ଭଞ୍ଜନଗର,୨୩।୬(ବାବୁଲା ପ୍ରଧାନ):ଗଞ୍ଜାମ ଜିଲା ଭଞ୍ଜନଗର ପୋଲିସ ସୋମବାର ଗଞ୍ଜେଇ ଚୋରା ଚାଲାଣ ଅଭିଯୋଗରେ ୩ ଜଣଙ୍କୁ ଗିରଫ କରିଛି। ଏଥିସହ ସେମାନଙ୍କ ଠାରୁ ୧୦୨ କେଜି ଗଞ୍ଜେଇ, ୨୨ ଶହ ଟଙ୍କା ଓ ଗୋଟିଏ ଟୟୋଟୋ ଇନୋଭା କ୍ରିଷ୍ଟା ଗାଡି ଜବତ କରାଯାଇଛି । ଗିରଫ ୩ ଜଣ ହେଲେ ପିତବାସ ମହାନ୍ତି, ଲକ୍ଷ୍ମଣ ଦାସ ଓ ଧ୍ରୁବ ଦଳ ମଲ୍ଲିକ। ଏନେଇ ଭଞ୍ଜନଗର ଥାନାରେ ୬୧୪/୨୬ ରେ ଏକ ମାମଲା ରୁଜୁ ହୋଇଛି। ଗିରଫ ଅଭିଯୁକ୍ତମାନଙ୍କୁ ମଙ୍ଗଳବାର କୋର୍ଟ ଚାଲାଣ କରାଯାଇଛି ବୋଲି ଏଏସପି ରଞ୍ଜନ କୁମାର ଦେ ଏକ ଖବରଦାତା ସମ୍ମିଳନୀରେ ପ୍ରକାଶ କରିଛନ୍ତି॥ ଖବରଦାତା ସମ୍ମିଳନୀରେ ଆଇଆଇସି ଜୀବନାନନ୍ଦ ଜେନା ପ୍ରମୁଖ ଉପସ୍ଥିତ ଥିଲେ।
ଘଟଣାରୁ ପ୍ରକାଶ ଯେ, ଭଞ୍ଜନଗର ଥାନା ଏସଆଇ ଲକ୍ଷ୍ମୀଧର ମହାନ୍ତି ସୋମବାର ଦୁର୍ଗାପ୍ରସାଦ ରାସ୍ତାରେ ଡ୍ୟୁଟି କରୁଥିଲେ। ଏହି ସମୟରେ କନ୍ଧମାଳ ଜିଲା ଆଡୁ ଉକ୍ତ ୩ ଅଭିଯୁକ୍ତ ଟୟୋଟୋ ଇନୋଭା କ୍ରିଷ୍ଟା ଗାଡିରେ ବ୍ରହ୍ମପୁର ଅଭିମୁଖେ ଯାଉଥିବା ଅଭିଯୁକ୍ତମାନେ ପୋଲିସ ଗାଡ଼ିକୁ ଦେଖି ଦ୍ରୁତ ଗତିରେ ଚାଲି ଯାଉଥିଲେ। ପୋଲିସ ସନ୍ଦେହ କରି ଗାଡିଟିକୁ ପିଛା କରି ଦୁର୍ଗା ପ୍ରସାଦ ନିକଟରେ ଅଟକାଇବାରେ ସକ୍ଷମ ହୋଇଥିଲେ। ଏହାପରେ ଯାଞ୍ଚ କରିବାରୁ ଗାଡ଼ିରୁ ଗଞ୍ଜେଇ ବାହାରିଥିଲା।