ଦାରିଙ୍ଗବାଡି,୧୭।୮(ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡି ଥାନା ବାଡାବାଙ୍ଗା ପଞ୍ଚାୟତ ସିକନବାଡି ଗାଁରେ ଏକ ହତ୍ୟା ଘଟଣାର ପୋଲିସ ଖୁଲାସା କରିଛି। ହତ୍ୟାର ଶିକାର ହୋଇଛନ୍ତି ଉକ୍ତ ଗ୍ରାମର ମିଶ୍ର ପ୍ରଧାନ (୪୫)। ହତ୍ୟାକାରୀ ମୃତ ମିଶ୍ରଙ୍କ ୨ ପୁତୁରା ବୋଲି ପୋଲିସ କହିଛି। ପୋଲିସ ୨ ଅଭିଯୁକ୍ତଙ୍କୁ ରବିବାର ସନ୍ଧ୍ୟାରେ ଗିରଫ କରିଛି। ଗିରଫ ଅଭିଯୁକ୍ତ ହେଲେ ସେହି ଗ୍ରାମର ସଞ୍ଜୟ ଦିଗାଲ ଏବଂ ସିଦ୍ଧାନ୍ତ ଦିଗାଲ ବୋଲି ଆଇଆଇସି ସଂଗ୍ରାମ କେଶରୀ ଜେନା କହିଛନ୍ତି।
ତେବେ ହତ୍ୟାର କାରଣ ଖୋଜୁଛି ପୋଲିସ। ଏହା ଜମିବାଡ଼ି ବିବାଦରୁ ହତ୍ୟାକାଣ୍ଡ କୁହାଯାଉଥିବାବେଳେ ଏହା ଗୁଣିଗାରେଡି ସନ୍ଦେହରେ ମଧ୍ୟ ହୋଇଥିବା ଚର୍ଚ୍ଚାକୁ ନେଇ ପୋଲିସ ତଦନ୍ତକୁ ଅଧିକ କ୍ରିୟାଶୀଳ କରିଛି। ତେବେ ଏଥିରେ ୨ ଅଭିଯୁକ୍ତ ନା ଆହୁରି କିଏ ସାମିଲ ରହିଛି। ସେନେଇ ମଧ୍ୟ ପୋଲିସ ଖୋଳତାଡ଼ କରୁଥିବା ଆଇଆଇସି କହିଛନ୍ତି। ସେ ଆହୁରି କହିଛନ୍ତି ଯେ, ୨ ଗିରଫ ଅଭିଯୁକ୍ତ ହିଁ ଏହି ହତ୍ୟା କରିଥିବା ଓ ଏଥିରେ ଅନ୍ୟ କେହି ସାମିଲ ନ ଥିବା ନେଇ ପୋଲିସ ଆଗରେ ଅଭିଯୁକ୍ତ ମାନେ ମାନିଥିବା ପୋଲିସ କହିଛି। ତେବେ ଘଟଣାକୁ ପୋଲିସ ଅଧିକା ଗୁରୁତ୍ୱ ଦେବା ସହ ମୃତକଙ୍କ ସ୍ତ୍ରୀଙ୍କୁ ପଚରାଉଚରା କରିବା ପରେ ଘଟଣାର ସତ୍ୟାସତ୍ୟ ଜଣାପଡିବ ବୋଲି ଆଇଆଇସି କହିଛନ୍ତି।
ପୋଲିସର ପ୍ରାଥମିକ ତଦନ୍ତରୁ ଜଣାପଡିଛି ଯେ, ଗୋଟିଏ ଜମିକୁ ନେଇ ଉଭୟଙ୍କ ମଧ୍ୟରେ କିଛି ଦିନ ହେଲା ପ୍ରଥମେ ବିବାଦ ଓ ପରେ ବାରମ୍ବାର ଗଣ୍ଡଗୋଳ ହୋଇଆସୁଥିଲା। ଏଥିରେ ମୃତ ମିଶ୍ର ପ୍ରଧାନ ତାଙ୍କ ୨ ପୁତୁରାଙ୍କୁ କୁଆଡେ ଭୟଭୀତ ଓ ଚେତାବନୀ ଦେଇଆସୁଥିଲେ। ଫଳରେ ୨ ପୁତୁରା ତାଙ୍କ ପିଉସାଙ୍କୁ ରାସ୍ତାରୁ ହଟାଇବା ପାଇଁ ଯୋଜନା କରି ଗୁରୁବାର ତାଙ୍କୁ ଗାଁ ନିକଟ ଜଙ୍ଗଲରେ ପିଟିପିଟି ହତ୍ୟା କରିବା ସହ ମୃତଦେହକୁ ପୋଡି ପ୍ରମାଣ ନଷ୍ଟ କରିଦେଇଥିଲେ। ଘଟଣା ସମ୍ପର୍କରେ ପୋଲିସକୁ ଶନିବାର କୌଣସି ସୂତ୍ରରୁ ଖବର ମିଳିବା ପରେ ପୋଲିସ ଉକ୍ତ ଗ୍ରାମରେ ପହଞ୍ଚି ତଦନ୍ତ ଆରମ୍ଭ କରିଥିଲା। ସନ୍ଦେହରେ ପ୍ରଥମେ ୨ ଜଣଙ୍କୁ ଥାନାକୁ ଆଣି ପଚରାଉଚରା କରିଥିଲା।
ରବିବାର ଅଟକ ଥିବା ୨ ପୁତୁରା ସମସ୍ତ କଥା ମାନିବା ସହ ଯେଉଁ ଜଙ୍ଗଲରେ ହତ୍ୟା ପରେ ମୃତଦେହ ପଡିଥିଲେ ଉକ୍ତ ସ୍ଥାନକୁ ପୋଲିସକୁ ନେଇ ଦେଖାଇଥିଲେ। ପୋଲିସ ଓ ସାଇଣ୍ଟିଫିକ ଟିମ ଏବଂ ମାଜିଷ୍ଟ୍ରେଟ ଭାବେ ଅତିରିକ୍ତ ତହସିଲଦାର ଦୁଃଶାସନ ସ୍ବାଇଁ, ରାଜସ୍ବ ନିରୀକ୍ଷକ ଚାନ୍ଦିନୀ ଦିଗାଲ ପ୍ରମୁଖ ଘଟଣାସ୍ଥଳରେ ପହଞ୍ଚିଥିଲେ ଓ ପୋଡା ଅଂଶକୁ ପୋଲିସ ଜବତ କରିବା ସହ ମାମଲାରେ ଦୁଇଜଣଙ୍କୁ ଗିରଫ କରାଯାଇଥିବା ଆଇଆଇସି ସଂଗ୍ରାମ କେଶରୀ ଜେନା କହିଛନ୍ତି। ଏନେଇ ଥାନାରେ ମାମଲା (୨୧୨/୨୬)ରୁଜୁ କରି ଅଧିକା ତଦନ୍ତ ଚାଲିଥିବା ପୋଲିସ କହିଛି।