ଦାରିଙ୍ଗବାଡି, ୨୩।୬ (ଅରୁଣ ସାହୁ):କନ୍ଧମାଳ ଜିଲା ଦାରିଙ୍ଗବାଡି ଥାନା ପୋଲିସ ପକ୍ଷରୁ ବସଷ୍ଟାଣ୍ଡ ଅଞ୍ଚଳରେ ଚଢ଼ାଉ କରି ବିପୁଳ ପରିମାଣର ମହୁଲ ପୋଚ ଜବତ ଓ ତାକୁ ନଷ୍ଟ କରିବା ସହ ୫୫ ଲିଟର ଦେଶୀମଦକୁ ପୋଲିସ ଜବତ କରିଛି। ଏଥିସହ ଗୋଟିଏ ବାଇକ ଏବଂ ଗୋଟିଏ ସ୍କୁଟର ସହ ୨ଟି ମୋବାଇଲକୁ ପୋଲିସ ଜବତ କରିଛି। ଚୋରାମଦ କାରବାର କରୁଥିବା ବ୍ୟବସାୟୀଙ୍କ ଠାରୁ ଜବତ କରାଯାଇଥିବା ଦାରିଙ୍ଗବାଡି ଆଇଆଇସି ସଂଗ୍ରାମ କେଶରୀ ଜେନା ସୂଚନା ଦେଇଛନ୍ତି। ଏନେଇ ୨ଟି ମାମଲା (୧୬୦/୨୬ ଓ ୧୬୧/୨୬) ରୁଜୁ କରାଯାଇଛି। ଏହାସହ ନୋଟିସ କରି ୨ ବ୍ୟବସାୟୀଙ୍କୁ ଛାଡିଦିଆଯାଇଛି।
ପ୍ରକାଶ ଯେ, ଦାରିଙ୍ଗବାଡି ଏକ ଜନବହୁଳ ଅଞ୍ଚଳ ହୋଇଥିବାବେଳେ ଉକ୍ତ ଅଞ୍ଚଳରୁ ଫୁଲବାଣୀ, ବ୍ରାହ୍ମଣୀଗାଁ, ବ୍ରହ୍ମପୁର ଆଦି ଅଞ୍ଚଳକୁ ଗାଡିମୋଟର ଚଳାଚଳ କରୁଛି। ବିଭିନ୍ନ ଅଞ୍ଚଳରୁ ଉକ୍ତ ସ୍ଥାନକୁ ଲୋକଙ୍କ ଚଳାଚଳ ରହିଥିବା ବେଳେ ମଦ୍ୟପମାନଙ୍କ ମଧ୍ୟ ଉକ୍ତ ଅଞ୍ଚଳରେ ଭିଡ଼ ରହୁଛି। ଏହାର ଫାଇଦା ନେଇ ଉକ୍ତ ଅଞ୍ଚଳରେ ରହୁଥିବା ଜଣେ ମହିଳା ସଞ୍ଜୁ ନାୟକ ଏବଂ ସୁନାମ ନାୟକ ଭିନ୍ନ ଭିନ୍ନ ସ୍ଥାନରେ ଅବୈଧ ଭାବେ ଚୋରାମଦ କାରବାର ଚଳାଇ ଆସୁଥିବା କୌଣସି ସୂତ୍ରରୁ ପୋଲିସ ଖବର ପାଇ ସୋମବାର ବିଳମ୍ବିତ ସନ୍ଧ୍ୟାରେ ଚଢ଼ାଉ କରିଥିବା ପୋଲିସ କହିଛି।