତ୍ସା କରିବା ପରେ ତାଙ୍କୁ ଉତ୍ତମ ଚିକିତ୍ସା ପାଇଁ ହେଲିକପ୍ଟର ଯୋଗେ ରାୟପୁର ସ୍ଥାନାନ୍ତର କରାଯାଇଛି। ଘଟଣାସ୍ଥଳକୁ କୋବ୍ରା ଓ ଏସ୍ଟିଏଫ୍ର ଯବାନମାନଙ୍କୁ ପଠାଯାଇଥିବା ନେଇ ବସ୍ତର ଆଇଜି ସୁନ୍ଦର ରାଜ ପି ସୂଚନା ଦେଇଛନ୍ତି। ଅପରପକ୍ଷରେ ଛତିଶଗଡ଼ର ନାରାୟଣପୁର ଓ ଭାନୁପ୍ରତାପପୁର ଜିଲାରେ ମଧ୍ୟ ମାଓବାଦୀମାନେ ଉନ୍ନୟନମୂଳକ କାର୍ଯ୍ୟକୁ ବିରୋଧ କରି ଅନେକ ଗାଡ଼ି ମୋଟର ଜାଳିଥିବା ନେଇ ଜଣାପଡ଼ିଛି।
