କୁଆମରା,୨୨।୬(ଡି.ଏନ.ଏ.) – ମୟୂରଭଞ୍ଜ ଜିଲା ଗୋପବନ୍ଧୁ ନଗର ବ୍ଲକ ଦେଇ ପ୍ରବାହିତ ନାଲୁହା ନଦୀ ଏବେ ବିପଦ ସାଜିଛି। ଗତିପଥ ବଦଳାଉ ଥିବାରୁ ପାର୍ଶ୍ୱବର୍ତ୍ତୀ ୨ ଗାଁ ଏହା ଗର୍ଭରେ ଲୀନ ହେବା ଆଶଙ୍କା ଦେଖାଦେଇଛି। ପଥର ପ୍ୟାକିଂ ନ ହେବା ଯୋଗୁ କୂଳ ଖାଇ ଏହା ଗାଁ ଆଡ଼କୁ ମାଡ଼ି ଆସୁଛି।
ନାଲୁହା ନଦୀ ଖଡ଼ିକାପଦାଠାରେ ଗଙ୍ଗାହରରେ ମିଶିଛି। ଏହି ସ୍ଥାନକୁ ଦୋମୁହାଣି କୁହାଯାଏ। ତେବେ ଦୁମୁହାଣିଠାରୁ ପଶ୍ଚିମକୁ ୫ଶହ ମିଟର ଦୂରରେ ନାଲୁହା ନଦୀର ଦୁଇ କୂଳରେ ଦୁଇଟି ଗ୍ରାମ ରହିଛି। ଦକ୍ଷିଣ ପାଶ୍ୱର୍ର୍ରେ କୁଆମରା ପଞ୍ଚାୟତର କସିବଣୀ ଓ ଉତ୍ତର ପାର୍ଶ୍ୱରେ ପଶୁଦା ପଞ୍ଚାୟତର ଭୋଳପଦା ଗ୍ରାମ। ଉକ୍ତ ଦୁଇଟି ଗ୍ରାମ ସମ୍ପୂର୍ଣ୍ଣ ଭାବେ ନଦୀକୂଳକୁ ଲାଗି ରହିଥିବା ବେଳେ ମୋଟ ୪୪ଟି ପରିବାର ସ୍ଥାୟୀ ବାସିନ୍ଦା ଭାବେ ବାସ କରୁଛନ୍ତି। ତେବେ ପ୍ରତିବର୍ଷ ବନ୍ୟା ଜଳରେ ଏହି ଗାଁର ବହୁ ଘରଦ୍ବାର ଓ ଚାଷ ଜମି ନଦୀ ଗର୍ଭରେ ଲୀନ ହେବାରେ ଲାଗିଛି। ଗତ ଫାଇଲିନ ସମୟରେ କସିବଣୀ ଗ୍ରାମର ସମସ୍ତ ପରିବାର ଘର ମାଟିରେ ମିଶି ଯାଇଥିବା ବେଳେ ଭୋଳପଦା ଗ୍ରାମର ୧୦ଟି ପରିବାର ସର୍ବସ୍ବାନ୍ତ ହୋଇଥିଲେ। ନଦୀ କୂଳରେ ଥିବା ପ୍ରାୟ ୫ ଏକର ଚାଷ ଜମି ଗତ ସାତ ଆଠ ବର୍ଷ ମଧ୍ୟରେ ନଦୀ ଗର୍ଭରେ ଲୀନ ହୋଇଗଲାଣି। ଉକ୍ତ ଦୁଇଟି ଗ୍ରାମର ମୁଖ୍ୟ ସମସ୍ୟା ହେଉଛି ନଦୀ କୂଳ କ୍ଷୟ। ନଦୀ କୂଳ ଖାଇବାର ମୁଖ୍ୟ କାରଣ ହେଉଛି ପ୍ରତି ବର୍ଷ ବେଆଇନ ଇଟା ଭାଟି ଗଢ଼ି ଉଠିବା ଓ ନଦୀରୁ ବାଲି ଉତ୍ତୋଳନ ହେବା। ପ୍ରତି ବର୍ଷ ଇଟା ଭାଟି ମାଲିକମାନେ ନଦୀ କୂଳରୁ ମାଟି ତାଡି ଇଟା ତିଆରି କରିବା ଫଳରେ ମୃତ୍ତିକା କ୍ଷୟ ହେଉଛି। ୧୯୯୯ ମହାବାତ୍ୟାରେ କେତେକ ଜମି ବାଲିଚର ହୋଇ ପଡ଼ିଥିଲା। ଅଦ୍ୟାବଧି ତାହା ଚାଷ ଉପଯୋଗୀ ହୋଇ ପାରିନାହିଁ। ବନ୍ୟା ଆସିବା ମାତ୍ରେ ଦୁଇ ଗ୍ରାମର ଲୋକେ ଗାଁ ଛାଡ଼ି ଦୂର ଓ ଉଚ୍ଚ ସ୍ଥାନକୁ ପଳାଇ ଯାଆନ୍ତି। ବର୍ଷା ଋତୁ ସମୟ ୪ ମାସ ଉକ୍ତ ଦୁଇ ଗ୍ରାମର ଲୋକେ ଆତଙ୍କିତ ଅବସ୍ଥାରେ ଦିନ କାଟନ୍ତି। ଗ୍ରାମ ଓ ଚାଷ ଜମିର ସୁରକ୍ଷା ନିମନ୍ତେ ନଦୀର ଦୁଇ ପାର୍ଶ୍ୱରେ ପଥର ପ୍ୟାକିଂ ପାଇଁ ଦୀର୍ଘ ଦୁଇ ବର୍ଷ ଧରି ଉଭୟ ଗ୍ରାମର ଲୋକେ ଦାବି କରି ଆସୁଥିଲେ ମଧ୍ୟ ଏ ଦିଗରେ ପ୍ରଶାସନର ନୀରବତା ନେଇ ସାଧାରଣରେ ଅସନ୍ତୋଷ ଦେଖା ଦେଇଛି। ନିର୍ବାଚନ ସମୟରେ ବିଭିନ୍ନ ଦଳର ନେତା ସମସ୍ୟା ସମାଧାନ କରିଦେବାର ପ୍ରତିଶ୍ରୁତି ଦେଇଥାନ୍ତି ମାତ୍ର ନିର୍ବାଚନ ସରିଲେ କେହି ଏଥିପ୍ରତି ଗୁରୁତ୍ୱ ଦେଉ ନ ଥିବା ଗ୍ରାମବାସୀ କହିଛନ୍ତି। ତେବେ ନଦୀର ଦୁଇ ପାର୍ଶ୍ୱରେ ପଥର ପ୍ୟାକିଂ ନ ହେବା ଯୋଗୁ ଆଗାମୀ ଦିନରେ ଏହି ଦୁଇଟି ଗ୍ରାମ ସମ୍ପୂର୍ଣ୍ଣ ନଦୀ ଗର୍ଭରେ ଲୀନ ହୋଇଯିବା ଆଶଙ୍କାକୁ ଏଡ଼ାଇ ଦେଇ ହେବ ନାହିଁ। ନାଲୁହା ନଦୀର ଭୋଳପଦାଠାରେ ପୋଲ ନିର୍ମାଣ ପାଇଁ ୩ଥର ଭିତ୍ତିପ୍ରସ୍ତର ସ୍ଥାପନ କରାଯାଇଥିଲେ ମଧ୍ୟ ଏ ପର୍ଯ୍ୟନ୍ତ କାର୍ଯ୍ୟ କରିବାର ନଁା ଗନ୍ଧ ନାହିଁ। ପ୍ରଶାସନ ତୁରନ୍ତ ଏଥିପ୍ରତି ଦୃଷ୍ଟି ଦେବାକୁ ଦୁଇ ଗ୍ରାମର ଲୋକେ ଦାବି କରିଛନ୍ତି।
