ପାଟଣା,୧୭।୬(ବୀର କିଶୋର ଦାଶ):କେନ୍ଦ୍ରାପଡା ଜିଲା ତିଖିରି ସରପଞ୍ଚ ଚାମେଲି ଓଝାଙ୍କ ସପକ୍ଷରେ ବାହାରିଲେ ପାଟଣା ବ୍ଲକ ସରପଞ୍ଚ। ଯେ ପର୍ଯ୍ୟନ୍ତ ତାଙ୍କୁ ନ୍ୟାୟ ପ୍ରଦାନ ସହ ସମ୍ପୂର୍ଣ୍ଣ ଦୋଷ ମୁକ୍ତ ନ କରାଯିବ ସେ ପର୍ଯ୍ୟନ୍ତ କୋଣସି ସରକାରୀ କାର୍ଯ୍ୟରେ ପାଟଣା ବ୍ଲକର ସରପଞ୍ଚ ସହଯୋଗ କରିବେ ନାହିଁ ବୋଲି ବୁଧବାର ଚେତାବନୀ ଦେବା ସହ ପାଟଣା ବିଡ଼ିଓ ମାନସ କୁମାର ଦଣ୍ଡପାଟଙ୍କୁ ଏକ ଦାବିପତ୍ର ପ୍ରଦାନ କରିଛନ୍ତି।
ପାଟଣା ବ୍ଲକ ସରପଞ୍ଚସଙ୍ଘ ସଭାପତି ତଥା ଡୁମୁରିଆ ପଞ୍ଚାୟତ ସରପଞ୍ଚ ଗୌରହରି ନାଏକ, କୋଷାଧ୍ୟକ୍ଷ ମୁଷାଖୋରି ପଞ୍ଚାୟତ ସରପଞ୍ଚ ଭାମାମଣି ଦାସ, ବଡପାଟଣା ସରପଞ୍ଚ ବିନତି ବାନାରା, ମିରିଗିଖୋଜି ସରପଞ୍ଚ ମନମୋହନ ବେହେରା , କଣ୍ଟିଆପଡା ସରପଞ୍ଚ ଲିନା ନାଏକ, ବାଉଁଶୁଳି ସରପଞ୍ଚ ସୁଜାତା ସର୍ଦ୍ଦାର, ଚେମଣା ସରପଞ୍ଚ ହେମଲତା ନାଏକ ,ଚାକୁଣ୍ଡାପାଳ ସରପଞ୍ଚ ରକ୍ଷାମଣୀ ନାଏକ ପୋଲାଣଘାଟି ସରପଞ୍ଚ ରାଉତ ମୁଣ୍ଡା,ଯମୁନାପଶି ସରପଞ୍ଚ ଶଶୀଭୂଷଣ ନାଏକ ପ୍ରମୁଖ ପାଟଣା ବିଡିଓଙ୍କୁ ଭେଟି ଦାବିପତ୍ର ପ୍ରଦାନ କରିଥିଲେ। ଚାମେଲିଙ୍କ କ୍ଷେତ୍ରରେ ଘଟିଥିବା ଅମାନବିକତା କୁ ବିରୋଧ କରି ନ୍ୟାୟିକ ତଦନ୍ତ ସହ ସିସିଟିଭି ଫୁଟେଜ ଏବଂ ମୋବାଇଲରେ ଥିବା ସମସ୍ତ ଭିଡିଓ ସାର୍ବଜନୀନ କରିବାକୁ ଦାବି କରିଛି ସରପଞ୍ଚ ସଙ୍ଘ । ଯେ ପର୍ଯ୍ୟନ୍ତ ଚାମେଲି ଓଝାଙ୍କୁ ନ୍ୟାୟ ସହ ଦୋଷ ମୁକ୍ତ କରାଯାଇ ନାହିଁ , ସେ ପର୍ଯ୍ୟନ୍ତ ସରକାରୀ କାର୍ଯ୍ୟକୁ ସମ୍ପୂର୍ଣ୍ଣ ଅସହଯୋଗ କରାଯିବ ବୋଲି ସଙ୍ଘ କହିଛି।