ନୂଆଦିଲ୍ଲୀ,୨୦।୯: ଆଗକୁ ଦୁର୍ଗାପୂଜା। ଏହା ପୂର୍ବରୁ ନବରାତ୍ରୀରେ କେନ୍ଦ୍ର ସରକାର ପିଏଫ୍ ଆକାଉଣ୍ଟଧାରୀଙ୍କୁ ଭେଟି ଦେବାକୁ ଯୋଜନା କରୁଛନ୍ତି। ପିଏଫ୍ ଖାତାରେ ଥିବା ଜମା ରାଶି ଉପରେ ୮.୧ ପ୍ରତିଶତ ସୁଧ ମିଳିପାରେ। ଇପିଏଫ୍ଓ ପକ୍ଷରୁ ଏହି ମାମଲାରେ ଆଧିକାରୀକ ଘୋଷଣା ହୋଇ ନ ଥିଲେ ହେଁ ପୂଜା ପୂର୍ବରୁ ସରକାରଙ୍କ ପକ୍ଷରୁ ଏହି ଟଙ୍କା ଜମା କରାଯିବ ବୋଲି କୁହାଯାଉଛି।
୨୦୨୧-୨୨ ଆର୍ଥିକ ବର୍ଷ ଲାଗି ଇପିଏଫ୍ ଉପରେ ୮.୧% ସୁଧ ମିଳିବ। ଏହି ହିସାବରେ ଖାତାରେ ଥିବା ଅର୍ଥରାଶି ଉପରେ କେତେ ଟଙ୍କା ମିଳିବ ତାହା ନିର୍ଭର କରିବ। ଯଦି ଖାତାରେ ଏକ ଲକ୍ଷ ଟଙ୍କା ଅଛି ତେବେ ବାର୍ଷିକ ସୁଧ ହିସାବରେ ୮,୧୦୦ ମିଳିବ। ସେହିଭଳି ଯଦି ଖାତାରେ ୧୦ ଲକ୍ଷ ଟଙ୍କା ଅଛି ତେବେ ସୁଧ ହିସାବରେ ୮୧,୦୦୦ ଟଙ୍କା ଖାତାକୁ ଟ୍ରାନ୍ସଫର ହେବ।
ଏସ୍ଏମ୍ଏସ୍ ଜରିଆରେ କିଭଳି ଜାଣିବେ ବାଲାନ୍ସ:
ଏସ୍ଏମ୍ଏସ୍ ମାଧ୍ୟମରେ ବାଲାନ୍ସ ଜାଣିବା ଲାଗି ୭୭୩୮୨୯୯୮୯୯କୁ ‘EPFOHO UAN ENG’ ଲେଖି ପଠାନ୍ତୁ। ଯଦି ହିନ୍ଦୀରେ ସୂଚନା ପାଇବାକୁ ଚାହୁଁଛନ୍ତି ତେବେ ENG ସ୍ଥାନରେ HIN ଲେଖନ୍ତୁ। ଏହି ଏସ୍ଏମ୍ଏସ୍କୁ ପଠାଇବା ପରେ ଜବାବରେ ବାଲାନ୍ସ ସମ୍ପର୍କିତ ସୂଚନା ମିଳିଯିବ।
ଓ୍ବେବ୍ସାଇଟ୍ ଜରିଆରେ: ଇପିଏଫ୍ଓ ଓ୍ବେବ୍ସାଇଟ୍କୁ ଯାଆନ୍ତୁ। ସେଠାରେ ‘Our services’କୁ କ୍ଲିକ୍ କରି ‘ଫର୍ ଏମ୍ଲୋଇଜ୍’କୁ ଚୟନ କରନ୍ତୁ। ଏହାପରେ ଖାତାଧାରୀ ମେମ୍ବର ପାସ୍ବୁକ୍ ଉପରେ କ୍ଲିକ୍ କରନ୍ତୁ। ଏବେ ୟୁଏଏନ୍ ନମ୍ବର ଏବଂ ପାସଓ୍ବାର୍ଡ ଦେଇ ଲଗ୍ ଇନ୍ କରନ୍ତୁ। ଏବେ ଆପଣ ପିଏଫ୍ ଆକାଉଣ୍ଟ ଚୟନ କରନ୍ତୁ। ଏହା ଖୋଲିବା ପରେ ଆପଣ ବାଲାନ୍ସ ଦେଖିପାରିବେ।
ଉମଙ୍ଗ ଆପ୍ ଜରିଆରେ: ଆପଣ ଉମଙ୍ଗ ଆପ୍ ଜରିଆରେ ପିଏଫ୍ ବାଲାନ୍ସ ଜାଣିପାରିବେ। ଏଥିଲାଗି ଆପଣଙ୍କ ପାଖରେ ଯଦି ସ୍ମାର୍ଟଫୋନ୍ ଅଛି ତେବେ ଉମଙ୍ଗ ଆପ୍ ଖୋଲି ଇପିଏଫ୍ଓ ଉପରେ କ୍ଲିକ୍ କରନ୍ତୁ। ଏବେ ଏମ୍ଲୋଇଜ୍ ସେଣ୍ଟ୍ରିକ ସରଭିସେସ୍ ଉପରେ କ୍ଲିକ୍ କରନ୍ତୁ। ଏହାପରେ ଭିଉ ପାସ୍ବୁକ୍ ଉପରେ କ୍ଲିକ୍ କରି ୟୁଏନ୍ ଏବଂ ପାସ୍ଓ୍ବାର୍ଡ ଦିଅନ୍ତୁ। ରେଜିଷ୍ଟର ଥିବା ମୋବାଇଲ ନମ୍ବରରେ ଆସିଥିବା ଓଟିପି ଆଧାରରେ ଆପଣ ବାଲାନ୍ସ ଦେଖିପାରିବେ।
