ନୂଆଦିଲ୍ଲୀ,୮।୧୦: ୨୦୨୭ରେ ପୁଣିଥରେ ଇଣ୍ଡିଆନ୍ ପ୍ରିମିୟର ଲିଗ୍ (IPL) ଏବଂ ପାକିସ୍ତାନ ସୁପର ଲିଗ୍ (PSL) ମଧ୍ୟରେ ସିଧାସଳଖ ଟକ୍କର ଦେଖିବାକୁ ମିଳିବ । ପାକିସ୍ତାନ କ୍ରିକେଟ୍ ବୋର୍ଡ (PCB) PSLର ୧୨ତମ ସଂସ୍କରଣର ତାରିଖ ଘୋଷଣା କରିଛି । PSL 12 ଆସନ୍ତା ୧୮ ମାର୍ଚ୍ଚରୁ ଆରମ୍ଭ ହୋଇ ୨ ମେ’ରେ ଫାଇନାଲ୍ ସହ ଶେଷ ହେବ।
PCB ପକ୍ଷରୁ କୁହାଯାଇଛି ଯେ, ସମସ୍ତ ଷ୍ଟେକହୋଲ୍ଡର ଏବଂ ପାର୍ଟନରଙ୍କ ସହ ଆଲୋଚନା ପରେ PSL 12 ପାଇଁ ଏହି ତାରିଖ ନିର୍ଦ୍ଧାରଣ କରାଯାଇଛି। ଏହା ପରେ ଖେଳାଳିଙ୍କ ଅକ୍ସନ୍, ରିଟେନସନ୍ ଲିଷ୍ଟ, ଡାଇରେକ୍ଟ ସାଇନିଂ ଏବଂ ଟ୍ରେଡ୍ ସମ୍ପର୍କିତ ଘୋଷଣା ମଧ୍ୟ ହୋଇପାରେ । PSLର ଆୟୋଜନ ସାଧାରଣତଃ ମାର୍ଚ୍ଚରୁ ମେ’ ମଧ୍ୟରେ ହେଉଥିବା ବେଳେ, IPL ମଧ୍ୟ ଏହି ସମୟରେ ଆୟୋଜିତ ହୁଏ । ଫଳରେ ୨୦୨୭ରେ ମଧ୍ୟ ଉଭୟ ଲିଗ୍ର ଶେଡ୍ୟୁଲ୍ରେ ଟକ୍କର ହେବା ପ୍ରାୟ ନିଶ୍ଚିତ। ୨୦୨୫ରେ ପ୍ରଥମଥର ପାଇଁ IPL ଏବଂ PSLର ଶେଡ୍ୟୁଲ୍ରେ ସିଧାସଳଖ ଟକ୍କର ଦେଖାଯାଇଥିଲା। ୨୦୨୬ରେ ମଧ୍ୟ ସମାନ ସ୍ଥିତି ରହିଥିଲା। ଏବେ ୨୦୨୭ରେ ମଧ୍ୟ ଏହି ଦୁଇ ଲିଗ୍ର ଆୟୋଜନ ସମୟ ଏକାଠି ପଡ଼ୁଛି ।
PSL 11 ଗତ ୨୬ ମାର୍ଚ୍ଚରୁ ୩ ମେ’ ପର୍ଯ୍ୟନ୍ତ ଖେଳାଯାଇଥିଲା। ଅନ୍ୟପଟେ IPL 2026 ମାର୍ଚ୍ଚ ୨୮ରୁ ମେ’ ୩୧ ପର୍ଯ୍ୟନ୍ତ ଚାଲିଥିଲା। ଉଭୟ ଲିଗ୍ର ଶେଡ୍ୟୁଲ୍ରେ ଟକ୍କର ସତ୍ତ୍ୱେ PCB ପକ୍ଷରୁ PSL 11 ଫାଇନାଲ୍ରେ ରେକର୍ଡ ଦର୍ଶକ ଉପସ୍ଥିତ ଥିବା ଦାବି କରାଯାଇଥିଲା। PCB ଅନୁସାରେ, ଫାଇନାଲ୍ ମ୍ୟାଚ୍ ଦେଖିବା ପାଇଁ ୩୨,୪୬୧ ଦର୍ଶକ ଷ୍ଟାଡିୟମରେ ଉପସ୍ଥିତ ଥିଲେ। ଏପର୍ଯ୍ୟନ୍ତ IPL 2027ର ଅଫିସିଆଲ୍ ତାରିଖ ଘୋଷଣା ହୋଇନାହିଁ। ତେବେ IPLର ପାରମ୍ପରିକ ମାର୍ଚ୍ଚ-ମେ’ ୱିଣ୍ଡୋକୁ ଦେଖିଲେ, PSL 12 ସହ ଏହାର ସମୟ ଟକ୍କର ହେବାର ସମ୍ଭାବନା ରହିଛି ।
IPL 2027 ପାଇଁ ମିନି ଅକ୍ସନ୍ ଡିସେମ୍ବରରେ ହେବାକୁ ଥିବା ବେଳେ, ଖେଳାଳି ରିଟେନସନ୍ ଲିଷ୍ଟ ଦାଖଲ ପାଇଁ ନଭେମ୍ବର ୧୫ ଡେଡଲାଇନ୍ ରହିଛି। ଏହି ସମୟରେ ବିଶ୍ୱ କ୍ରିକେଟ୍ର ଦୁଇ ପ୍ରମୁଖ ଫ୍ରାଞ୍ଚାଇଜ୍ ଲିଗ୍ର ଟକ୍କର ଯୋଗୁଁ ଖେଳାଳି ଉପଲବ୍ଧତା, ଦର୍ଶକ ଆଗ୍ରହ ଏବଂ ବ୍ରଡକାଷ୍ଟିଂ ବଜାରରେ ପ୍ରତିସ୍ପର୍ଦ୍ଧା ନେଇ ଚର୍ଚ୍ଚା ବଢ଼ିବା ସମ୍ଭାବନା ରହିଛି ।