ବରୀ,୨୧ା୭(ଡି.ଏନ.ଏ.): ବରୀ ବ୍ଲକ୍ ଅଧୀନ ଚନ୍ଦନପୁର ପଞ୍ଚାୟତ ଶୁକଳ ଗ୍ରାମରେ ଲଗାଣ ବର୍ଷା ଯୋଗୁ ରାସ୍ତା ଉପରେ ପାଣି ଜମି ରହୁଛି। ଫଳରେ ଯାତାୟାତ ବାଧାପ୍ରାପ୍ତ ହେଉଛି। ଉକ୍ତ ରାସ୍ତା ଉପରେ ଗ୍ରାମର ତିନିଶହରୁ ଊର୍ଦ୍ଧ୍ୱ ପରିବାର ନିର୍ଭର କରିଥାନ୍ତି। ବିଶେଷକରି ଏଠାରେ ଥିବା ଉଚ୍ଚ ବିଦୟାଳୟ, ପ୍ରାଥମିକ ବିଦ୍ୟାଳୟକୁ ଛାତ୍ରୀଛାତ୍ର ଯାଉଥିବା ବେଳେ ରାସ୍ତା ଉପରେ ପାଣି ଜମି ରହିବାରୁ ବାରମ୍ବାର ଦୁର୍ଘଟଣା ଘଟୁଛି। ଏତଦ୍ବ୍ୟତୀତ ଏହି ଗ୍ରାମର ଲୋକେ ବରୀ ବ୍ଲକ୍ କାର୍ଯ୍ୟାଳୟ, ତହସିଲ କାର୍ଯ୍ୟାଳୟ, ବରୀ ରାମଚନ୍ଦ୍ରପୁର ଥାନା ଓ ରତ୍ନଗିର ପ୍ରାଥମିକ ଚିକିତ୍ସା କେନ୍ଦ୍ର ସମେତ ମୁଖ୍ୟ ବଜାର ନିକଟକୁ ଯିବା ନିମନ୍ତେ ଏହି ରାସ୍ତା ଉପରେ ନିର୍ଭର କରିଥାନ୍ତି।
ଗ୍ରାମ ରାସ୍ତାଟି ପୂର୍ତ୍ତ ବିଭାଗ ରାସ୍ତାକୁ ସଂଯୋଗୀକରଣର ମୁଖ୍ୟ ରାସ୍ତା। ତେବେ ପୂର୍ତ୍ତ ବିଭାଗ ରାସ୍ତା ନିର୍ମାଣ କରିବା ସମୟରେ ସ୍ଥାନୀୟ ଲୋକଙ୍କ ସମସ୍ୟାକୁ ଦୃଷ୍ଟି ନ ଦେଇ ଖାମଖିଆଲି ଭାବେ କାର୍ଯ୍ୟ କରିଥିବାରୁ ଏଭଳି ଅଭସ୍ଥା ସୃଷ୍ଟି ହୋଇଛି ବୋଲି ଲୋକେ ଅଭିଯୋଗ କରିଛନ୍ତି। ଏ ସମ୍ପର୍କରେ ଚନ୍ଦନପୁର ସରପଞ୍ଚ ଚପଳା ମଲ୍ଲଙ୍କୁ ପଚାରିବାରେ ସେ କୁହନ୍ତି, ଦୀର୍ଘ ୨୦ ବର୍ଷ ଧରି ଏହି ଗ୍ରାମର ଲୋକେ ଅସୁବିଧାର ସମ୍ମୁଖୀନ ହେଉଛନ୍ତି। ପାଣି ଜମି ରହୁଥିବା ରାସ୍ତାଟିର ଅର୍ଦ୍ଧାଧିକ ଅଂଶ ଗ୍ରାମ୍ୟ ଉନ୍ନୟନ ବିଭାଗ ଅଧୀନରେ ଯାଉଛି। ତେଣୁ ଏକ ସପ୍ତାହ ମଧ୍ୟରେ ଜଳ ନିଷ୍କାସନ ନିମନ୍ତେ ଡ୍ରେନ କାର୍ଯ୍ୟ କରାଯିବ ବୋଲି ସେ ପ୍ରକାଶ କରିଛନ୍ତି। ଏ ସମ୍ପର୍କରେ ବିଧାୟିକା ସୁନନ୍ଦା ଦାସ କହିଛନ୍ତି, ଜଳ ନିଷ୍କାସନ ନିମନ୍ତେ ଗ୍ରାମ୍ୟ ଉନ୍ନୟନ ବିଭାଗକୁ ପତ୍ର ଲେଖାଯାଇଛି। ଖୁବ୍ଶୀଘ୍ର ସମ୍ପୃକ୍ତ ବିଭାଗ ତରଫରୁ କାର୍ଯ ଆରମ୍ଭ କରାଯିବ ବୋଲି ବିଭାଗୀୟ କର୍ତ୍ତୃପକ୍ଷ ପ୍ରତିଶ୍ରୁତି ଦେଇଥିବା ବଧାୟିକା ପ୍ରକାଶ କରିଛନ୍ତି।
