ପୁରୁଷୋତ୍ତମପୁର,୧୬ା୧୨(ଡି.ଏନ୍.ଏ.): ଗଞ୍ଜାମ ଜିଲା ପୁରୁଷୋତ୍ତମପୁର ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଦୀର୍ଘ ୧୧ ମାସ ହେଲା ଆମ୍ବୁଲାନ୍ସ ନ ଥିବା ଯୋଗୁଁ ରୋଗୀମାନେ ହନ୍ତସନ୍ତ ହୋଇ ଅଯଥା ଖର୍ଚ୍ଚାନ୍ତ ହେଉଛନ୍ତି। ସ୍ବାସ୍ଥ୍ୟକେନ୍ଦ୍ରରେ କାର୍ଯ୍ୟରତ ଅଧିକାରୀ ଓ କର୍ମଚାରୀଙ୍କ ଦାୟିତ୍ୱହୀନତା ଯୋଗୁଁ ଏଭଳି ସମସ୍ୟା ସୃଷ୍ଟିହୋଇଥିବା ଅଭିଯୋଗ ହୋଇଛି। ସୂଚନାଯୋଗ୍ୟ, ଏହି ସ୍ବାସ୍ଥ୍ୟକେନ୍ଦ୍ର ଉପରେ ବହୁ ଜନସାଧାରଣ ନିର୍ଭର କରନ୍ତି। ଖଲ୍ଲିକୋଟ ବିଧାୟକ ତାଙ୍କ ହାତପାଣ୍ଠିରୁ ୨୦୧୬ ନଭେମ୍ବର ୩୦ରେ ଏକ ମାରୁତି ଆମ୍ବୁଲାନ୍ସ (ନଂ ଓଡି ୦୭ ପି ୯୧୨୧) ଯୋଗାଇ ଦେଇଥିଲେ। ଏହାର ରକ୍ଷଣାବେକ୍ଷଣ ଓ ଆବଶ୍ୟକୀୟ କାଗଜପତ୍ର ସ୍ବାସ୍ଥ୍ୟ ବିଭାଗର ଦାୟିତ୍ୱ ଥିଲା। ମାତ୍ର ଅଧିକାରୀ ଓ କର୍ମଚାରୀମାନେ ଦାୟିତ୍ୱହୀନ ଭାବେ ଗାଡ଼ିର ସି ସାର୍ଟିଫିକେଟ (ଇନସୁରାନ୍ସ)ର ଅବଧି ୨୦୨୦ ମାର୍ଚ୍ଚ ୩୧ରୁ ଶେଷ ହୋଇଥିଲେ ମଧ୍ୟ ତାହାକୁ ନବୀକରଣ କରିନଥିଲେ। ଗତ ଫେବୃଆରୀ ୧୭ରେ ଜଣେ ରୋଗୀଙ୍କୁ ବ୍ରହ୍ମପୁର ବଡ଼ମେଡିକାଲରେ ଛାଡି ଆସିବା ବେଳେ ଚମାଖଣ୍ଡି ଥାନା ଅନ୍ତର୍ଗତ ଜଗନ୍ନାଥପୁରଠାରେ ଗାଡ଼ିଟି ଦୁର୍ଘଟଣାଗ୍ରସ୍ତ ହୋଇଥିଲା। ଏହି ଦୁର୍ଘଟଣାକୁ ଚପାଇଦେବା ଉଦ୍ଦେଶ୍ୟରେ ସ୍ବାସ୍ଥ୍ୟକେନ୍ଦ୍ର କର୍ମଚାରୀମାନେ ପୋଲିସରେ ଅଭିଯୋଗ କରିନଥିଲେ। ତେବେ ଆମ୍ବୁଲାନ୍ସ ସେବା ନ ମିଳିବା ହେତୁ ରୋଗୀମାନଙ୍କ ସମ୍ପର୍କିୟମାନେ ହୋହାଲ୍ଲା କରିବା ପରେ ବାଧ୍ୟହୋଇ ଘଟଣାର ଦୀର୍ଘ ତିନି ମାସ ପରେ ମେ ୭ରେ ଚମାଖଣ୍ଡି ଥାନାରେ ଅଭିଯୋଗ ଜଣାଇଥିଲେ। ଗାଡ଼ିର ମରାମତିରେ ଅତ୍ୟଧିକ ଟଙ୍କା ଖର୍ଚ୍ଚ ହେଉଥିବାରୁ ଇନସ୍ୟୁରାନ୍ସ ନଥିବା ହେତୁ ଗାଡ଼ିଟି ଗ୍ୟାରେଜରେ ପଡିରହିଛି। ମାତ୍ର ନିର୍ଦ୍ଦିିଷ୍ଟ ପରିମାଣର କିଛି ଟଙ୍କା ଖର୍ଚ୍ଚ କରିବା ଲାଗି ରୋଗୀ କଲ୍ୟାଣ ସମିତି ସ୍ଥିର କରିଥିବା ବେଳେ ତା’ଠାରୁ ଅଧିକା ଟଙ୍କା କିଏ ବହନକରିବ ସେ ନେଇ ଦ୍ୱନ୍ଦ ସୃଷ୍ଟି ହୋଇଛି। ତେଣୁ ଏଭଳି ଦାୟିତ୍ୱହୀନ ଅଧିକାରୀ ଓ କର୍ମଚାରୀଙ୍କ ବିରୋଧରେ ସ୍ବାସ୍ଥ୍ୟ ବିଭାଗ ପକ୍ଷରୁ କାର୍ଯ୍ୟାନୁଷ୍ଠାନ ଗ୍ରହଣ କରିବା ଦାବି ଉଠିଛି। ଏଥିପ୍ରତି ସରକାରଙ୍କ ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗୀୟ ମନ୍ତ୍ରୀ, ସଚିବ ଓ ଜିଲାପାଳ, ଜିଲା ମୁଖ୍ୟ ଚିକିତ୍ସା ଅଧିକାରୀ ଦୃଷ୍ଟି ଦେଇ କାର୍ଯ୍ୟାନୁଷ୍ଠାନ ଲାଗି ଅଞ୍ଚଳବାସୀ ଦାବି କରିଛନ୍ତି। ସ୍ବାସ୍ଥ୍ୟକେନ୍ଦ୍ର ଅଧିକାରୀ ହୃଷିକେଶ ମହନ୍ତ କହିଛନ୍ତି, ଆମ୍ବୁଲାନ୍ସ ଡ୍ରାଇଭର ଇନସୁରାନ୍ସ ଭେଲିଡିଟି ସରିବା ସମ୍ପର୍କରେ ନ ଜଣାଇବାରୁ ହୋଇପାରି ନାହିଁ। ଡ୍ରାଇଭର ସୂର୍ଯ୍ୟ ନାରାୟଣ ପାଢୀ କହିଛନ୍ତି, ପୂର୍ବରୁ ଆକାଉଣ୍ଟାଣ୍ଟ ଓ ସ୍ବାସ୍ଥ୍ୟକେନ୍ଦ୍ର ଅଧିକାରୀଙ୍କୁ ବହୁବାର ଜଣାଇଛି। ସେ କହିଛନ୍ତି ତୁମେ ଗାଡ଼ି ଚଳାଅ, ଆମେ ଇନିସ୍ୟୁରାନ୍ସ କରିଦେବୁ।
