କଟକ,୩।୪(ଶିଳ୍ପା ପ୍ରିୟଦର୍ଶିନୀ):ଭାଜପା ୧୧୨ ବିଧାନସଭା ଆସନରେ ପ୍ରାର୍ଥୀଙ୍କ ନାମ ମଙ୍ଗଳବାର ଘୋଷଣା କରିଛି। ଏଥିମଧ୍ୟରୁ କଟକ ଜିଲାର ୯ଟି ନିର୍ବାଚନମଣ୍ଡଳୀ ମଧ୍ୟରୁ ୭ଟି ତଥା ଚୌଦ୍ୱାର-କଟକରୁ ନୟନ କିଶୋର ମହାନ୍ତି, କଟକ ସଦରରୁ ପ୍ରକାଶ ସେଠୀ, ବାଙ୍କୀରୁ ତୁଷାରକାନ୍ତ ଚକ୍ରବର୍ତ୍ତୀ, ଆଠଗଡରୁ ଅଭୟ ବାରିକ, ନିଆଳିରୁ ଛବି ମଲ୍ଲିକ, ବଡମ୍ବାରୁ ସମ୍ବିତ ତ୍ରିପାଠୀ ଓ ମାହାଙ୍ଗାରୁ ସୁମନ୍ତ ଘଡେଇଙ୍କ ନାଁ ଏବେ ସାମ୍ନାକୁ ଆସିଛି। ୭ଟି ନିର୍ବାଚନମଣ୍ଡଳୀ ମଧ୍ୟରୁ ଦୁଇଟି ତଥା ଚୌଦ୍ୱାର-କଟକ ଓ ନିଆଳି ନିର୍ବାଚନ ମଣ୍ଡଳୀରେ ପୁରୁଣା ଚେହେରାକୁ ରିପିଟ କରିଛି ଦଳ। ତେବେ ଚୌଦ୍ୱାର-କଟକରୁ ନୟନ ମହାନ୍ତି ୧୯୯୫ ମସିହାରେ ନିର୍ବାଚନ ଲଢ଼ିଥିଲେ। ପରେ ୧୯୯୯ ମସିହାରେ ଦଳ ତାଙ୍କୁ ବ୍ରେକ ଦେଇଥିଲା। ପରେ ୨୦୦୪, ୨୦୦୯, ୨୦୧୪, ୨୦୧୯ ମସିହାରେ ସେ ପୁନର୍ବାର ନିର୍ବାଚନ ରଣକ୍ଷେତ୍ରକୁ ଓହ୍ଲାଇଥିଲେ। ଚଳିତଥର ଷଷ୍ଠଥର ପାଇଁ ଦଳ ତାଙ୍କ ଉପରେ ଆସ୍ଥା ପ୍ରକଟ କରି ଟିକେଟ ଦେଇଛି। ସେହିପରି ୨୦୧୯ରେ ନିଆଳି ନିର୍ବାଚନ ମଣ୍ଡଳୀରୁ ପ୍ରଥମକରି ଟିକେଟ ପାଇଥିଲେ ଛବି ମଲ୍ଲିକ ଏବଂ ୨୦୨୪ରେ ଦ୍ୱିତୀୟ ଥର ପାଇଁ ଦଳ ତାଙ୍କ ଉପରେ ଆସ୍ଥା ପ୍ରକଟ କରିଛି। ସେହିପରି ଅନ୍ୟ ୫ଟି ନିର୍ବାଚନ ମଣ୍ଡଳୀରେ ନୂଆ ଚେହେରା ୨୦୨୪ ନିର୍ବାଚନରେ ଦଳ ସାମ୍ନାକୁ ଆଣିଛି। ସେମାନଙ୍କ ମଧ୍ୟରୁ ବାଙ୍କୀ ବିଧାୟକ ପ୍ରାର୍ଥୀ ତୁଷାରକାନ୍ତ ଚକ୍ରବର୍ତ୍ତୀ ୧୦ ବର୍ଷ ହେବ ଭାଜପା ସହ ଯୋଡ଼ି ହୋଇ କାର୍ଯ୍ୟ କରିଆସୁଛନ୍ତି। ସେହିପରି ବଡମ୍ବାର ବିଧାୟକ ପ୍ରାର୍ଥୀ ସମ୍ବିତ ତ୍ରିପାଠୀ ଗତ ୬ମାସ ହେବ ଭାଜପାରେ ଯୋଗଦେଇ କାର୍ଯ୍ୟ କରୁଛନ୍ତି। ଆଠଗଡର ବିଧାୟକ ପ୍ରାର୍ଥୀ ଅଭୟ ବାରିକ ଓ ମାହାଙ୍ଗାର ବିଧାୟକ ପ୍ରାର୍ଥୀ ସୁମନ୍ତ ଘଡେଇ ଚଳିତ ନିର୍ବାଚନ ପୂର୍ବରୁ ଦଳରେ ଯୋଗଦେଇଛନ୍ତି। କଟକ ସଦରର ବିଧାୟକ ପ୍ରାର୍ଥୀ ପ୍ରକାଶ ସେଠୀ ଜଣେ ସଫ୍ଟୱେର ଇଞ୍ଜିନିୟର। ସେ ଚାକିରି ଛାଡି ଏବେ ବିଧିବଦ୍ଧ ଭାବେ ଦଳରେ ଯୋଗ ଦେଇଛନ୍ତି। ହେଲେ ୨୦୧୯ରୁ ଦଳରେ ନ ଥାଇ ମଧ୍ୟ ସେ ଦଳ ପାଇଁ କାର୍ଯ୍ୟ କରିଆସୁଛନ୍ତି। କଟକ ଜିଲାର ୭ଟି ନିର୍ବାଚନମଣ୍ଡଳୀ ମଧ୍ୟରୁ ବାରବାଟୀ-କଟକ ଓ ସାଲେପୁର ନିର୍ବାଚନମଣ୍ଡଳୀର ପ୍ରାର୍ଥୀଙ୍କ ନାଁ ଏବେ ଦଳ ଘୋଷଣା କରି ନ ଥିବା ବେଳେ ଦଳରେ ଅଙ୍କକଷା ଛିଣ୍ଡୁ ନ ଥିବା ଏବଂ ବିଜେଡି ପରି ନୀତି ଭାଜପା ଆପଣାଉଥିବା ନେଇ ଲୋକେ ଆଲୋଚନା କରୁଛନ୍ତି। ବାରବାଟୀ-କଟକ ପାଇଁ ପୂର୍ବରୁ ମାଳମାଳ ଆଶାୟୀଙ୍କ ଲମ୍ବା ତାଲିକା ରହିଛି। ହେଲେ ଏବେ ବିଜେଡି ଛାଡି ପଦ୍ମ ଧରିଥିବା ଅରିନ୍ଦମ ରାୟ ଏବଂ ଅନୁଭବ ମହାନ୍ତିଙ୍କ ନାମ ଆଶାୟୀଙ୍କ ତାଲିକାରେ ଅନ୍ତର୍ଭୁକ୍ତ ହୋଇଛି। ପୂର୍ବରୁ ଯେଉଁ ନେତା ଓ ନେତ୍ରୀମାନେ ଟିକେଟ ନେଇ ଆଶାୟୀ ରହିଛନ୍ତି ସେମାନଙ୍କ ପାଇଁ ଯେପରି ଏବେ ଅରିନ୍ଦମ ଓ ଅନୁଭବ କଣ୍ଟା ସାଜିଛନ୍ତି ବୋଲି ଲୋକେ ଟୁପୁରୁଟାପୁରୁ ହେଉଛନ୍ତି। ତେବେ ଏନେଇ ଭାଜପା କଟକ ନଗର ସଭାପତି ଲଲାଟେନ୍ଦୁ ବଡୁଙ୍କୁ ପଚାରିବାରୁ ସେ କହିଛନ୍ତି, ନିର୍ବାଚନରେ ବାରବାଟୀ-କଟକ ନିର୍ବାଚନମଣ୍ଡଳୀର ଏକ ଗୁରୁତ୍ୱପୂର୍ଣ୍ଣ ଭୂମିକା ରହିଛି। ଭାଜପାକୁ ବାରବାଟୀ-କଟକର ଭୋଟର ଅଧିକ ଭଲ ପାଇବା ଦେଇ ଆସୁଛନ୍ତି। ତେଣୁ ଆଶା ରହିଛି ଚଳିତ ନିର୍ବାଚନରେ ଅଧିକରୁ ଅଧିକ ଭଲ ପାଇବା ଦେବେ। ଦଳ ଯେବେ ବି ବାରବାଟୀ-କଟକ ପାଇଁ ପ୍ରାର୍ଥୀ ଘୋଷଣା କରିବ ଏବଂ ଯାହା ନାଁ ଘୋଷଣା କରିବ ତାଙ୍କୁ ସମସ୍ତ କର୍ମୀ ସମର୍ଥନ ଦେବୁ।
