ଖଣ୍ଡପଡ଼ା,୨୭ା୫(ସ୍ବ.ପ୍ର):ଜଗନ୍ନାଥ ସଂସ୍କୃତିର ଆଦି ପୀଠ ଭାବେ ପରିଚିତ କଣ୍ଟିଲୋର ଶ୍ରୀନୀଳମାଧବ ଜୀଉ ମନ୍ଦିରରେ ଜଣେ ବଭ୍ଗୀୟ ପର୍ଯ୍ୟଟକଙ୍କୁ ଅସଦାଚରଣ କରାଯାଇଥିଲା। ଏହି ଘଟଣାକୁ ୧୮ ଦିନ ବତିଥିବା ବେଳେ ଖଣ୍ଡପଡ଼ା ଥାନା ପୋଲିସ ଅଭିଯୁକ୍ତଙ୍କୁ ଧରିବାରେ ବିଫଳ ହୋଇଛି। ଏହାକୁ ନେଇ ଜୀଉଙ୍କ ସମସ୍ତ ପୂଜାନୀତିରେ ପୂଜକ ସମାଜ ଚଳିତମାସ ୨୯ ତାରିଖଠାରୁ ଅନିର୍ଦ୍ଦିଷ୍ଟ ସମୟ ପର୍ଯ୍ୟନ୍ତ ଅସହଯାଗ କରିବେ ବୋଲି ନୀଳମାଧବ ପୂଜକ ସମାଜ ପକ୍ଷରୁ ନିଷ୍ପତ୍ତି ଗ୍ରହଣ କରାଯାଇଛି। ଏ ସମ୍ପର୍କରେ ପୂଜକ ସମାଜର ସଭାପତି ସଚ୍ଚିଦାନନ୍ଦ ମିଶ୍ର ଓ ସମ୍ପାଦକ ନୀଳମାଧବ ମିଶ୍ର ଲିଖିତ ଭାବେ ସ୍ଥାନୀୟ ଗଣମାଧ୍ୟମକୁ ଜଣାଇଛନ୍ତି।
ସୂଚନାଯୋଗ୍ୟ, ଗତ ୮ ତାରିଖରେ ଜନୈକା ବଙ୍ଗୀୟ ମହିଳା ପର୍ଯ୍ୟଟକ ତାଙ୍କ ପରିବାର ସହ ଶ୍ରୀନୀଳମାଧବ ଜୀଉଙ୍କ ଦର୍ଶନରେ ଆସିଥିଲେ। ପରେ ପରେ ସମ୍ପୃକ୍ତ ମହିଳା ଜଣକ ଶୌଚ ଉଦ୍ଦେଶ୍ୟରେ ମନ୍ଦିର ଉତ୍ତର ପାର୍ଶ୍ୱ ମହାନଦୀ ନିକଟ ଏକ ଗଛମୂଳକୁ ଯାଇଥିଲେ। ଏହି ସମୟରେ ତାଙ୍କୁ କେହି ଜଣେ ଅସାମାଜିକ ବ୍ୟକ୍ତି ଅସଦାଚରଣ କରିଥିବା ପୋଲିସକୁ ଅଭିଯୋଗ କରିଥିଲେ। କଣ୍ଟିଲୋ ଫାଣ୍ଡି ଅଧିକାରୀ ଘଟଣାର ଅନୁସନ୍ଧାନ କରିଥିବା ବେଳେ ପ୍ରକୃତ ଅଭିଯୁକ୍ତଙ୍କୁ ଠାବ କରିବାରେ ବିଫଳ ହୋଇଛି। ଘଟଣାର ପରଦିନ ଅର୍ଥାତ୍ ୯ ତାରିଖରେ ପୂଜକ ସମାଜର କର୍ମକର୍ତ୍ତାମାନେ ଏ ସମ୍ପର୍କରେ ନୟାଗଡ଼ ଏସ୍ପିଙ୍କୁ ଅବଗତ କରାଇଥିଲେ। ପରବର୍ତୀ ସମୟରେ ଖଣ୍ଡପଡ଼ା ବ୍ଲକ ପରିସରରେ ୧୩ ତାରିଖରେ ଆୟୋଜିତ ଜିଲାପାଳଙ୍କ ମିଳିତ ଜନ ଶୁଣାଣି ଶିବିରରେ ସାକ୍ଷାତ କରି କର୍ମକର୍ତ୍ତାମାନେ ବଙ୍ଗୀୟ ମହିଳାଙ୍କୁ ଅସଦାଚରଣ ଘଟଣା ସମ୍ପର୍କରେ ଅବଗତ କରାଇ ଅଭିଯୁକ୍ତଙ୍କୁ ଚିହ୍ନଟ କରି ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି କରିଥିଲେ। ଇତି ମଧ୍ୟରେ କେତେଗୋଟି ଗଣମାଧ୍ୟମରେ ନୀଳମାଧବ ସେବାସୀମାନଙ୍କୁ ଏଥି ନିମନ୍ତେ ବଦନାମ କରାଯାଇ ଖବର ପ୍ରକାଶ ହେବାରୁ ସେମାନଙ୍କ ମଧ୍ୟରେ ଅସନ୍ତୋଷ ସୃଷ୍ଟି ହୋଇଥିବା କର୍ମକର୍ତ୍ତାମାନେ ଅଭିଯୋଗ ଉଠାଇଛନ୍ତି। ତେବେ ଦୀର୍ଘ ୧୮ ଦିନ ଅତିବାହିତ ହୋଇଯାଇଥିଲେ ମଧ୍ୟ ଘଟଣାର ପର୍ଦ୍ଦାଫାସ କରିବାରେ ପୋଲିସ ପ୍ରଶାସନ ବିଫଳ ହୋଇଥିବା ଅଭିଯୋଗ କରାଯାଇଛି। ଏ ସମ୍ପର୍କରେ ପୂଜକ ସମାଜ ପକ୍ଷରୁ ଗତ ୧୯ ତାରିଖରେ ରେଜେଷ୍ଟ୍ରି ଚିଠି ମାଧ୍ୟମରେ ରାଜ୍ୟ ଦେବୋତ୍ତର କମିଶନର, ଜିଲାପାଳ, ଏସ୍ପି, ଖଣ୍ଡପଡ଼ା ତହସିଲଦାର ତଥା ଦେବୋତ୍ତର କାର୍ଯ୍ୟ ନିର୍ବାହୀ ଅଧିକାରୀ ଓ ସ୍ଥାନୀୟ ବିଧାୟକଙ୍କୁ ଅବଗତ କରାଯାଇଥିଲେ। ହେଲେ କୌଣସି ସୁଫଳ ମିଳି ପାରିଲାନାହିଁ। ଆସନ୍ତା ୨୯ ତାରିଖ ମଧ୍ୟରେ ଏ ଦିଗରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରା ନ ଗଲେ ଠାକୁରଙ୍କ ସମସ୍ତ ପୂଜା, ନୀତି କାନ୍ତି ଓ ଯାତ୍ରୀ ଦର୍ଶନରେ ଅସହଯୋଗ ସହ ବନ୍ଦ କରାଯିବ ବୋଲି ପୂଜକ ସମାଜର ସମ୍ପାଦକ ନୀଳମାଧବ ମିଶ୍ର ଜଣାଇଛନ୍ତି। ଏହାଛଡ଼ା ଏହି କ୍ରମରେ ଯଦି ଆସନ୍ତା ୩୧ ତାରିଖରେ ଅନୁଷ୍ଠିତ ହେବାକୁ ଥିବା ରୁକୁଣୀ ବିବାହ କାର୍ଯ୍ୟକ୍ରମ ବନ୍ଦ ରୁହେ ତେବେ ଆସନ୍ତା ୪ ତାରିଖରେ ହେବାକୁ ଥିବା ଦେବସ୍ନାନ ନୀତିକୁ ବନ୍ଦ କରାଯିବ ବୋଲି ପୂଜକ ସମାଜ ପକ୍ଷରୁ ଚେତାବନୀ ଦିଆଯାଇଛି।
