ରାଉରକେଲା ଅଫିସ,୧୭।୪: ରାଉରକେଲା ଟିସିଆଇରୁ ଆଇଡିସି ବାଇପାସ ରାସ୍ତାକୁ ଗ୍ୟାସ ପାଇପ୍ ବିଛାଇବା ନାଁରେ ଖୋଳି ଦିଆଯାଇଛି। ଉକ୍ତ ରାସ୍ତାକୁ ପୋତାଯାଉ ନ ଥିବାରୁ ଯାତାୟାତରେ ଅସୁବିଧା ହେଉଛି। ଫଳରେ ଉକ୍ତ ରାସ୍ତା ଉପରେ ନିର୍ଭର କରୁଥିବା ଅଞ୍ଚଳବାସୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି।
ସୂଚନା ଅନୁସାରେ, ରାଉରକେଲା ଟିସିଆଇରୁ ଆଇଡିସି ବାଇପାସ ରାସ୍ତା ରାସ୍ତାରେ ମଇଳା ପୁନଃଚକ୍ରଣ ଉଦ୍ୟୋଗ, ଶିକ୍ଷାନୁଷ୍ଠାନ ସମେତ ବିଭିନ୍ନ କମ୍ପାନୀ ରହିଥିବାରୁ ଦୈନିକ ହଜାର ହଜାର ଛୋଟବଡ ଯାନବାହନ ଯାତାୟାତ କରୁଛି। ଏଥିସହ ସ୍ଥାନୀୟ ଅଞ୍ଚଳର ହଜାର ହଜାର ଲୋକ ରାସ୍ତାରେ ଯାତାୟାତ କରିଥାନ୍ତି। ତେବେ ଗ୍ୟାସ୍ ପାଇପ୍ ଲାଇନ କାମ ନାଁରେ ଟିସିଆଇରୁ ଆଇଡିସି ବାଇପାସ ପର୍ଯ୍ୟନ୍ତ ରାସ୍ତାକୁ ଠିକା ସଂସ୍ଥା ଖୋଳି ଦେଇଛି। ଦିର୍ଘଦିନ ଧରି ଏହି ଗାତକୁ ପୋତାଯାଉନାହିଁ। କେଉଁଠି ସତର୍କ ସୂଚନା ବୋର୍ଡ ଲଗାଯାଇଥିବା ବେଳେ ଅନ୍ୟ କେଉଁଠି ସୂଚନା ବୋର୍ଡ ମଧ୍ୟ ନାହିଁ। ଏଣୁ ସାମାନ୍ୟ ଅସାବଧାନ ହେଲେ ଦୁର୍ଘଟଣା ଆଶଙ୍କା ରହିଛି। ବିଶେଷକରି ରାତିରେ ଗାଡିଚାଳନା ବେଳେ ଲୋକଙ୍କୁ ଅଧିକ ସତର୍କ ହେବାକୁ ପଡୁଛି। ଦୀର୍ଘବର୍ଷ ହେଲା ଟିସିଆଇ-ଆଇଡିସି ରାସ୍ତାରେ ମାଟି ମୁଠାଏ ପଡି ନ ଥିବା ବେଳେ ଏବେ ଖୋଳାଯିବା ଦ୍ୱାରା ରାସ୍ତା ମରଣଯନ୍ତା ପାଲଟିଛି। ଉକ୍ତ ରାସ୍ତା କଡ଼ରେ ହୋଟେଲ କରିଥିବା ଲକ୍ଷ୍ମୀ ସା କୁହନ୍ତି, ରାସ୍ତାର ଉନ୍ନତୀକରଣ ହେଉନି। ସମ୍ପୂର୍ଣ୍ଣ ରାସ୍ତା ବିପର୍ଯ୍ୟସ୍ତ ହୋଇଗଲାଣି। ଫର୍ସାଟୋଲି ଛକରେ ରାସ୍ତାରୁ ଧୂଳିମାଟି ଉଡି ଦୋକାନରେ ଜମୁଛି। ବହୁ ବ୍ୟବସାୟୀ ଏଥିପାଇଁ ଦୋକାନ ବନ୍ଦ କରିଦେଇଛନ୍ତି। କିଛିଦିନ ହେଲା ଏହି ବାଇପାସ ରାସ୍ତାରେ ଗ୍ୟାସ୍ ପାଇପ୍ ବିଛାଇବା ନାଁରେ ସମ୍ପୂର୍ଣ୍ଣ ରାସ୍ତା ଖୋଳା ଚାଲିଛି ମାତ୍ର ପୋତା ଯାଉନାହିଁ। ଯାତ୍ରୀ ବହୁତ ଅସୁବିଧା ଭୋଗୁଛନ୍ତି ବୋଲି ସେ କହିଥିଲେ। ଏ ସମ୍ପର୍କରେ ପାନପୋଷ ଉପଜିଲାପାଳ ଅଭିମନ୍ୟୁ ମାଝୀଙ୍କୁ ପଚାରିବାରୁ ସେ କହିଥିଲେ, ଗ୍ୟାସ୍ ପାଇପ୍ ବିଛାଉଥିବା ସମ୍ପୃକ୍ତ ସଂସ୍ଥା ରାସ୍ତା ଖୋଳି ସାରିବା ପରେ ତୁରନ୍ତ ପାଇପ୍ ପୋତିବା କଥା। ରାସ୍ତାକୁ ସମତୁଲ କରି ଯାତାୟାତ ଉପଯୋଗୀ କରିବା ଦରକାର। ଏଭଳି ନ କରି ରାସ୍ତା ଖୋଳି ଦେଇ ଚୁପ୍ ରହିବା ଉଚିତ ନୁହଁ। ତୁରନ୍ତ ରାସ୍ତାକୁ ପୋତି ସମତୁଲ କରିବା ପାଇଁ ସମ୍ପୃକ୍ତ ସଂସ୍ଥାକୁ ତାଗିଦ୍ କରାଯିବ ବୋଲି ମାଝୀ କହିଥିଲେ।
