ବାରିପଦା ଅଫିସ,୧୨ା୫: ମୟୂରଭଞ୍ଜ ଜିଲା ବଡ଼ସାହି ବ୍ଲକ ଶିଆଳିଘାଟି ଓ ପାଉଁଶିଆ ପଞ୍ଚାୟତ ଅନ୍ତର୍ଗତ ୪ଟି ଗ୍ରାମର ଲୋକେ ପ୍ରଶାସନିକ ଅବହେଳାରୁ ଦୁର୍ଦ୍ଦଶାର ସମ୍ମୁଖୀନ ହେଉଛନ୍ତି। ଆଗକୁ ବର୍ଷା ଦିନ ଥିବାରୁ ଏବେଠାରୁ ଏହି ୪ ଗ୍ରାମର ଲୋକେ ଜଳବନ୍ଦୀ ହେବା ଚିନ୍ତାରେ ଘାରି ହେଉଛନ୍ତି। ବନ୍ୟା ଆଶ୍ରୟସ୍ଥଳୀ ନ ଥିବା ବେଳେ ବୁଢ଼ାବଳଙ୍ଗ ନଦୀରେ ପୋଲ ନିର୍ମାଣ ପାଇଁ ଲୋକେ ଦୀର୍ଘ ବର୍ଷ ହେଲା ବାରମ୍ବାର ଦାବି କରିଆସୁଛନ୍ତି। ମାତ୍ର ବିଭାଗୀୟ ଅଧିକାରୀଙ୍କ ଖାମଖିଆଲି ନୀତି ଯୋଗୁ ଲୋକେ ଗମନାଗମନ କ୍ଷେତ୍ରରେ ଅସୁବିଧାର ସମ୍ମୁଖିନ ହେଉଛନ୍ତି। ବର୍ଷା ଦିନେ ବୁଢ଼ାବଳଙ୍ଗ ନଦୀର ଉଦ୍ବୃତ୍ତ ପାଣି ଗାଁରେ ପଶି ବ୍ୟାପକ କ୍ଷୟକ୍ଷତି ଘଟାଇଥାଏ। କିଛି ବର୍ଷ ପୂର୍ବେ କୁଆପାଳ, ମୁକ୍ତାପୁର ଓ ନୀଳକଣ୍ଠପୁର ପ୍ରଭୃତି ଗ୍ରାମ ନଦୀ ଗର୍ଭରେ ଲୀନ ହୋଇଯାଇଥିବା ଗ୍ରାମର ପୂର୍ଣ୍ଣଚନ୍ଦ୍ର ପାତ୍ର, ରାଧାକୃଷ୍ଣ ପାତ୍ର ଓ ଆନନ୍ଦ ଶଙ୍କର ପାତ୍ର କହିଛନ୍ତି। ଏଭଳି ସମସ୍ୟାକୁ ନେଇ ଇତିମଧ୍ୟରେ ଅନେକ ପରିବାର ଗାଁ ଛାଡ଼ି ଅନ୍ୟତ୍ର ବସବାସ କରୁଥିବା ଦେଖିବାକୁ ମିଳିଛି।
ବର୍ଷା ଋତୁରେ ନଈ ବଢ଼ିଲେ ଉକ୍ତ ୪ ଗ୍ରାମବାସୀଙ୍କ ଚିନ୍ତା ବଢ଼େ। ନଦୀର ଉଦ୍ବୃତ୍ତ ଜଳ ଗାଁରେ ପଶି ଯୋଗାଯୋଗ ବିଚ୍ଛିନ୍ନ ହୋଇଥାଏ। ଜରୁରିକାଳୀନ ସେବା ପାଇବାରୁ ଲୋକେ ବଞ୍ଚତ୍ତ ହେବା ସହିତ ଠିକ୍ ସମୟରେ ରିଲିଫ ସାମଗ୍ରୀ ମିଳିବାରେ ବିଳମ୍ବ ହୋଇଥାଏ। ବଡ଼ସାହି ବ୍ଲକ ମୁଖ୍ୟାଳୟଠାରୁ ୧୫କି.ମି. ଦୂରରେ ବାଘୁଆପାଳ, ପତରାପଦା, ମାଙ୍କଡ଼ାପାଳ ଓ ଭଞ୍ଜବାଟି ଗ୍ରାମ ଅବସ୍ଥିତ। ଏହି ୪ ଗାଁରେ ୧୦ହଜାରରୁ ଊର୍ଦ୍ଧ୍ୱ ଲୋକ ବସବାସ କରୁଥିବା ବେଳେ ଚାଷ ସେମାନଙ୍କର ମୁଖ୍ୟ ଜୀବିକା। ପ୍ରତି ବର୍ଷ ବନ୍ୟା ପାଣି ଗାଁରେ ପଶିବା ଦ୍ୱାରା ଗୃହପାଳିତ ପ୍ରାଣୀ ବିଶେଷ ପ୍ରଭାବିତ ହେଉଥିବା ବେଳେ ପରିବା ଚାଷ ମଧ୍ୟ ନଷ୍ଟ ହେଉଛି। ପାଣି ଘେରରେ ବାଘୁଆପାଳ ଓ ଭଞ୍ଜବାଟୀ ଗ୍ରାମର ଲୋକମାନେ ଜଳବନ୍ଦୀ ହୋଇ ରହିଥାନ୍ତି। ରାସ୍ତାଘାଟ ଧୋଇ ନଷ୍ଟ ହୋଇଯାଇଥାଏ। ପାଣି ଛାଡ଼ିବା ପରେ ଦୀର୍ଘ ୧୫କି.ମି. ବୁଲି ମୁଖ୍ୟାଳୟକୁ ଯିବା ଆସିବା କରିଥାନ୍ତି। ବିପନ୍ନଙ୍କ ପାଇଁ ବନ୍ୟା ଆଶ୍ରୟସ୍ଥଳୀ ନିର୍ମାଣ କରିବାକୁ ଗ୍ରାମବାସୀ ବାରମ୍ବାର ଦାବି ଉପସ୍ଥାପନ କରି ଆସୁଛନ୍ତି। ଗମନାଗମନର ସୁବିଧା ନିମନ୍ତେ ବଳଭଦ୍ରପୁର ପଞ୍ଚାୟତର ସିଂହଟିଆରୁ ବାଘୁଆପାଳ ଗାଁ ମଧ୍ୟରେ ଏକ ପୋଲ ନିର୍ମାଣ କରିବା ପାଇଁ ଦାବି ହୋଇ ଆସୁଛି। ଏ ନେଇ ଶିରିଶ ଚନ୍ଦ୍ର ଗିରିଙ୍କ ନେତୃତ୍ୱରେ ୪ ଗ୍ରାମର ହଜାର ହଜାର ଲୋକଙ୍କ ସମେତ ସ୍ଥାନୀୟ ସରପଞ୍ଚ ଓ ସମିତିସଭ୍ୟଙ୍କ ଦସ୍ତଖତ ସମ୍ବଳିତ ଦାବିପତ୍ର ମୁଖ୍ୟମନ୍ତ୍ରୀ, ମୁଖ୍ୟ ଶାସନ ସଚିବ, ୫-ଟି ସଚିବ, ଯୋଜନା ବୋର୍ଡ ଅଧ୍ୟକ୍ଷ, ଗ୍ରାମ୍ୟ ଉନ୍ନୟନ ବିଭାଗ ସଚିବ, ବାଲେଶ୍ୱର ଏମ୍ପି, ସ୍ଥାନୀୟ ବିଧାୟକ ଓ ଜିଲାପାଳଙ୍କୁ ପ୍ରଦାନ କରାଯାଇଛି। ବଡ଼ସାହି ବିଧାୟକ ସନାତନ ବିଜୁଳି ଏ ସଂକ୍ରାନ୍ତରେ ବିଭାଗୀୟ ଉଚ୍ଚ ପଦସ୍ଥ ଅଧିକାରୀଙ୍କ ସହ ଆଲୋଚନା ମଧ୍ୟ କରିଛନ୍ତି। ଉକ୍ତ ସ୍ଥାନରେ ପୋଲ ନିର୍ମାଣ ହେଲେ ବଳଭଦ୍ରପୁର, ଶିଆଳୀଘାଟି ଓ ପାଉଁଶିଆ ଆଦି ପଞ୍ଚୟତର ଲୋକେ ମୁଖ୍ୟାଳୟକୁ ସୁରୁଖୁରୁରେ ଯାତାୟାତ କରିବା ସହିତ ସେମାନଙ୍କ ଆର୍ଥିକ ବିକାଶ ସମ୍ଭବ ହୋଇପାରିବ। ସରକାର ଏଥିପ୍ରତି ସ୍ବତନ୍ତ୍ର ଦୃଷ୍ଟି ଦେବାକୁ ଗ୍ରାମବାସୀ ଦାବି କରିଛନ୍ତି।
