ନୂଆଦିଲ୍ଲୀ,୧୭।୧୧: ଜି-୨୦ ଶିଖର ସମ୍ମିଳନୀକୁ ଆସିଥିବା ବିଶ୍ୱର ବରିଷ୍ଠ ନେତାମାନଙ୍କୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଭାରତୀୟ କଳା ଓ ସଂସ୍କୃତି ସହ ଜଡିତ ଉପହାର ଦେଇଛନ୍ତି। ସମସ୍ତ ଉପହାର ଗୁଜରାଟ ଏବଂ ହିମାଚଳ ପ୍ରଦେଶର ପରିଚୟ ସହିତ ଜଡିତ।
ଇଣ୍ଡୋନେସିଆର ବାଲି ଠାରେ ଅନୁଷ୍ଠିତ ଜି-୨୦ ଶିଖର ସମ୍ମିଳନୀରେ ପ୍ରଧାନମନ୍ତ୍ରୀ ମୋଦି ଆମେରିକାର ରାଷ୍ଟ୍ରପତି ଜୋ ବାଇଡେନଙ୍କୁ ପ୍ରସିଦ୍ଧ କାଙ୍ଗରା ମିନିଏଚର ପେଣ୍ଟିଂ ପ୍ରଦାନ କରିଥିଲେ। ଏହି ପେଣ୍ଟିଂ ଗୁଡ଼ିକ ହିମାଚଳର ମୁଖ୍ୟ କାରିଗରମାନଙ୍କ ଦ୍ୱାରା ପ୍ରାକୃତିକ ରଙ୍ଗ ସହିତ ପ୍ରସ୍ତୁତ। ସାଧାରଣତଃ ଏହା ପାହାଡି ପ୍ରାକୃତିକ ପୃଷ୍ଠଭୂମିରେ ପ୍ରେମକୁ ଚିତ୍ରଣ କରିଥାଏ। ପ୍ରଧାନମନ୍ତ୍ରୀ ବାଇଡେନଙ୍କୁ ଦିଆଯାଇଥିବା ପେଣ୍ଟିଂରେ କୃଷ୍ଣ, ରାଧା, ଗାଈ, ବାଛୁରୀ ଗଛ, ମେଘ, ପକ୍ଷୀ ଏବଂ ଘାସ ପ୍ରଦର୍ଶିତ ହୋଇଛି।
ପ୍ରଧାନମନ୍ତ୍ରୀ ମୋଦି ବ୍ରିଟେନର ନବ ନିର୍ବାଚିତ ପ୍ରଧାନମନ୍ତ୍ରୀ ଋଷି ସୁନକଙ୍କୁ ଅହମ୍ମଦାବାଦର ‘ମାତା ନି ପାଚେଡି’ ଉପହାର ଦେଇଛନ୍ତି। ‘ମାତା ନି ପାଚେଡି’ର କଳା ୩୦୦୦ ବର୍ଷରୁ ଅଧିକ ପୁରୁଣା ବୋଲି କୁହାଯାଏ। ଏହି କଳାରେ ଦେବୀଙ୍କର ବିଭିନ୍ନ ରୂପ ଏବଂ ତାଙ୍କ ସହ ଜଡିତ କିମ୍ବଦନ୍ତୀ କପଡା ଉପରେ ଚିତ୍ରିତ ହୋଇଛି।
ପ୍ରଧାନମନ୍ତ୍ରୀ ମୋଦି ଅଷ୍ଟ୍ରେଲୀୟ ପ୍ରଧାନମନ୍ତ୍ରୀ ଆନ୍ଥୋନୀ ଆଲବାନେସଙ୍କୁ ଉଦୟପୁରର ପ୍ରସିଦ୍ଧ ‘ପିଥୋରା’ ଉପହାର ଦେଇଛନ୍ତି। ଉଦୟପୁରର ରାଠଓ୍ବା କାରିଗରମାନଙ୍କ ଦ୍ୱାରା ନିର୍ମିତ ‘ପିଥୋରା’ରେ ଆଦିବାସୀ ଲୋକ କଳା ପ୍ରଦର୍ଶିତ ହୋଇଛି।
