ନୂଆଦିଲ୍ଲୀ,୮।୨: ଭାରତ ବର୍ତ୍ତମାନ ସମୟରେ ରୁଷିଆରୁ ଅସ୍ତ୍ରଶସ୍ତ୍ର ସହ ତୈଳ ମଧ୍ୟ ଆମଦାନୀ କରୁଛି। ଏପରିକି ଉଭୟ ତୈଳ ଓ ଅସ୍ତ୍ରଶସ୍ତ୍ର ଭଳି ଆମଦାନୀ ସାମଗ୍ରୀ ପାଇଁ ଭାରତ ଦେୟ ପୈଠ ମଧ୍ୟ ଆରମ୍ଭ କରିଛି। ଭାରତ ସରକାର ବର୍ତ୍ତମାନ ପ୍ରାୟ ୨୮,୦୦୦ କୋଟି ଟଙ୍କାର ଅସ୍ତ୍ରଶସ୍ତ୍ର ବାବଦକୁ ରୁଷିଆକୁ ଦେବ। ଏହା ପୂର୍ବରୁ ଭାରତ ପକ୍ଷରୁ ରୁଷିଆକୁ କିଛି ପ୍ରସ୍ତାବ ଦେଇଥିବା ଜଣାପଡ଼ିଛି। ଏପରିକି ଭାରତ ସରକାର ରୁବଲ ମାଧ୍ୟମରେ ସମସ୍ତ ଦେୟ ପୈଠ କରିବାକୁ ଚାହୁଁଛନ୍ତି। ଅଥବା ୩ଟି ଉପାୟରେ ଦେୟ ପୈଠ କରିବାକୁ ରୁଷିଆକୁ ପ୍ରସ୍ତାବ ଦିଆଯାଇଛି। ସେହିଭଳି ପ୍ରଥମ ଉପାୟଟି ହେଉଛି ରୁଷିଆକୁ ତା’ ନିଜ ମୁଦ୍ରା ରୁବଲରେ ପୈଠ କରାଯାଉଥିବା ବେଳେ ବାକି ଚାଇନା ମୁଦ୍ରା ୟୁଆନ ଓ ତୃତୀୟ ୟୁଏଇର ଦିର୍ହାମରେ ଦିଆଯାଉଛି ବୋଲି ଏକ ଜାତୀୟ ଗଣମାଧ୍ୟମରେ ଆଲୋକପାତ କରାଯାଇଛି। ସେହିପରି ଗଣମାଧ୍ୟମର ରିପୋର୍ଟ ଅନୁସାରେ ଦୁବାଇରେ ବସିଥିବା ବ୍ୟବସାୟୀଙ୍କ ମାଧ୍ୟମରେ କ୍ରୟ ହୋଇଥିବା ରୁଷୀୟ ତୈଳ ଲାଗି ଭାରତୀୟ ରିଫାଇନେରିମାନେ ଡଲାର ବଦଳରେ ଦିର୍ହାମରେ ବର୍ତ୍ତମାନ ପୈଠ କରୁଛନ୍ତି। ଏପରିକି ତୈଳ ବ୍ୟତୀତ ରୁଷିଆଠାରୁ ପ୍ରାୟ ୨୮ହଜାର କୋଟି ଟଙ୍କାର ଅସ୍ତ୍ରଶସ୍ତ୍ର ମଧ୍ୟ ଭାରତ କ୍ରୟ କରିଛି। ଅପରପକ୍ଷରେ ଭାରତ ରୁବଲ ଅଥବା ଦିର୍ହାମ ଜରିଆରେ ରୁଷିଆରୁ କ୍ରୟ କରାଯାଉଥିବା ଅସ୍ତ୍ରଶସ୍ତ୍ର ଓ ତୈଳ ଲାଗି ଦେୟ ପୈଠ କରିବ ବୋଲି ଜଣାପଡ଼ିଛି। ଏପରିକି ଗତବର୍ଷ ଉଭୟ ଦେଶ ମଧ୍ୟରେ ହୋଇଥିବା ଦ୍ୱିପାକ୍ଷିକ ବାଣିଜି୍ୟକ ବୈଠକରେ ରୁଷିଆରୁ ଭାରତ ସରକାର ଡଲାର ବଦଳରେ ଅନ୍ୟ ମୁଦ୍ରାରେ ଆମଦାନୀ ସାମଗ୍ରୀ ଦେୟ ପୈଠ କରିବା ଲାଗି ନିଷ୍ପତ୍ତି ହୋଇଥିଲା। ଉଭୟ ଦେଶର ପ୍ରତିରକ୍ଷା ଓ ଅର୍ଥ ମନ୍ତ୍ରଣାଳୟ ଅଧିକାରୀଙ୍କ ମଧ୍ୟରେ ହୋଇଥିବା ଜରୁରିକାଳୀନ ବୈଠକରେ ମଧ୍ୟ ଦେୟ ପୈଠ ନେଇ ବିସ୍ତୃତ ଆଲୋଚନା କରାଯାଇଥିଲା। ଉଭୟ ଦେଶର ଅଧିକାରୀ ଓ ସରକାରଙ୍କ ସହମତିରେ ନିଷ୍ପତ୍ତି ହୋଇଥିବା ବେଳେ ଭାରତୀୟ ରିଜର୍ଭ ବ୍ୟାଙ୍କ (ଆର୍ବିଆଇ)ଙ୍କ ସମ୍ମୁଖରେ ଉକ୍ତ ପ୍ରସଙ୍ଗ ଉଠାଇବାକୁ ବି ନିଷ୍ପତ୍ତି ହୋଇଥିଲା। ସେହିଭଳି ଉକ୍ତ ନିଷ୍ପତ୍ତି ଅନୁସାରେ ରୁଷିଆକୁ କରାଯାଉଥିବା ପୈଠରୁ ଡଲାରକୁ ଦୂରେଇ ରଖିବାକୁ କୁହାଯାଇଥିଲା। ଉଲ୍ଲେଖଯୋଗ୍ୟ, ୟୁକ୍ରେନ୍ ବିରୋଧରେ ରୁଷିଆର ଯୁଦ୍ଧ ଲାଗି ଆମେରିକା ଓ ପାଶ୍ଚାତ୍ୟ ଦେଶଗୁଡ଼ିକ ରୁଷିଆ ଉପରେ ନାନା କଟକଣା ଜାରି କରିଛନ୍ତି।
