ଜଗତ୍ସିଂହପୁର ଅଫିସ, ୨୫ା୪: ଜଗତ୍ସିଂହପୁର ଜିଲା ପ୍ରାଣୀଧନ ଚିକିତ୍ସାଳୟକୁ ପ୍ରାଣୀଙ୍କ ଚିକିତ୍ସା ଓ ନମୁନା ପରୀକ୍ଷା ପାଇଁ ପ୍ରତ୍ୟହ ବହୁସଂଖ୍ୟକ ଲୋକ ଆସୁଛନ୍ତି। କିନ୍ତୁ ସେମାନଙ୍କୁ ଆବଶ୍ୟକ ସେବା ମିଳିପାରୁନାହିଁ। ବିଶେଷକରି ଗୋବର, ପରିସ୍ରା ଆଦି ପରୀକ୍ଷା ପାଇଁ ନମୁନା ଦେବାକୁ ହେଲେ ସକାଳ ୧୦ରୁ ଅପରାହ୍ନ ପର୍ଯ୍ୟନ୍ତ ଅପେକ୍ଷା କରିବାକୁ ପଡ଼ୁଛି। ଏହି ପରିସରରେ ଥିବା ଡିସ୍ପେନ୍ସାରୀ କିନ୍ତୁ ସକାଳ ୭ରୁ ଅପରାହ୍ନ ୧୧ଟା ଯାଏ ଖୋଲା ରହୁଛି। ଏଥିଯୋଗୁ ନମୁନା ପରୀକ୍ଷା ରିପୋର୍ଟ ଆଣି ଡିସ୍ପେନ୍ସାରୀରେ ଡାକ୍ତରଙ୍କୁ ଦେଖାଇ ଚିକିତ୍ସା ପାଇବା ଗୋଟିଏ ଦିନରେ ସମ୍ଭବ ହେଉନି। ଏନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି।
ପ୍ରବଳ ଗ୍ରୀଷ୍ମପ୍ରବାହ ଯୋଗୁ ସାଧାରଣ ଜୀବନଯାତ୍ରା ବ୍ୟାହତ ହେଉଛି। ସରକାର ମଧ୍ୟ ସରକାରୀ କାର୍ଯ୍ୟାଳୟଗୁଡିକ ସକାଳ ୭ରୁ ଅପରାହ୍ନ ୧ଟା ପର୍ଯ୍ୟନ୍ତ କାର୍ଯ୍ୟକ୍ଷମ କରିବାକୁ ନିର୍ଦ୍ଦେଶ ଦେଇଛନ୍ତି। ଏ ପରିସ୍ଥିତିରେ ପ୍ରାଣୀଧନ ଚିକିତ୍ସାଳୟ ପରିସର ଜିଲା ପ୍ରାଣୀ ରୋଗ ନିରୂପଣ କେନ୍ଦ୍ର ଦିନ ୧୦ଟାରୁ ଚାଲିଥିବାରୁ ଲୋକେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଏ ସମ୍ପର୍କରେ ଜଣେ ଲୋକ କହିଛନ୍ତି, ସେମାନଙ୍କ ଗାଈ ଦେହ ଖରାପ ହେବାରୁ ଚିକିତ୍ସା ପାଇଁ ଜିଲା ମୁଖ୍ୟ ପ୍ରାଣୀଧନ ଚିକିତ୍ସାଳୟ ଡିସ୍ପେନ୍ସାରୀରେ ଭିଏଏସ୍ଙ୍କୁ ଦେଖାଇଥିଲେ। ଭିଏଏସ୍ ଗୋବର ପରୀକ୍ଷା ପାଇଁ ଲେଖିଦେଲେ। ଗୋବର ନେଇ ସେମାନେ ଏହି ପରିସରରେ ଥିବା ନମୁନା ପରୀକ୍ଷା କେନ୍ଦ୍ରରେ ଦେବାକୁ ଗଲାବେଳକୁ ଏହା ଖୋଲା ନ ଥିଲା। ଜାଣିବାକୁ ମିଳିଥିଲା ସକାଳ ୧୦ଟା ପରେ ପରୀକ୍ଷା କେନ୍ଦ୍ର ଖୋଲିବ। ତେଣୁ ବାଧ୍ୟ ହୋଇ ଅପେକ୍ଷା କରିଥିଲେ। କେନ୍ଦ୍ର ଖୋଲିଲା ପରେ ନମୁନା ଦେଇଥିଲେ। କିନ୍ତୁ ବସିବାକୁ ସୁବିଧା ନ ଥିବାରୁ ବାହାରେ ଖରାରେ ଗୋଡ ଭାଙ୍ଗି ଦୀର୍ଘ ସମୟ ଛିଡା ହେବାକୁ ପଡିଥିଲା। ରିପୋର୍ଟ ପାଇଲା ବେଳକୁ ଡିସ୍ପେନ୍ସାରୀ ବନ୍ଦ ହୋଇ ଯାଇଥିଲା। ଏ ପରିସ୍ଥିତିରେ ସେ ବାଧ୍ୟ ହୋଇ ସେ ଘରକୁ ଫେରିଯାଇଥିଲେ। ପରଦିନ ପୁଣି ଡିସ୍ପେନ୍ସାରୀରେ ପହଞ୍ଚତ୍ ଭିଏଏସ୍ଙ୍କୁ ରିପୋର୍ଟ ଦେଖାଇ ଡାକ୍ତରଙ୍କ ପରାମର୍ଶକ୍ରମେ ଔଷଧ କିଣିଥିଲେ। ଏଭଳି ଜିଲାର ଦୂର ଦୂରାନ୍ତରୁ ଆସୁଥିବା ବହୁ ସଂଖ୍ୟକ ଲୋକ ଏହି ପରୀକ୍ଷା କେନ୍ଦ୍ରକୁ ନମୁନା ପରୀକ୍ଷା ପାଇଁ ନମୁନା ନେଇ ଆସୁଛନ୍ତି। କିନ୍ତୁ ନମୁନା ପରୀକ୍ଷା କେନ୍ଦ୍ର ଓ ଡିସ୍ପେନ୍ସାରୀ କାର୍ଯ୍ୟ ସମୟ ଅଲଗା ଥିବାରୁ ସେମାନେ ଅସୁବିଧାରେ ପଡୁଛନ୍ତି। ଏଥିସହ ସେଠାରେ କୌଣସି ସ୍ଥାୟୀ ଭିଏଏସ୍ ନ ଥିବା ଜଣାପଡ଼ିଛି।
ଏ ସମ୍ପର୍କରେ ପରୀକ୍ଷା କେନ୍ଦ୍ର ଦାୟିତ୍ୱରେ ଥିବା ବାଲିକୁଦା ଅତିରିକ୍ତ ଭିଏଏସ୍ ସୌମ୍ୟଜିତ ରାଉତ କହିଛନ୍ତି, ତାଙ୍କୁ ଗୁରୁବାରରୁ ଶନିବାର ପର୍ଯ୍ୟନ୍ତ ଲାବରେଟୋରି ଦାୟିତ୍ୱ ତୁଲାଇବାକୁ ପଡୁଛି। ସୋମବାରଠାରୁ ବୁଧବାର ପର୍ଯ୍ୟନ୍ତ ଚାନ୍ଦପୁର ଭିଏଏସ୍ ଦାୟିତ୍ୱରେ ରହୁଛନ୍ତି। ପ୍ରତ୍ୟହ ରକ୍ତ, ପରିସ୍ରା, କ୍ଷୀର ଆଦି ପାଖାପାଖି ୩୦ରୁ ଅଧିକ ନମୁନା ପରୀକ୍ଷା ହେଉଛି। ଏସବୁ ପରୀକ୍ଷା ରିପୋର୍ଟ ବାହାର କରିବାକୁ ଅପରାହ୍ନ ହୋଇଯାଉଛି। କଲଚର୍ ପରୀକ୍ଷାର ଆବଶ୍ୟକତା ଥିଲେ ସୁଦ୍ଧା ସେ ସୁବିଧା ଏ ପର୍ଯ୍ୟନ୍ତ ଉପଲବ୍ଧ ହୋଇପାରିନାହିଁ। ତେବେ ଯାହା ସୁବିଧା ଅଛି ସେ ଅନୁଯାୟୀ ଆବଶ୍ୟକ ସେବା ଯୋଗାଇ ଦିଆଯାଉଛି। କିନ୍ତୁ ଡିସ୍ପେନ୍ସାରୀ ସକାଳୁଆ ଓ ପରୀକ୍ଷାଗାର ସମୟ ଦିନବେଳା ହେବାରୁ ଅସୁବିଧା ହେଉଛି । ଏ ସମ୍ପର୍କରେ ରାଉତ ଏଡିଭିଓ (ଡିସି)ଙ୍କୁ ଲିଖିତ ଭାବେ ଜଣାଇ ପ୍ରତିକାର ପାଇଁ ଅନୁରୋଧ କରିଛନ୍ତି। ଲୋକଙ୍କ ଅସୁବିଧାକୁ ଦୃଷ୍ଟିରେ ରଖି ସେ ପରୀକ୍ଷା କେନ୍ଦ୍ରକୁ ସକାଳ ୮ ଟାରୁ ଅପରାହ୍ନ ୨ଟା ପର୍ଯ୍ୟନ୍ତ ଖୋଲିବାକୁ ପ୍ରସ୍ତାବ ଦେଇଥିବା କହିଛନ୍ତି।
