ବଲାଙ୍ଗୀର ଅଫିସ,୨୩।୪: ବଲାଙ୍ଗୀର ମ୍ୟୁନିସିପାଲିଟି ଅଫିସ କର୍ମଚାରୀ କୋଭିଡ୍ ମହାମାରୀ ସମୟରେ ବାର୍ଦ୍ଧକ୍ୟ ଭତ୍ତା ବଣ୍ଟନ କରିବାକୁ ନେଇଥିବା ଲକ୍ଷାଧିକ ଟଙ୍କା ଆତ୍ମସାତ୍ କରିଥିବା ଘଟଣା ଏବେ ଅଡିଟ୍ ବେଳେ ଧରାପଡିଛି। ଏହି ଘଟଣା ଧରାପଡିବା ପରେ ମ୍ୟୁନିସିପାଲିଟି ନିର୍ବାହୀ ଅଧିକାରୀ ସମ୍ପୃକ୍ତ କର୍ମଚାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ କରିବା ପରିବର୍ତ୍ତେ ରିକଭରି ଆଦେଶ ଦେଇଥିଲେ। ମ୍ୟୁନିସିପାଲିଟିର ୫ ଜଣ କର୍ମଚାରୀ ଟଙ୍କା ରିକଭରି ଦେଇଥିବା ସମ୍ପର୍କରେ ଜାଣିବା ପରେ ଜିଲାପାଳ ଚଞ୍ଚଳ ରାଣା ସେମାନଙ୍କ ବିରୋଧରେ ନିଲମ୍ବନ ଆଦେଶ ଜାରି କରିଛନ୍ତି। ପ୍ରାୟ ୩ ବର୍ଷ ତଳର ଏହି ଘଟଣାକୁ ଚପାଇ ଦିଆଯାଇଥିବାବେଳେ ଏବେ ଅଡିଟ୍ ସମୟରେ ଖୋଲିଛି ସରକାରୀ ଟଙ୍କା ଆତ୍ମସାତ୍ର କଳା କାରମାନା। ତେବେ ଘଟଣା ସମ୍ପର୍କରେ ମୁହଁ ଖୋଲୁନାହାନ୍ତି ନିର୍ବାହୀ ଅଧିକାରୀ।
ମିଳିଥିବା ସୂଚନା ମୁତାବକ ୨୦୨୦-୨୧ କୋଭିଡ୍ ମହାମାରୀ ଲକ୍ଡାଉନ୍ ସମୟରେ ବାର୍ଦ୍ଧକ୍ୟ ଭତ୍ତା ବଣ୍ଟନ କାର୍ଯ୍ୟକ୍ରମ ପ୍ରଭାବିତ ହୋଇଥିଲା। ଲୋକେ ଘର ଭିତରେ ମାସ ମାସ ଧରି ରହିଥିବାରୁ ମ୍ୟୁନିସିପାଲିଟି କର୍ମଚାରୀଙ୍କୁ ଭତ୍ତାବଣ୍ଟନ କାର୍ଯ୍ୟକ୍ରମ ସୁଚାରୁରୂପେ ସମ୍ପାଦନ କରିବାକୁ ନିର୍ଦ୍ଦେଶ ଦିଆଯାଇଥିଲା। ତେବେ ଏହାକୁ କେତେକ କର୍ମଚାରୀ ସୁଯୋଗ ଭାବି ବହୁ ହିତାଧିକାରୀଙ୍କ ଭତ୍ତାଟଙ୍କା ଆତ୍ମସାତ୍ କରିଦେଇଥିଲେ। ୨୦୨୦ ମସିହାରୁ ଏହି ସରକାରୀ ଟଙ୍କା ଆତ୍ମସାତ୍ ଘଟଣା ଘଟିସାରିଥିଲେ ମଧ୍ୟ ଏହାକୁ ଚପାଇ ରଖାଯାଇଥିଲା। ପ୍ରାରମ୍ଭିକ ସୂଚନାରୁ ପ୍ରାୟ ୧୨ଲକ୍ଷ ଟଙ୍କା ଆତ୍ମସାତ୍ କରାଯାଇଥିବା କୁଆଡେ ଅଡିଟ୍ ବେଳେ ଜଣାପଡିଛି। ଦୀର୍ଘ ତିନିବର୍ଷ ପରେ ମ୍ୟୁନିସିପାଲିଟି କାର୍ଯ୍ୟାଳୟର ଅଡିଟ୍ ବେଳେ ଏହି ଘଟଣା ଜଣାପଡିବାରୁ ନିର୍ବାହୀ ଅଧିକାରୀ ସମ୍ପୃକ୍ତ କର୍ମଚାରୀଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ କରିବା ଛାଡି ରିକଭରି କରିବାକୁ କୁଆଡେ ନିର୍ଦ୍ଦେଶ ଦେଇଥିଲେ। ଫଳରେ କର୍ମଚାରୀ ଆଶିଷ ମହାପାତ୍ର ୧ଲକ୍ଷ ୫ଶହ ଟଙ୍କା ଏବଂ ଅଶୋକ କୁମ୍ଭାର ୨୦ ହଜାର ଟଙ୍କା ରିକଭରି ଦେଇଥିବା କୁହାଯାଉଛି। ଘଟଣା ସମ୍ପର୍କରେ ଜଣାପଡିବା ପରେ ଜିଲାପାଳ ରାଣା ୫ ଜଣ ଦୋଷୀ କର୍ମଚାରୀଙ୍କୁ ନିଲମ୍ବନ କରିବାକୁ ନିର୍ଦ୍ଦେଶ ଦେଇଛନ୍ତି। ଏହା ସହିତ ଏମାନଙ୍କ ବିରୋଧରେ ବହିଷ୍କାର ପ୍ରକ୍ରିୟା ମଧ୍ୟ ଆରମ୍ଭ କରିବାକୁ ନିର୍ଦ୍ଦେଶ ଦେଇଥିବା ଜଣାପଡିଛି। ଘଟଣା ସମ୍ପର୍କରେ ମ୍ୟୁନିସିପାଲିଟି ନିର୍ବାହୀ ଅଧିକାରୀ ସାମିରେଡ୍ଡି ଜୟଶ୍ରୀଙ୍କୁ ତାଙ୍କ ମୋବାଇଲ ଫୋନ ନଂ ୯୯୩୭୯୯୫୮୩୫ରେ ଯୋଗାଯୋଗ କରାଯାଇଥିଲା। ରିଂ ହେବା ସତ୍ତ୍ୱେ ସେ ରିସିଭ ନ କରିବାରୁ ତାଙ୍କ ପ୍ରତିକ୍ରିୟା ମିଳିପାରିନାହିଁ।
