କେନ୍ଦ୍ର କ୍ୟାବିନେଟ୍ର ନୂଆ ଏକୀକୃତ ପେନ୍ସନ ଯୋଜନା(ୟୁପିଏସ୍)କୁ ନେଇ ଚର୍ଚ୍ଚା ଜୋର ଧରିଛି। ପୁରୁଣା ପେନ୍ସନ ଯୋଜନା(ଓପିଏସ୍) ଏବଂ ଜାତୀୟ ପେନ୍ସନ ଯୋଜନା(ଏନ୍ପିଏସ୍)କୁ ଏକାଠି ବିଚାରକୁ ନେଇ ଏହା ଗଠନ କରାଯାଇଥିବା କୁହାଯାଉଛି। ପ୍ରକୃତରେ ଏଥିରେ କିଛି ନୂଆ ଲାଭ ମିଳୁଛି ନା ଏହା କେବଳ ପୁରୁଣା ସମସ୍ୟାଭିତ୍ତିକ ବିଚାରର ଏକ ପୁନଃ ସଂସ୍କରଣ? କୁହାଯାଉଛି, ୟୁପିଏସ୍ ଅଧୀନରେ ସରକାରୀ ଚାକିରିଆମାନେ ଏକ ଗ୍ୟାରେଣ୍ଟିଯୁକ୍ତ ପେନ୍ସନ ପାଇବେ। ଏଥିରେ ସରକାରଙ୍କ ଅଂଶଧନ ୧୪%ରୁ ୧୮.୫ %କୁ ବୃଦ୍ଧି ପାଇଛି। ଏହା ଯୋଗୁ କେବଳ ପ୍ରଥମ ବର୍ଷରେ ୬,୨୫୦ କୋଟି ଟଙ୍କା ବ୍ୟୟ ହେବ ବୋଲି ଆକଳନ କରାଯାଉଛି। ଆବଶ୍ୟକ ମାସିକ ଯୋଗଦାନକୁ ନେଇ ୟୁପିଏସ୍ରେ ବ୍ୟବସ୍ଥା ରଖାଯାଇଛି। ହେଲେ ଅନେକ ପର୍ଯ୍ୟବେକ୍ଷକଙ୍କ ମତରେ ବିତ୍ତୀୟ ବିପଦ ଏଡ଼ାଇବା ଲାଗି ଏହା ଏକ ଚତୁର ପଦକ୍ଷେପ। ପେନ୍ସନ ନିଅଣ୍ଟିଆକୁ ପୂରଣ କରିବାର ଚାପ ବଜେଟ ଉପରେ ରହିପାରେ। ଏଭଳି ବଜେଟକୁ ଏଡ଼ାଇବା ଲାଗି ୨୦୦୪ରେ ସଂସ୍କାର ଅଣାଯାଇଥିଲା। ଏବେ ୟୁପିଏସ୍ ସମାନ ପ୍ରକାର ବିପଦ ଆଣିପାରେ ସେମାନଙ୍କ ମତ। ୟୁପିଏସ୍କୁ ନେଇ କର୍ମଚାରୀମାନେ ବିଭାଜିତ ହୋଇଯାଇଛନ୍ତି। ଅନେକ କର୍ମଚାରୀ ସଂଘ ଯୁକ୍ତି ବାଢ଼ିିଛନ୍ତି ଯେ, ଉଭୟ ଏନ୍ପିଏସ୍ ଓ ୟୁପିଏସ୍ ପାରମ୍ପରିକ ଓପିଏସ୍ ତୁଳନାରେ ଯଥେଷ୍ଟ ନୁହେଁ। ଏଣୁ ସେମାନେ ଏହାର ପୁନର୍ଗଠନ ଚାହଁିଛନ୍ତି। ପ୍ରଶ୍ନ ଉଠୁଛି, ପ୍ରକୃତରେ ୟୁପିଏସ୍ରେ କିଛି ଉନ୍ନତି ଅଣାଯାଇଛି ନା ଆମେ ଚକଚକିଆ ନୂତନ ପ୍ୟାକେଜିଂରେ ପୁରୁଣା ଚିନ୍ତାଧାରାକୁ ପରିମାର୍ଜିତ କରିଛୁ? ଦୁଇଟିରୁ ଯେକୌଣସିଟି ବି ହେଉ, କିନ୍ତୁ ଏହା ସତ୍ୟ ଯେ, ଯଦି ଏହା ତ୍ରୁଟିପୂର୍ଣ୍ଣ ହୁଏ, ତେବେ ଟିକସଦାତଙ୍କୁ ପେନ୍ସନ ବ୍ୟୟ ବୋଝ ଉଠାଇବାକୁ ପଡ଼ିବ। ଆମେ ଏକ ବିପଦକୁ ବରଣ କରିବାକୁ ପ୍ରସ୍ତୁତ ହେଉଛୁ କି?
ନେତୃତ୍ୱ ପରିବର୍ତ୍ତନ
ନିକଟରେ ଅର୍ଥ ମନ୍ତ୍ରଣାଳୟର ଶୀର୍ଷ ପଦବୀଗୁଡ଼ିକରେ ହୋଇଥିବା ଅଦଳବଦଳ ଅନେକଙ୍କୁ ଦ୍ୱନ୍ଦ୍ୱରେ ପକାଇଥିଲା। ଗତ ୩ ମାସରେ ପୃଥକ୍ ଭାବେ ୩ଜଣ ରାଜସ୍ବ ସଚିବ ଭଳି ଗୁରୁତ୍ୱପୂର୍ଣ୍ଣ ପଦବୀରେ ନିଯୁକ୍ତ ହୋଇଛନ୍ତି। ଗତବର୍ଷ ଡିସେମ୍ବରରେ ଅପ୍ରତ୍ୟାଶିତ ଭାବେ ଆର୍ବିଆଇ ଗଭର୍ନର ଭାବେ ସଞ୍ଜୟ ମାଲହୋତ୍ରାଙ୍କୁ ନିଯୁକ୍ତ କରାଯିବା ଯୋଗୁ ଅର୍ଥ ମନ୍ତ୍ରଣାଳୟର ରାଜସ୍ବ ସଚିବ ପଦବୀ ଖାଲି ରହିଥିଲା। ଫଳରେ ଆଥିର୍ର୍କ ବ୍ୟାପାର ସଚିବ ଅଜୟ ସେଠ୍ଙ୍କୁ ରାଜସ୍ବ ବିଭାଗର ଅତିରିକ୍ତ ଦାୟିତ୍ୱ ନେବାକୁ ପଡ଼ିଲା। ପରେ ଅରୁନିଶ୍ ଚାଓ୍ବାଲାଙ୍କୁ ରାଜସ୍ବ ସଚିବ ଭାବେ ନିଯୁକ୍ତ କରାଯାଇଥିଲା। କିନ୍ତୁ ୨ ସପ୍ତାହରୁ କମ୍ ସମୟ ରହିବା ପରେ ତାଙ୍କୁ ଡିଆଇପିଏଏମ୍କୁ ସ୍ଥାନାନ୍ତର କରାଯାଇଥିଲେ। ଶେଷରେ ତୁହିନକାନ୍ତ ପାଣ୍ଡେ ରାଜସ୍ବ ସଚିବ ଦାୟିତ୍ୱ ବହନ କରିଛନ୍ତି। ଜଟିଳ ସମୟରେ ଏକ ଗୁରୁତ୍ୱପୂର୍ଣ୍ଣ ମନ୍ତ୍ରଣାଳୟରେ ଏଭଳି ଦ୍ରୁତ ଅଦଳବଦଳ କେବେ ବି ସାଧାରଣ ବିଷୟ ନୁହେଁ। କେନ୍ଦ୍ର ବଜେଟର ପ୍ରମୁଖ ଅଂଶ ଭାବେ ଟିକସ ନୀତି ଚିଠା ପ୍ରସ୍ତୁତ ଏବଂ ରାଜସ୍ବ ଆକଳନରେ ରାଜସ୍ବ ସଚିବଙ୍କର ପ୍ରମୁଖ ଭୂମିକା ଥାଏ। ତେବେ ବାରମ୍ବାର ନେତୃତ୍ୱ ପରିବର୍ତ୍ତନ ଯୋଗୁ ନୀତିରେ ଅସଙ୍ଗତି ସୃଷ୍ଟିହେବା ସହ ବିତ୍ତୀୟ ଯୋଜନାର ରଣନୀତିକ ଦିଗ ପ୍ରଭାବିତ ହୋଇପାରେ। ଏଭଳି ବ୍ୟାଘାତ ଆର୍ଥିକ ମନ୍ତ୍ରଣାଳୟ ମଧ୍ୟରେ ବଡ଼ ସମସ୍ୟାର ଏକ ସଙ୍କେତ କି? ନାଗରିକ ଭାବରେ, ଆମେ କେବଳ ଆଶା କରିବା ଯେ, ଏହି ଅଦଳବଦଳଗୁଡ଼ିକ ଏକ ଚିନ୍ତାଶୀଳ, ସ୍ଥାୟୀ ତଥା ଅଭିବୃଦ୍ଧିଶୀଳ ବଜେଟ ଉପସ୍ଥାପନ କରିବାରେ ସରକାରଙ୍କ ଦକ୍ଷତାକୁ ବିଭ୍ରାନ୍ତ ନ କରୁ।
ପ୍ରଦୂଷଣ ବୋର୍ଡରେ ଖାଲି ପଦବୀ
ସାରା ଭାରତରେ ପ୍ରଦୂଷଣ ନିୟନ୍ତ୍ରଣ ବୋର୍ଡଗୁଡ଼ିକରେ କର୍ମଚାରୀ ସଙ୍କଟ ଲାଗିରହିଛି। ଏବେ ସୁଦ୍ଧା ୧୦ ପ୍ରତିଶତରୁ କମ୍ ପଦବୀ ପୂରଣ ହୋଇଛି। କେନ୍ଦ୍ରୀୟ ପ୍ରଦୂଷଣ ନିୟନ୍ତ୍ରଣ ବୋର୍ଡ (ସିପିସିବି) ନିକଟରେ ନ୍ୟାଶନାଲ ଗ୍ରୀନ୍ ଟ୍ରିବ୍ୟୁନାଲ(ଏନ୍ଜିଟି)କୁ ଜଣାଇଛି, ୧୨ ରାଜ୍ୟ ଓ ଦୁଇଟି କେନ୍ଦ୍ରଶାସିତ ଅଞ୍ଚଳ(ୟୁଟି)ରେ ଖାଲିଥିବା ୨,୨୨୮ ପଦବୀ ମଧ୍ୟରୁ କେବଳ ୨୬୭ ପୂରଣ ହୋଇଛି। ଏପରିକି ୧୬ ରାଜ୍ୟ ଓ ୬ ୟୁଟିର ବୋର୍ଡ ସେମାନଙ୍କ ପ୍ରୋଗ୍ରେସ ରିପୋର୍ଟ ଦାଖଲ କରିନାହାନ୍ତି। ନିଯୁକ୍ତିରେ ସ୍ଥାଣତାକୁ ଲକ୍ଷ୍ୟକରି ଏନ୍ଜିଟିକୁ ଏହା ଉପରେ ପଦକ୍ଷେପ ନେବାକୁ ପଡ଼ିଥିଲା ଏବଂ ପଞ୍ଜାବ, ହରିୟାଣା, ଦିଲ୍ଲୀ, ରାଜସ୍ଥାନ ଓ ଉତ୍ତରପ୍ରଦେଶ ଭଳି ରାଜ୍ୟକୁ ବାଦ୍ଦେଇ(ଏହିସବୁ ରାଜ୍ୟ ସୁପ୍ରିମକୋର୍ଟଙ୍କ ନିରୀକ୍ଷଣ ପରିସରଭୁକ୍ତ) ଖାଲି ପଦବୀଗୁଡ଼ିକୁ ପୂରଣ କରିବାକୁ ୩୦ ଏପ୍ରିଲ ୨୦୨୫କୁ ଶେଷ ସମୟସୀମା ଭାବେ ଧାର୍ଯ୍ୟ କରିଥିଲା। ତେବେ ରାଜ୍ୟଗୁଡ଼ିକ କ’ଣ କରିଛନ୍ତି ତା’ଉପରେ ଦୃଷ୍ଟି ପକାଇବା। ଆସାମ, ପଞ୍ଜାବ, ହରିୟାଣା ଓ ରାଜସ୍ଥାନ ମୋଟ ୧୬୭ ପଦବୀ ପୂରଣ କରିବାକୁ ସକ୍ଷମ ହୋଇଛନ୍ତି। ରାଜସ୍ଥାନରେ ଖାଲିଥିବା ୩୯୫ ପଦବୀରୁ ୯୩ ପୂରଣ କରିଛି। ଏହାସହ ଏହିସବୁ ରାଜ୍ୟ ଜୁନିୟର ଆସିଷ୍ଟାଣ୍ଟ ପଦବୀ ପାଇଁ ଏକ ପରୀକ୍ଷା କରିଥିବାରୁ ଅବଶିଷ୍ଟ ପଦବୀ ପୂରଣ ହେବ ବୋଲି ଆଶା କରାଯାଉଛି। ପଞ୍ଜାବରେ ଖାଲିଥିବା ୨୩୪ ପଦବୀରୁ ୨୬ଟିରେ ନିଯୁକ୍ତି ଦିଆଯାଇଛି। ସେଠାରେ ୧୪୮ ପଦବୀ ପାଇଁ ହୋଇଥିବା ପରୀକ୍ଷାର ଫଳାଫଳ ଏ ପର୍ଯ୍ୟନ୍ତ ପ୍ରକାଶ ପାଇନାହିଁ। କେବଳ ଅରୁଣାଚଳ ପ୍ରଦେଶ, ନାଗାଲାଣ୍ଡ ଓ ଲାକ୍ଷାଦ୍ୱୀପରେ ପ୍ରଦୂଷଣ ନିୟନ୍ତ୍ରଣ ବୋର୍ଡର ସବୁ ପଦବୀରେ କର୍ମଚାରୀ ଅଛନ୍ତି।
Email: dilipcherian@gmail.com
