ସମ୍ବଲପୁର,୨୫ା୯(ପ୍ରମୋଦ ବହିଦାର):ବର୍ଜ୍ୟବସ୍ତୁ ପରିଚାଳନାରେ ତ୍ରୁଟି ପାଇଁ ବୀର ସୁରେନ୍ଦ୍ର ସାଏ ଆୟୁର୍ବିଜ୍ଞାନ ଓ ଗବେଷଣା ପ୍ରତିଷ୍ଠାନ (ଭିସମାର)କୁ କେନ୍ଦ୍ରୀୟ ପ୍ରଦୂଷଣ ନିୟନ୍ତ୍ରଣ ବୋର୍ଡ ପକ୍ଷରୁ ଜରିମାନା କରାଯାଇଛି। ବର୍ଜ୍ୟବସ୍ତୁ ପରିଚାଳନା ଠିକ୍ ଭାବେ ନ ହୋଇ ପ୍ରଦୂଷଣ ନିୟନ୍ତ୍ରଣ ନିୟମ ଉଲ୍ଲଂଘନ ହେଉଥିବା ଦର୍ଶାଇ ପ୍ରଦୂଷଣ ବୋର୍ଡ ଭିମ୍ସାରକୁ ୧୧ ଲକ୍ଷ ୨୨ ହଜାର ଟଙ୍କା ଅର୍ଥଦଣ୍ଡାଦେଶ ଦେଇଛନ୍ତି। ଏନେଇ ଗତ ସେପ୍ଟେମ୍ବର ୧୦ରେ ବୋର୍ଡ ପକ୍ଷରୁ ଭିମ୍ସାରକୁ ନୋଟିସ ଜାରି କରାଯାଇଥିବା ଜଣାପଡ଼ିଛି। ବର୍ଜ୍ୟବସ୍ତୁ ପରିଚାଳନାର ଠିକ ବ୍ୟବସ୍ଥା କରିବାକୁ ଭିମସାର କର୍ତ୍ତୃପକ୍ଷ ପ୍ରଦୂଷଣ ବୋର୍ଡଙ୍କୁ ୧୫ ଦିନ ସମୟ ମାଗିଥିଲେ। ଉକ୍ତ ୧୫ ଦିନ ମଧ୍ୟରେ କୌଣସି ପ୍ରତିକାର ବ୍ୟବସ୍ଥା କରିବାରେ ବିଫଳ ହେବା କଥାକୁ ସ୍ବୀକାର କରିଛନ୍ତି ଭିମସାର ନିର୍ଦ୍ଦେଶକ ଡା. ଭାବଗ୍ରାହୀ ରଥ। ତେବେ ତାଙ୍କ ଅଧ୍ୟକ୍ଷତାରେ ବିଭାଗୀୟ ଅଧିକାରୀଙ୍କ ବୈଠକ ବସି ଏହାର ପ୍ରତିକାର ବ୍ୟବସ୍ଥା ପାଇଁ ଆଲୋଚନା ହୋଇଥିଲା। ବୈଠକରେ ଅନେକ ବିଚାର ବିମର୍ଷ ପରେ ଭିମ୍ସାରରେ ବର୍ଜ୍ୟବସ୍ତୁ ପରିଚାଳନା ପାଇଁ ଆବଶ୍ୟକ ଭିତ୍ତିଭୂମି ପ୍ରସ୍ତୁତ କରିବାକୁ ଆଉ କିଛି ସମୟ ମାଗିବା ସହ ଜରିମାନା କ୍ଷମା ପାଇଁ ଭିମ୍ସାର କର୍ତ୍ତୃପକ୍ଷ ପ୍ରଦୂଷଣ ନିୟନ୍ତ୍ରଣ ବୋର୍ଡକୁ ଚିଠି ଲେଖି ନିବେଦନ କରିଛନ୍ତି ବୋଲି ନିର୍ଦ୍ଦେଶକ ଡା. ରଥ କହିଛନ୍ତି।
ଭିମ୍ସାରର ବିଭିନ୍ନ ୱାର୍ଡରୁ ନିର୍ଗତ ବର୍ଜ୍ୟବସ୍ତୁକୁ ପରିଚାଳନା ପାଇଁ ରହିଥିବା ଇନ୍ସିରେଟର୍ ମେଶିନ ଠିକ୍ ଭାବେ କାର୍ଯ୍ୟ କରୁନାହିଁ। ଏହା ଦୀର୍ଘ ଦିନ ହେଲା ଖରାପ ହୋଇଥିଲେ ମଧ୍ୟ ଏହାକୁ ଦଦଳା ଯାଇନାହିଁ। ସେହିପରି ବର୍ଯ୍ୟବସ୍ତୁ ପରିଚାଳନା କିଭଳି ହେଉଛି ତାହା ସିସିଟିଭି ମାଧ୍ୟମରେ ପ୍ରଦୂଷଣ ନିୟନ୍ତ୍ରଣ ବୋର୍ଡ ସହ ଯୋଗାଯୋଗରେ ରହିବା ନିୟମ ଥିବାବେଳେ ଏଥିରେ ବ୍ୟତିକ୍ରମ ରହିଛି। ଏହି ସମସ୍ତ ଭିତ୍ତିଭୂମି ପ୍ରସ୍ତୁତ ସମୟ ସାପେକ୍ଷ ହୋଇଥିବାରୁ ଏଥିପାଇଁ ପ୍ରଦୂଷଣ ବୋର୍ଡକୁ ସମୟ ମଗାଯାଇଛି ବୋଲି ନିର୍ଦ୍ଦେଶକ ଡା. ରଥ କହିଛନ୍ତି।
ସମ୍ବଲପୁର ଆଞ୍ଚଳିକ ପ୍ରଦୂଷଣ ନିୟନ୍ତ୍ରଣ ଅଧିକାରୀ ଡ. ସତ୍ୟନାରାୟଣ ନନ୍ଦ କହିଛନ୍ତି ଯେ, ଏସମ୍ପର୍କରେ ବାରମ୍ବାର ଚିଠି ଲେଖାଯିବା ସତ୍ତ୍ୱେ ଭିମସାର କର୍ତ୍ତୃପକ୍ଷ ଏଦିଗରେ ଆବଶ୍ୟକ ପଦକ୍ଷେପ ଗ୍ରହଣ କଲେ ନାହିଁ। ଗତବର୍ଷ ୨୦୨୩ ଅଗଷ୍ଟରେ ପ୍ରଦୂଷଣ ନିୟନ୍ତ୍ରଣ ବୋର୍ଡର ବିଶେଷଜ୍ଞଙ୍କ ଏକ ପ୍ରତିନିଧି ଭିମସାର ଗସ୍ତ କରି ବର୍ଜ୍ୟବସ୍ତୁ ପରିଚାଳନାର ଅନୁଧ୍ୟାନ କରିଥିଲେ। ଏହାବାଦ ଗତ ୨୦୨୪ ଏପ୍ରିଲ ୧ରେ ପ୍ରଦୂଷଣ ବୋର୍ଡ ପକ୍ଷରୁ ଏହାର ରିପୋର୍ଟ ଜାତୀୟ ସବୁଜ ଟ୍ରିବ୍ୟୁନାଲରେ ଦାଖଲ ହୋଇଥିଲା। ଉକ୍ତ ରିପୋର୍ଟରେ ଭିମସାରରେ ହେଉଥିବା ବର୍ଜ୍ୟବସ୍ତୁ ପରିଚାଳନାରେ ଅନେକ ତ୍ରୁଟି ରହିଛି। ଯଦ୍ୱାରା ପ୍ରଦୂଷଣ ବୃଦ୍ଧି ହେଉଛି ବୋଲି ଦର୍ଶାଇ ଯଥାଶୀଘ୍ର ଏହାର ପ୍ରତିକାର ବ୍ୟବସ୍ଥା କରିବାକୁ ପ୍ରଦୂଷଣ ନିୟନ୍ତ୍ରଣ ବୋର୍ଡ ପକ୍ଷରୁ ପତ୍ର ମାଧ୍ୟମରେ ଭିମ୍ସାର କର୍ତ୍ତୃପକ୍ଷଙ୍କୁ ନିର୍ଦ୍ଦେଶ ଦିଆଯାଇଥିଲା। ମାତ୍ର କର୍ତ୍ତୃପକ୍ଷ ଏହାର ଉତ୍ତର ନ ଦେବାରୁ ଗତ ସେପ୍ଟେମ୍ବର ୧୦ରେ ବୋର୍ଡ ପକ୍ଷରୁ ଭିମ୍ସାରକୁ ଜରିମାନା କରି ୧୫ ଦିନ ମଧ୍ୟରେ ପଇଠ କରିବାକୁ ନୋଟିସ ଜାରି କରାଯାଇଥିଲା ବୋଲି ଡ. ନନ୍ଦ କହିଛନ୍ତି।
