ପାଟଣାଗଡ଼,୩।୮: ବଲାଙ୍ଗୀର ଜିଲା ପାଟଣାଗଡ଼ ଏନଏସିର ଜଣେ ଅବସରପ୍ରାପ୍ତ କର୍ମଚାରୀ ଓ ସିନିୟର ଆସିଷ୍ଟାଣ୍ଡଙ୍କ ମଧ୍ୟରେ ରବିବାର ମୁହାଁମୁହିଁ ହେବା ଚର୍ଚ୍ଚାର ବିଷୟ ହୋଇଛି । ଏ ନେଇ ଥାନାରେ କୌଣସି ପକ୍ଷରୁ ମାମଲା ରୁଜୁ ହୋଇ ନ ଥିବା ଜଣାଯାଇଛି। ପ୍ରକାଶ ଯେ, ଏନଏସିର ଅବସରପ୍ରାପ୍ତ କର୍ମଚାରୀ ବିଭୂତି ଦେହୁରୀଙ୍କ ବକେୟା ତଥା ଗ୍ରାଚ୍ୟୁଇଟି ବାବଦ ବାରମ୍ବାର ଟଙ୍କା ନେଇ କାର୍ଯ୍ୟାଳୟକୁ ଦୌଡ଼ି ନିରାଶ ହୋଇଛନ୍ତି । କାମ ପାଇଁ ସେ ଏନଏସି କାର୍ଯ୍ୟାଳୟର ସିନିୟର ଆସିଷ୍ଟାଣ୍ଡ ପ୍ରିୟବ୍ରତ ମଲ୍ଲିକଙ୍କୁ ଲାଞ୍ଚଦେବା ସତ୍ତ୍ବେ କାମ କରୁ ନ ଥିବା ଅଭିଯୋଗ କରିଛନ୍ତି । ତେଣୁ ସେ ଗତ ୧୪ ତାରିଖ ସପରିବାର ବିଭାଗୀୟ ସଚିବ ଉଷା ପାଢ଼ୀଙ୍କୁ ତାଙ୍କ କାର୍ଯ୍ୟାଳୟରେ ସାକ୍ଷାତକରି ଘଟଣା ବିଷୟରେ ଅବଗତ କରିଥିଲେ । ରବିବାର ପୁଣି ଦେହୁରୀ କାମ ପାଇଁ ଏନଏସି କାର୍ଯ୍ୟନିର୍ବାହୀ ଅଧିକାରୀ ଓ ସିନିୟର ଆସିଷ୍ଟାଣ୍ଡଙ୍କ ପାଖକୁ ଯାଇଥିଲେ । କାର୍ଯ୍ୟ ନିର୍ବାହୀ ଅଧିକାରୀ ଅନୁପସ୍ଥିତ ଥିବାବେଳେ ସିନିୟର ଆସିଷ୍ଟାଣ୍ଡଙ୍କୁ ସାକ୍ଷାତ କରିଥିଲେ । ସେଠାରେ ସିନିୟର ଆସିଷ୍ଟାଣ୍ଡ ୧୦ ହଜାର ଟଙ୍କା ଦାବି କରିଥିଲେ । ଏହାକୁ ନେଇ ଉଭୟଙ୍କ ମଧ୍ୟରେ କଥା କଟାକଟି ପରେ ବଚସା ହୋଇଥିଲା । ଏଥିରେ ଉତକ୍ଷିପ୍ତ ହୋଇ ସିନିୟର ଆସିଷ୍ଟାଣ୍ଡ ମଲ୍ଲିକ ଚପଲ ଉଠାଇ ମାଡ଼ମାରିଥିବା ଦେହୁରୀ ଅଭିଯୋଗ ଆଣିଛନ୍ତି । ଏ ସମ୍ପର୍କରେ ମଲ୍ଲିକଙ୍କୁ ପଚାରିବାରୁ ଅଭିଯୋଗ ଭିତ୍ତିହୀନ, ସେ କୌଣସି ଲାଞ୍ଚ ନେଇନାହାନ୍ତି କି ଦାବି କରିନାହାନ୍ତି ବୋଲି କହିଛନ୍ତି । କାର୍ଯ୍ୟ ନିର୍ବାହୀ ଅଧିକାରୀ ମାନସଫିଲ କେରକେଟାଙ୍କୁ ପଚାରିବାରୁ ସେ ଉପଜିଲାପାଳଙ୍କ କାର୍ଯ୍ୟାଳୟରେ କାର୍ଯ୍ୟ ବ୍ୟସ୍ତ ଥିଲେ । ଘଟଣା ବିଷୟରେ ପରେ ଖବର ପାଇଥିଲେ । କାର୍ଯ୍ୟାଳୟରେ କର୍ମଚାରୀଙ୍କୁ ବାଡ଼ିଆପିଟା ଠିକ ନୁହେଁ। କାର୍ଯ୍ୟାଳୟରେ ସିସିଟିଭି କ୍ୟାମେରା ଲାଗିଛି, ଅନୁଧ୍ୟାନ କଲାପରେ ପରବର୍ତ୍ତୀ ପଦକ୍ଷେପ ନିଆଯିବ ବୋଲି ସେ କହିଥିଲେ ।
