ନୂଆଦିଲ୍ଲୀ,୧୭ ।୯: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ୧୭ ସେପ୍ଟେମ୍ବରରେ ତାଙ୍କର ୭୨ତମ ଜନ୍ମଦିନ ପାଳନ କରୁଛନ୍ତି । ଏହି ଅବସରରେ ସାରା ଦେଶରେ ବିଭିନ୍ନ କାର୍ଯ୍ୟକ୍ରମମାନ ଆୟୋଜନ କରାଯାଇଛି । ଭାରତୀୟ ଜନତା ପାର୍ଟି(ଭାଜପା) ୨୦୧୪ରୁ ପ୍ରତିବର୍ଷ ମୋଦିଙ୍କ ଜନ୍ମଦିନକୁ ‘ସେବା ଦିବସ’ ଭାବେ ପାଳନ କରି ଆସୁଛି । ଏହାସହ ଏହିଦିନ ସେବା ସମ୍ପର୍କିତ କାର୍ଯ୍ୟକ୍ରମର ଆୟୋଜନ ମଧ୍ୟ କରାଯାଉଛି । ଚଳିତ ବର୍ଷ ମୋଦି ନାମିବିୟାରୁ ଆସିଥିବା ୮ ଚିତାବାଘଙ୍କୁ ମଧ୍ୟପ୍ରଦେଶର ରାଷ୍ଟ୍ରୀୟ ଉଦ୍ୟାନରେ ଛାଡିବେ । ଅନ୍ୟପଟେ ଶନିବାର ମୋଦିଙ୍କୁ ମିଳିଥିବା ଉପହାରର ଇ ନିଲାମି ଆରମ୍ଭ କରାଯିବ । ଏଥିରୁ ଯେଉଁ ଅର୍ଥ ମିଳିବ ତାକୁ ସ୍ୱଚ୍ଛ ଗଙ୍ଗା ଅଭିଯାନ ‘ନମାମି ଗଙ୍ଗେ’ ପାଇଁ ଖର୍ଚ୍ଚ କରାଯିବ ବୋଲି ଜଣାପଡିଛି ।
