ବାସୁଦେବପୁର,୨୮।୪ (ଡି.ଏନ.ଏ.): ତହସିଲ ପରିସରରେ ଥିବା ଡାକବଙ୍ଗଳାରେ ଖାଦ୍ୟ ପରଷିବାରେ ବିଳମ୍ବ ହେଲା। ଏଣୁ କାର୍ଯ୍ୟରେ ଅବହେଳା କରିଥିବାରୁ ନିଲମ୍ବିତ ହୋଇଛନ୍ତି ଭଦ୍ରକ ଜିଲା ବାସୁଦେବପୁର ବ୍ଲକ ଅଫିସ୍ ପିଅନ ପ୍ରଶାନ୍ତ ବାଗ। ସୂଚନା ଅନୁଯାୟୀ, ଜିଲା ପରିଷଦ ସିଡିଓ (ମୁଖ୍ୟ ଉନ୍ନୟନ ଅଧିକାରୀ) ପ୍ରତାପ ପ୍ରୀତିମୟ ବୁଧବାର ଅପରାହ୍ନ ୨ଟା ୩୦ରେ ବାସୁଦେବପୁର ତହସିଲ ପରିସରରେ ଥିବା ଡାକବଙ୍ଗଳାରେ ପହଞ୍ଚତ୍ ପ୍ରାୟ ୪ଟା ୩୦ ପର୍ଯ୍ୟନ୍ତ ରହିଥିଲେ। ବ୍ଲକ କର୍ତ୍ତୃପକ୍ଷଙ୍କ ପକ୍ଷରୁ ତାଙ୍କ ପାଇଁ ମଧ୍ୟାହ୍ନ ଭୋଜନ ବ୍ୟବସ୍ଥା କରାଯାଇଥିଲା। ପିଅନ ପ୍ରଶାନ୍ତ ଖାଦ୍ୟ ପରଷିବା ଦାୟିତ୍ୱରେ ଥିଲେ। ଅପରାହ୍ନ ୪ଟା ମଧ୍ୟରେ ସେ ସିଡିଓଙ୍କୁ ଖାଇବା ପାଇଁ ଏକାଧିକବାର ଡାକିଥିଲେ। କିନ୍ତୁ ସେ ଖାଦ୍ୟ ନ ଖାଇ ଡାକବଙ୍ଗଳାରେ ଶୋଇ ରହିଥିଲେ। ଏହି ସମୟ ମଧ୍ୟରେ ସିଡିଓଙ୍କ ସହ ଆସିଥିବା ତାଙ୍କ ଡ୍ରାଇଭର ଓ ଅନ୍ୟ ଜଣେ କର୍ମଚାରୀ ଖାଇଥିଲେ। ସିଡିଓ ଖାଇ ନ ଥିବାରୁ ପ୍ରଶାନ୍ତ ୪ଟା ପର୍ଯ୍ୟନ୍ତ ଉପାସରେ ରହି ଡାକବଙ୍ଗଳା ପରିସରରେ ଅପେକ୍ଷା କରି ରହିଥିଲେ। ହେଲେ ସିଡିଓ ୪ଟା ୧୫ରେ ଉଠିବା ପରେ ହଠାତ୍ ଉତ୍କ୍ଷିପ୍ତ ହୋଇ ତାଙ୍କ ଉପରେ ଅସନ୍ତୋଷ ପ୍ରକଟ କରି ବ୍ଲକ ଅଫିସ୍ରେ ପହଞ୍ଚତ୍ଥିଲେ। ପ୍ରଶାନ୍ତ କାର୍ଯ୍ୟରେ ଅବହେଳା ପ୍ରଦର୍ଶନ କରିଥିବା ଦର୍ଶାଇ ତାଙ୍କୁ ନିଲମ୍ବନ ପାଇଁ ବିଡିଓଙ୍କୁ କହିଥିଲେ। ସିଡିଓଙ୍କ ଅସନ୍ତୋଷ ଆଧାରରେ ବିଡିଓ ସତ୍ୟଜିତ ରାଉତ ଚିଠି ନଂ. ୨୨୪୦, ତା ୨୬ା୪ା୨୩ ରିଖରେ ତାଙ୍କୁ ନିଲମ୍ବନ କରିଛନ୍ତି। ପ୍ରଶାନ୍ତଙ୍କ ସମେତ ଅନ୍ୟ କର୍ମଚାରୀମାନେ ଏହା ଦର୍ଶାଇଛନ୍ତି।
ଏହି ଖବର ଜାଣିବା ପରେ ବ୍ଲକର ସେକ୍ସନ ଅଫିସର ରାମଜିତ ମାରାଣ୍ଡିଙ୍କ ସମେତ କେତେକ କର୍ମଚାରୀ ସିଡିଓଙ୍କୁ ଭେଟି ପ୍ରଶାନ୍ତଙ୍କୁ ନିଲମ୍ବନ ନ କରିବାକୁ ନିବେଦନ କରିଥିବା ବେଳେ ସିଡିଓ ସେମାନଙ୍କୁ ଜାତିଆଣ ଆକ୍ଷେପ କରି ଦୁର୍ବ୍ୟବହାର କରିଥିବା ସେମାନେ କହିଛନ୍ତି। ଏହାକୁ ନେଇ ବ୍ଲକ ଓ ତହସିଲ କର୍ମଚାରୀ ସଂଘର ଏକ ମିଳିତ ବୈଠକ ଗୁରୁବାର ଡକାଯାଇଥିଲା। ଦୁଇଦିନ ମଧ୍ୟରେ ଉକ୍ତ ପିଅନଙ୍କ ନିଲମ୍ବନ ଆଦେଶ ପ୍ରତ୍ୟାହାର କରା ନ ଗଲେ ବ୍ଲକ ଓ ତହସିଲ କର୍ମଚାରୀମାନେ ଆନ୍ଦୋଳନ ସହ ଧାରଣାରେ ବସିବେ ବୋଲି ଏକ ଲିଖିତ ଅଭିଯୋଗ ମାଧ୍ୟମରେ ଜିଲାପାଳଙ୍କୁ ଅବଗତ କରିଛନ୍ତି। ଏନେଇ ଏମ୍ପି, ବାସୁଦେବପୁର ବିଧାୟକ, ଭଦ୍ରକ ସିଡିଓ, ବିଡିଓ, ବ୍ଲକ ଅଧ୍ୟକ୍ଷ ଓ ମିଳିତ କର୍ମଚାରୀ ସଂଘ ସମ୍ପାଦକଙ୍କୁ ଅବଗତ କରାଯାଇଛି।
ଏ ସମ୍ପର୍କରେ ପ୍ରଶାନ୍ତ କହିଛନ୍ତି, ସିଡିଓଙ୍କ ସେବାରେ ତାଙ୍କର କୌଣସି ତ୍ରୁଟି ହୋଇନାହିଁ। ତାଙ୍କୁ ନିଲମ୍ବିତ କରାଯିବା ଘଟଣାରେ ସେ ମର୍ମାହତ। ଉକ୍ତ ଆଦେଶ ପ୍ରତ୍ୟାହାର ପାଇଁ ସେ ନିବେଦନ କରିଛନ୍ତି। ସିଡିଓଙ୍କ ଅସନ୍ତୋଷ ଆଧାରରେ ପିଅନଙ୍କୁ ନିଲମ୍ବନ କରିଥିବା ବିଡିଓ ରାଉତ କହିଛନ୍ତି। ଏନେଇ ସିଡିଓ ପ୍ରତାପ ପ୍ରୀତିମୟଙ୍କୁ ପଚାରିବାରୁ ଉକ୍ତ ପିଅନଙ୍କୁ ସେ ତାଙ୍କ ବ୍ୟାଗ୍ ଓ ଡାଏରୀ ଧରିବା ପାଇଁ କହିବାରୁ ସେ ମନା କରିବା ସହ ଓଲଟା ତାଙ୍କ ବ୍ୟାଗ୍ ଧରିବାକୁ କହି ଦୁର୍ବ୍ୟବହାର କରିଥିଲେ ବୋଲି କହିଛନ୍ତି।
