ଭାରତରେ ତୈଳ ବିପଣନ କମ୍ପାନୀ ପେଟ୍ରୋଲ ଓ ଡିଜେଲ ଦର ୧୦ ଦିନ ମଧ୍ୟରେ ୩ ଥର ବୃଦ୍ଧି କରିସାରିଲେଣି। ଶନିବାର ପେଟ୍ରୋଲ ଦର ଲିଟର ପିଚ୍ଛା ୮୭ ପଇସା ବଢ଼ିଥିବା ବେଳେ ଡିଜେଲ ୯୧ ପଇସା ବଢ଼ିଛି। ପ୍ରଥମେ ମେ’ ୧୫ ତାରିଖରେ ଉଭୟର ଦର ୩ ଟଙ୍କା ବୃଦ୍ଧି କରାଯିବା ପରେ ୧୯ ମେ’ରେ ପ୍ରତି ପେଟ୍ରୋଲ ଓ ଡିଜେଲ ଦର ୯୦ ପଇସା ବଢ଼ାଯାଇଥିଲା। ଅର୍ଥାତ୍ ଗତ ୧୦ ଦିନ ମଧ୍ୟରେ ଲିଟର ପିଛା ପେଟ୍ରୋଲ ଓ ଡିଜେଲ ପାଖାପାଖି ୫ ଟଙ୍କା ବଢ଼ିଲାଣି। ଏକାଥରକେ ଖାଉଟିଙ୍କ ଉପରେ ବୋଝ ନ ଲଦି ପର୍ଯ୍ୟାୟକ୍ରମେ ମୂଲ୍ୟବୃଦ୍ଧି କରାଯିବା ପେଟ୍ରୋଲିୟମ୍ କମ୍ପାନୀଙ୍କ ୨୦୨୨ ବର୍ଦ୍ଧିତ ନୀତିର ପୁନରାବୃତ୍ତି ବୋଲି କୁହାଯାଉଛି। ଥରକେ ଅଧିକ ମୂଲ୍ୟବୃଦ୍ଧି ପରିବହନ, ଲଜିଷ୍ଟିକ୍ ଏବଂ ସର୍ବୋପରି ମୁଦ୍ରାସ୍ଫୀତିକୁ ପ୍ରଭାବିତ କରିବା ଆଶଙ୍କା ଥିବାରୁ ଏହି ଢଞ୍ଚାକୁ ତୈଳ କମ୍ପାନୀ ଆପଣାଇଛନ୍ତି। ତେବେ ପର୍ଯ୍ୟାୟକ୍ରମେ ଦର ବଢ଼ୁଥିଲେ ମଧ୍ୟ ଏହା ଖାଉଟିଙ୍କ ଦୈନନ୍ଦିନ ଖର୍ଚ୍ଚକୁ ବଢ଼ାଇବାରେ ଲାଗିଛି।
ନୂଆଦିଲ୍ଲୀ, ୨୪।୫: ରାଷ୍ଟ୍ରାୟତ୍ତ ତୈଳ ବିପଣନକାରୀ କମ୍ପାନୀ(ଓଏମସି) ଶନିବାର ପେଟ୍ରୋଲ ଏବଂ ଡିଜେଲ ମୂଲ୍ୟରେ ପୁଣି ବୃଦ୍ଧି କରିଛନ୍ତି। ଲିଟର ପିଛା ପେଟ୍ରୋଲ ମୂଲ୍ୟରେ ୮୭ ପଇସା ବୃଦ୍ଧି କରାଯାଇଥିଲାବେଳେ ଡିଜେଲ ମୂଲ୍ୟରେ ୯୧ ପଇସା ବୃଦ୍ଧି ହୋଇଛି। ଏହାକୁ ମିଶାଇ ବର୍ତ୍ତମାନ ସୁଦ୍ଧା ପେଟ୍ରୋଲ ଏବଂ ଡିଜେଲ ଲିଟର ପିଛା ମୂଲ୍ୟ ଅନୂ୍ୟନ ୫ ଟଙ୍କା ବୃଦ୍ଧି ପାଇଛି। ପଶ୍ଚିମ ଏସିଆ ଯୁଦ୍ଧ ସଙ୍କଟକୁ ନେଇ ଅନ୍ତର୍ଜାତୀୟ ବଜାରରେ ଅଶୋଧିତ ତୈଳ ମୂଲ୍ୟରେ ଅହେତୁକ ବୃଦ୍ଧି ଘଟିବା ପରେ ସ୍ଥିତି ମୁକାବିଲା ପାଇଁ ପ୍ରଥମେ ମେ’ ୧୫ ତାରିଖରେ ରାଷ୍ଟ୍ରାୟତ୍ତ ତୈଳ କମ୍ପାନୀଗୁଡିକ ପକ୍ଷରୁ ଲିଟର ପିଛା ପେଟ୍ରୋଲ ଏବଂ ଡିଜେଲ ମୂଲ୍ୟରେ ୩ ଟଙ୍କା ବୃଦ୍ଧି ସହ ସିଏନ୍ଜି ମୂଲ୍ୟରେ ୨ ଟଙ୍କା ବୃଦ୍ଧି କରାଯାଇଥିଲା। ଏହାପରେ ୧୭ ମେ’ରେ ସିଏନ୍ଜି ମୂଲ୍ୟରେ ପୁଣି ୧ ଟଙ୍କା ବୃଦ୍ଧି କରାଯାଇଥିଲା। ପରେ ପରେ ଗତ ୧୯ ତାରିଖରେ ପେଟ୍ରୋଲ ଏବଂ ଡିଜେଲ ମୂଲ୍ୟରେ ୯୦ ପଇସା ବୃଦ୍ଧି କରାଯାଇଥିଲା। ଏହାପରେ ଶନିବାର ପୁଣି ପେଟ୍ରୋଲ ଏବଂ ଡିଜେଲ ମୂଲ୍ୟରେ ବୃଦ୍ଧି କରାଯିବା ପରେ ପେଟ୍ରୋଲରେ ବର୍ତ୍ତମାନ ସୁଦ୍ଧା ଲିଟର ପିଛା ମୂଲ୍ୟରେ ୪.୭୪ ଏବଂ ଡିଜେଲ ମୂଲ୍ୟରେ ୪.୮୭ ଟଙ୍କା ବୃଦ୍ଧି ହୋଇଛି। ଏହି ବୃଦ୍ଧି ଦ୍ୱାରା ବର୍ତ୍ତମାନ ଦିଲ୍ଲୀରେ ଲିଟର ପିଛା ପେଟ୍ରୋଲ ମୂଲ୍ୟ ୯୯.୫୧ ଏବଂ ଡିଜେଲ ମୂଲ୍ୟ ଲିଟର ପିଛା ୯୨.୪୯ ଟଙ୍କା ରହିଛି। ମୁମ୍ବାଇରେ ଲିଟର ପିଛା ପେଟ୍ରୋଲ ମୂଲ୍ୟ ୧୦୮.୪୯ ରହିଥିବା ବେଳେ ଡିଜେଲ ୯୫.୦୨ ,କୋଲକାତାରେ ପେଟ୍ରୋଲ ୧୧୦.୬୪ ଏବଂ ଡିଜେଲ ୯୭.୦୨, ଚେନ୍ନାଇରେ ଏହା ଯଥାକ୍ରମେ ୧୦୫.୩୧ ଓ ୯୬.୯୮ ଟଙ୍କା ରହିଛି। ତେବେ ଦେଶରେ ହାଇଦ୍ରାବାଦରେ ପେଟ୍ରୋଲ ମୂଲ୍ୟ ଲିଟର ପିଛା ମୂଲ୍ୟ ସର୍ବାଧିକ ଭାବେ ୧୧୨.୮୧ ଟଙ୍କା ରହିଛି। ଭୁବନେଶ୍ୱରରେ ପେଟ୍ରୋଲ ଲିଟର ପିଛା ମୂଲ୍ୟ ୧୦୬.୧୮ ଏବଂ ଡିଜେଲ ମୂଲ୍ୟ ୯୭.୮୦ ଟଙ୍କା ରହିଛି।
କିଛି ଦିନ ଅନ୍ତରରେ ପେଟ୍ରୋଲ ଏବଂ ଡିଜେଲ ମୂଲ୍ୟରେ ସ୍ବଳ୍ପ ବୃଦ୍ଧି ୨୦୨୨ ବର୍ଷର ଘଟଣାର ପୁନରାବୃତ୍ତି ହେବା ଭଳି ଲଗୁଛି। ୨୦୨୨ରେ ରୁଷିଆ-ୟୁକ୍ରେନ ଯୁଦ୍ଧ ଆରମ୍ଭ ହେବା ପରେ ଅନ୍ତର୍ଜାତୀୟ ସ୍ତରରେ ତୈଳ ସଙ୍କଟ ସୃଷ୍ଟି ହେବାରୁ ରାଷ୍ଟ୍ରାୟତ୍ତ ତୈଳ କମ୍ପାନୀ ୧୫ ଦିନ ମଧ୍ୟରେ ୧୩ଥର ପେଟ୍ରୋଲ ଏବଂ ଡିଜେଲ ମୂଲ୍ୟ ବୃଦ୍ଧି କରିଥିଲେ।
ସେତେବେଳେ ପ୍ରତି ଲିଟର ପିଛା ପେଟ୍ରୋଲ ଏବଂ ଡିଜେଲ ମୂଲ୍ୟ ଦୈନିକ ହାରରେ ଲିଟର ପିଛା ୮୦ ପଇସା ବୃଦ୍ଧି ଘଟିଥିଲେ ହେଁ ହାରାହାରି ଭାବେ ଉଭୟ ସାମଗ୍ରୀ ମୂଲ୍ୟରେ ଅନୂ୍ୟନ ୧୦ ଟଙ୍କା ବୃଦ୍ଧି ପାଇଥିଲା। ବର୍ତ୍ତମାନ ସ୍ଥିତିରେ ମଧ୍ୟ ତୈଳ କମ୍ପାନୀଗୁଡିକ ସମାନ ନୀତିରେ ମୂଲ୍ୟ ବୃଦ୍ଧି କରିବାକୁ ନିଷ୍ପତ୍ତି ନେଇଥିବା କୁହାଯାଉଛି। ଅଚାନକ ଭାବେ ଅଧିକ ମୂଲ୍ୟବୃଦ୍ଧି ପରିବହନ ଓ ଲଜିଷ୍ଟିକ୍ କ୍ଷେତ୍ରକୁ ପ୍ରଭାବିତ କରିବା ସହ ମୁଦ୍ରାସ୍ଫୀତି ବୃଦ୍ଧି କରିବା ଆଶଙ୍କାରେ ତୈଳ କମ୍ପାନୀଗୁଡିକ କିଛି ଦିନ ଅନ୍ତରରେ ୧ ଟଙ୍କାରୁ କମ୍ ମୂଲ୍ୟ ବୃଦ୍ଧି କରୁଛନ୍ତି ବୋଲି କେତେକ ବିଶେଷଜ୍ଞ ମତ ଦେଇଛନ୍ତି।
Dharitri – Odisha’s No.1 Odia Daily
