ହାତୀଙ୍କୁ ନିଜ ପାଖରେ ରଖି ପାରିବେନି ବ୍ୟକ୍ତି ବିଶେଷ-ଧାର୍ମିକ ଅନୁଷ୍ଠାନ: ମାଈ ହାତୀ ଜୟମାଲା ମାମଲାରେ କହିଲେ ହାଇକୋର୍ଟ…

ଚେନ୍ନାଇ,୧।୩ : ହାତୀ ସଂରକ୍ଷଣକୁ ନେଇ ମାଡ୍ରାସ ହାଇକୋର୍ଟ ଏକ ବଡ଼ ରାୟ ପ୍ରଦାନ କରିଛନ୍ତି। କୋର୍ଟ କହିଛନ୍ତି ଯେ ବର୍ତ୍ତମାନ ବ୍ୟକ୍ତି ବିଶେଷ ଏବଂ ଧାର୍ମିକ ଅନୁଷ୍ଠାନ ତାମିଲନାଡୁରେ ହାତୀଙ୍କୁ ନିଜ ପାଖରେ ରଖି ପାରିବେ ନାହିଁ। କୋର୍ଟ ଏହାକୁ ସମ୍ପୂର୍ଣ୍ଣ ଭାବେ ନିଷିଦ୍ଧ କରିଛନ୍ତି। କୋର୍ଟ ମଧ୍ୟ ସରକାର, ପରିବେଶ ଏବଂ ଜଙ୍ଗଲ ବିଭାଗକୁ ସମସ୍ତ ମନ୍ଦିର ଏବଂ ଅନ୍ୟାନ୍ୟ ଘରୋଇ କ୍ଷେତ୍ରରେ ହାତୀ ଯାଞ୍ଚ କରିବାକୁ କହିଛନ୍ତି।

କୋର୍ଟ କହିଛନ୍ତି, ବର୍ତ୍ତମାନ ନିଷ୍ପତ୍ତି ନେବାକୁ ସମୟ ଆସିଛି ଯେ ମନ୍ଦିର ଏବଂ ବ୍ୟକ୍ତିଗତ ମାଲିକାନାରେ ବନ୍ଦୀ ଅବସ୍ଥାରେ ରଖାଯାଇଥିବା ଏହିପରି ସମସ୍ତ ହାତୀଙ୍କୁ ସରକାରୀ ପୁନର୍ବାସ ଶିବିରକୁ ସ୍ଥାନାନ୍ତର କରାଯାଉ। ଏନେଇ ସରକାର, ପରିବେଶ ଏବଂ ଜଙ୍ଗଲ ବିଭାଗର ସଚିବ, ମାନବ ସମ୍ବଳ ଏବଂ ସିଇର ସଚିବଙ୍କ ସହ ସମନୱୟ ରକ୍ଷା କରନ୍ତୁ ବୋଲି କୋର୍ଟ କହିଛନ୍ତି।

୬୦ ବର୍ଷ ବୟସ୍କା ମାଈ ହାତୀ ଜୟମାଲାର ହେପାଜତକୁ ନେଇ ଏକ ଆବେଦନ ଶୁଣାଣି ବେଳେ କୋର୍ଟ ଏହି ନିଷ୍ପତ୍ତି ଦେଇଛନ୍ତି। ହାତୀ ଜୟମାଲାକୁ ତାଙ୍କ ମାହୁନ୍ତଙ୍କଠାରୁ ଅଲଗା କରାଯାଇପାରିବ ନାହିଁ ବୋଲି କୋର୍ଟ ତାଙ୍କ ଆଦେଶରେ କହିଛନ୍ତି। ସେଥିପାଇଁ ତାଙ୍କୁ ମାହୁନ୍ତ ରଖିବା ଉଚିତ।

ଜଷ୍ଟିସ ଜି.ଆର ସ୍ବାମୀନାଥନ ନିକଟରେ ଜୟମାଲାକୁ ଦେଖିବାକୁ ଆସିଥିଲେ। ସେହି ସମୟରେ ସେ ହାତୀ ଶରୀରରେ ଆଘାତ ଦେଖିବାକୁ ପାଇଥିଲେ। ସେ ପଶୁପାଳନ ବିଭାଗ ସହାୟତାରେ ହାତୀର ଯତ୍ନ ନେବାକୁ ବିରୁଧୁନଗର ଜିଲା କଲେକ୍ଟରଙ୍କୁ ନିର୍ଦ୍ଦେଶ ଦେଇଛନ୍ତି। ଏହି ହାତୀଟି ୬୦ ବର୍ଷରୁ ଅଧିକ ହୋଇଥିବାରୁ ଆଜୀବନ ଯତ୍ନ ନେବା ପାଇଁ ଜୟମାଲାଙ୍କୁ ସରକାରୀ ହାତୀ ପୁନର୍ବାସ ଶିବିରକୁ ସ୍ଥାନାନ୍ତର କରାଯିବ ବୋଲି କୋର୍ଟ କହିଛନ୍ତି।

ସୂଚନାଯୋଗ୍ୟ, ଗତ ବର୍ଷ ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଥିଲା। ଏହି ଭାଇରାଲ ଭିଡିଓ ତାମିଲନାଡୁରେ ରହୁଥିବା ଏକ ହାତୀ ଜୟମାଲାଙ୍କର ଥିଲା। ଯେଉଁଥିରେ କୁହାଯାଇଥିଲା ଯେ ଜୟମାଲାଙ୍କୁ ନିର୍ଯାତନା ଦିଆଯାଉଛି। ତାଙ୍କୁ ଅନେକ ଥର ମାଡ ଦିଆଯାଇଥିଲା। ଭିଡିଓରେ ଜୟମାଲାଙ୍କ କପାଳ ନିକଟରେ ଏକ କ୍ଷତ ଦେଖାଯାଉଛି। ଭିଡିଓ ଭାଇରାଲ ହେବା ପରେ ଲୋକମାନେ ଏହାକୁ ନେଇ ବିରୋଧ କରିବା ଆରମ୍ଭ କରିଥିଲେ। ଏହି ଭିଡିଓରେ ଏକ ଟୁଇଟ କରି କେନ୍ଦ୍ର ସରକାରଙ୍କ ଜଙ୍ଗଲ ଓ ପରିବେଶ ମନ୍ତ୍ରଣାଳୟ କହିଥିଲା ଯେ ହାତୀଟି ସମ୍ପୂର୍ଣ୍ଣ ସୁସ୍ଥ ଏବଂ କ୍ଷତର ଭିଡିଓ ବହୁତ ପୁରୁଣା।

ଯେତେବେଳେ ହାତୀର ଭିଡିଓ ଭାଇରାଲ ହୋଇଥିଲା ସେତେବେଳେ ଆସାମ ସରକାର ଏହାକୁ ନେଇ ଦାବି କରିଥିଲେ। ଆସାମ ଦାବି କରିଥିଲା ଯେ ଏହି ହାତୀଟି ସେମାନଙ୍କର । ଆସାମ ସରକାର ଜୟମାଲା ସମେତ ନଅ ହାତୀଙ୍କୁ ତାମିଲନାଡୁକୁ ଲିଜ୍‌ ଆଧାରରେ ଦେଇଥିଲେ। ଆସାମର ମୁଖ୍ୟ ବନ ସଂରକ୍ଷଣକାରୀ ଏମ.କେ ଯାଦବ କହିଥିଲେ ଯେ ଗୁଆହାଟୀ ହାଇକୋର୍ଟରେ ଦାଖଲ ହୋଇଥିବା ଆବେଦନରେ ଆମେ କହିଛୁ ଯେ ହାତୀ ଜୟମାଲା ଆମର ଏବଂ ଆମେ ତାମିଲନାଡୁକୁ ଫେରସ୍ତ କରିବାକୁ କହିଛୁ। ଆମେ ଏହି ହାତୀମାନଙ୍କୁ ତାମିଲନାଡୁକୁ ଲିଜ ଦେଇଥିଲୁ। ଉପହାର ଏବଂ ଲିଜ କ୍ଷେତ୍ରରେ କୌଣସି ଆଇନଗତ ବାଧ୍ୟତାମୂଳକତା ନାହିଁ ବୋଲି ସେ କହିଥିଲେ। ଆମେ ସେମାନଙ୍କ ହାତୀ ପୂର୍ବରୁ ମଧ୍ୟ ମାଗିଥିଲୁ । ତେବେ ତାମିଲନାଡୁ ସରକାର ହାତୀକୁ ଫେରାଇବାକୁ ମନା କରି ଦେଇଥିଲେ। ଏହା ପରେ ମାମଲା କୋର୍ଟରେ ପହଞ୍ଚିଥିଲା।