ନୂଆଦିଲ୍ଲୀ,୧୬।୯: ‘ସେବା ତୀର୍ଥ’ରେ ବିଶ୍ୱର ପ୍ରମୁଖ ସେମିକଣ୍ଡକ୍ଟର କମ୍ପାନୀଗୁଡ଼ିକର CEOଙ୍କ ସହ ଏକ ଗୁରୁତ୍ୱପୂର୍ଣ୍ଣ ବୈଠକ କରିଥିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। ଦେଶର ବୈଷୟିକ ଭବିଷ୍ୟତ ଗଠନ ପାଇଁ ସରକାର ଓ ସେମିକଣ୍ଡକ୍ଟର ଶିଳ୍ପ ମଧ୍ୟରେ ଅଧିକ ମଜବୁତ ସହଯୋଗର ଆବଶ୍ୟକତା ଉପରେ ସେ ଗୁରୁତ୍ୱ ଦେଇଛନ୍ତି ।
ପ୍ରଧାନମନ୍ତ୍ରୀ କହିଛନ୍ତି, ଆର୍ଟିଫିସିଆଲ୍ ଇଣ୍ଟେଲିଜେନ୍ସ (AI) ଓ କ୍ୱାଣ୍ଟମ୍ କମ୍ପ୍ୟୁଟିଂ ଭଳି ଉଦୀୟମାନ ପ୍ରଯୁକ୍ତି କ୍ଷେତ୍ରରେ ଭାରତକୁ ବିଶ୍ୱର ପ୍ରାରମ୍ଭିକ ଅଗ୍ରଣୀ ଦେଶଗୁଡ଼ିକ ମଧ୍ୟରେ ସାମିଲ ହେବାର ଲକ୍ଷ୍ୟ ରଖିବା ଉଚିତ । ଏଥିପାଇଁ ଦେଶର ଯୁବ ପ୍ରତିଭା ଓ ବିଶ୍ୱସ୍ତରୀୟ କମ୍ପାନୀଗୁଡ଼ିକର ଅଭିଜ୍ଞତା ଏକାଠି ହେଲେ ବଡ଼ ସମ୍ଭାବନା ସୃଷ୍ଟି ହୋଇପାରିବ ବୋଲି ସେ କହିଛନ୍ତି।ପ୍ରଧାନମନ୍ତ୍ରୀ ୧ କୋଟି ଲୋକଙ୍କୁ AIରେ ପ୍ରଶିକ୍ଷଣ ଦେବା ପାଇଁ ଜାତୀୟ ଲକ୍ଷ୍ୟ ସମ୍ପର୍କରେ ମଧ୍ୟ ଉଲ୍ଲେଖ କରିଥିଲେ । ଭାରତରେ ପ୍ରତିଭା, ବୈଷୟିକ ଜ୍ଞାନ ଓ ଭିତ୍ତିଭୂମିର ମଜବୁତ ଆଧାର ରହିଛି । ଏବେ ଶିଳ୍ପ ଜଗତକୁ ଦକ୍ଷତା ବିକାଶ, ନବସୃଜନ ଓ ଅତ୍ୟାଧୁନିକ ପ୍ରଯୁକ୍ତିରେ ନିଜର ଭାଗିଦାରି ଆହୁରି ବଢ଼ାଇବା ଆବଶ୍ୟକ ବୋଲି ସେ କହିଛନ୍ତି ।
ବୈଠକରେ ଭାରତର ସେମିକଣ୍ଡକ୍ଟର କ୍ଷେତ୍ରରେ ହୋଇଥିବା ଅଗ୍ରଗତି ଉପରେ ମଧ୍ୟ ଆଲୋଚନା ହୋଇଥିଲା। ଏହି ଇକୋସିଷ୍ଟମ୍ ଏବେ ପ୍ରାରମ୍ଭିକ ପ୍ରୟାସର ପର୍ଯ୍ୟାୟରୁ ବାହାରି ବୃହତ୍ ପରିମାଣ ଓ ନୂଆ ସୁଯୋଗର ଦିଗରେ ଆଗକୁ ବଢ଼ୁଛି ବୋଲି ମୋଦି କହିଛନ୍ତି । ପ୍ରଯୁକ୍ତି ଓ ବଜାରର ଆବଶ୍ୟକତା ଅନୁଯାୟୀ ସରକାର ନୀତିଗୁଡ଼ିକୁ ନିରନ୍ତର ବିକଶିତ କରିବାକୁ ପ୍ରତିବଦ୍ଧ ବୋଲି ସେ ଶିଳ୍ପ ଜଗତକୁ ଭରସା ଦେଇଛନ୍ତି। ଏହାସହ ନୀତିଗତ ଓ ପ୍ରଶାସନିକ ସ୍ତରରେ ଆବଶ୍ୟକ ପରାମର୍ଶ ଦେବାକୁ କମ୍ପାନୀଗୁଡ଼ିକୁ ଆହ୍ୱାନ କରିବା ସହ ପରବର୍ତ୍ତୀ ପର୍ଯ୍ୟାୟର ବିକାଶରେ ସକ୍ରିୟ ଭାବେ ସାମିଲ ହେବାକୁ କହିଛନ୍ତି।
ବୈଠକରେ ଯୋଗଦେଇଥିବା ବିଶ୍ୱସ୍ତରୀୟ କମ୍ପାନୀଗୁଡ଼ିକର CEOମାନେ ଭାରତ ସରକାରଙ୍କ ନିର୍ମାଣ, ଡିଜାଇନ୍, ଭିତ୍ତିଭୂମି ଓ ପ୍ରତିଭା ବିକାଶ ସମ୍ପର୍କିତ ପଦକ୍ଷେପକୁ ପ୍ରଶଂସା କରିଥିଲେ। ଇଣ୍ଡିଆ ସେମିକଣ୍ଡକ୍ଟର ମିଶନ୍ (ISM) 2.0 ଅଧୀନରେ ଉଦୀୟମାନ ସୁଯୋଗ ଏବଂ ଭାରତକୁ ବିଶ୍ୱର ଏକ ପ୍ରମୁଖ ସେମିକଣ୍ଡକ୍ଟର ହବ୍ରେ ପରିଣତ କରିବା ଦିଗରେ ନିଜର ପ୍ରତିବଦ୍ଧତା ଶିଳ୍ପ ଜଗତ ପୁଣିଥରେ ଦୋହରାଇଛି। ବୈଠକରେ ମାଇକ୍ରୋନ୍, ଇଣ୍ଟେଲ୍, AMD, ଟାଟା ଇଲେକ୍ଟ୍ରୋନିକ୍ସ, ଫକ୍ସକନ୍, ASML, ଟୋକିଓ ଇଲେକ୍ଟ୍ରନ୍, NXP, ଇନ୍ଫିନିଅନ୍, ଆପ୍ଲାଏଡ୍ ମ୍ୟାଟେରିଆଲ୍ସ ଓ IBM ରିସର୍ଚ୍ଚ ସମେତ ବିଶ୍ୱର ପ୍ରମୁଖ ପ୍ରଯୁକ୍ତି କମ୍ପାନୀର CEO ଓ ପ୍ରତିନିଧିମାନେ ଉପସ୍ଥିତ ଥିଲେ।