ଅନୁଗୋଳ ଅଫିସ,୧୬।୧୧- ହସ୍ପିଟାଲ ଇନ୍ ଟ୍ରେନ ବା ଲାଇଫ୍ ଲାଇନ ଏକ୍ସପ୍ରେସ୍ ଯୋଗେ ଅନୁଗୋଳ ରେଳ ଷ୍ଟେଶନରେ ରୋଗୀ ସେବା ସୋମବାରଠାରୁ ଆରମ୍ଭ ହୋଇଛି। ୩୦ ତାରିଖ ପର୍ଯ୍ୟନ୍ତ ଏହି ଟ୍ରେନ ଷ୍ଟେଶନରେ ରହି ଗରିବ ରୋଗୀଙ୍କୁ ନିଃଶୁଳ୍କ ଚିକିତ୍ସା ସେବା ଯୋଗାଇଦେବ। ଅନୁଗୋଳ ବିଧାୟକ ରଜନୀକାନ୍ତ ସିଂହ ମୁଖ୍ୟ ଅତିଥି ଭାବେ ଯୋଗଦେଇ ଏହାର ଉଦ୍ଘାଟନ କରିଥିଲେ। ସମ୍ମାନିତ ଅତିଥି ଭାବେ ଅତିରିକ୍ତ ଜିଲାପାଳ ରଜନୀକାନ୍ତ ସ୍ବାଇଁ, ଜିଲା ମୁଖ୍ୟ ଚିକିତ୍ସାଧିକାରୀ ଡା. ତ୍ରିଲୋଚନ ପ୍ରଧାନ, ଭାରତ ରେଲୱେ ପକ୍ଷରୁ ସତବୀର ସିଂହ, ବ୍ରିଜେଶ କୁମାର, ଆଦିତ୍ୟବିର୍ଲା ମାଇନିଂର ସିଇଓ ମୁକେଶ କୁମାର, ଡିଜିଏମ୍ ସମୀର ମଲ୍ଲିକ, ପ୍ରଶାସନିକ ମୁଖ୍ୟ ଶତର ମହାନ୍ତି ପ୍ରମୁଖ ଯୋଗଦେଇଥିଲେ। ପରିଚାଳନା ସଂସ୍ଥା ଇମ୍ପାକ୍ଟ ଇଣ୍ଡିଆ ଫାଉଣ୍ଡେସନ ଅଧିକାରୀ ପ୍ରଫେସର ରୋହିଣୀ ଭି. ଚୋଗୁଲୁ ପରିଚାଳନା କରିଥିଲେ। ଏହି ଟ୍ରେନ ଭିତରେ ଅତ୍ୟାଧୁନିକ ଅସ୍ତ୍ରୋପଚାର ଗୃହ ଥିବାରୁ ଦେଶର କୋଣ ଅନୁକୋଣରୁ ଅଭିଜ୍ଞ ଡାକ୍ତରମାନେ ଆସି ଅସ୍ତ୍ରୋପଚାର କରିବା ବ୍ୟବସ୍ଥା ରହିଛି। ତେଣୁ ଜିଲାବାସୀ ଏହାର ସୁଯୋଗ ନେବାକୁ ପରିଚାଳନା ସଂସ୍ଥା ଇମ୍ପାକ୍ଟ ଇଣ୍ଡିଆ ଫାଉଣ୍ଡେଶନ ପକ୍ଷରୁ ଅନୁରୋଧ କରାଯାଇଛି। ପ୍ରଥମ ଦିନରେ ମୋଟ ୧୩୫ ଜଣ ପଞ୍ଜୀକରଣ କରିଥିବାବେଳେ ଓପିଡିରେ ସେମାନଙ୍କୁ ଚିକିତ୍ସାସେବା ଯୋଗାଇ ଦିଆଯାଇଥିଲା। ଏମାନଙ୍କ ମଧ୍ୟରୁ ୨୩ ଜଣଙ୍କ ମୋତିଆବିନ୍ଦୁ ଅସ୍ତ୍ରପ୍ରଚାର କରାଯିବ ବୋଲି ଇମ୍ପାକ୍ଟ ଇଣ୍ଡିଆ ଫାଉଣ୍ଡେଶନ୍ ପରିଚାଳକ ବିବେକ ଦାସ ସୂଚନା ପ୍ରଦାନ କରିଛନ୍ତି।
