ହରିଦ୍ୱାର,୨।୬: କରୋନାର ପ୍ରଥମ ଲହର ସମୟରେ ଯେତେବେଳେ ସମଗ୍ର ଦେଶ ଭାକ୍ସିନକୁ ନେଇ ଚର୍ଚ୍ଚା କରୁଥିଲା, ସେତେବେଳେ ଯୋଗଗୁରୁ ବାବା ରାମଦେବ କରୋନିଲ ଔଷଧ ତିଆରି କରି ସମସ୍ତଙ୍କୁ ଚକିତ କରିଦେଇଥିଲେ। କେବଳ ସେତିକି ନୁହେଁ, କରୋନିଲ ଲଞ୍ଚ ସମୟରେ ପତଞ୍ଜଳୀ ପକ୍ଷରୁ ଦାବି କରାଯାଇଥିଲା ଯେ, କରୋନା ସଂକ୍ରମଣ ସମୟରେ ଏହି ଔଷଧ ରୋଗପ୍ରତିରୋଧକ ଶକ୍ତି ବଢ଼ାଇବାରେ ସହାୟକ ହେବ। ତେବେ କରୋନା ଚିକିତ୍ସା ପାଇଁ କରୋନିଲ ଔଷଧ ପରେ ଏବେ ପତଞ୍ଜଳୀ ଖୁବ୍ଶୀଘ୍ର ବଜାରରେ ବ୍ଲାକ୍ ଫଙ୍ଗସ୍ର ଔଷଧ ଉପଲବ୍ଧ କରାଇବାକୁ ଯାଉଛି। ପତଞ୍ଜଳୀ ରିସର୍ଚ୍ଚ ସେଣ୍ଟର ପକ୍ଷରୁ ବ୍ଲାକ୍ ଫଙ୍ଗସ୍ ଔଷଧ ପ୍ରସ୍ତୁତି କାର୍ଯ୍ୟ ଯୁଦ୍ଧକାଳୀନ ସ୍ତରରେ କରାଯାଉଛି। ଏନେଇ ପତଞ୍ଜଳୀ ଯୋଗପୀଠର ଏମ୍ଡି ଆଚାର୍ଯ୍ୟ ବାଳକୃଷ୍ଣ ସୂଚନା ଦେଇଛନ୍ତି। ସେ କହିଛନ୍ତି, କରୋନା ଚିକିତ୍ସାରେ କରୋନିଲ ଔଷଧ ପ୍ରଭାବଶାଳୀ ପ୍ରମାଣିତ ହେବା ପରେ ବର୍ତ୍ତମାନ ବ୍ଲାକ୍ ଫଙ୍ଗସ୍ର ଔଷଧ ପ୍ରସ୍ତୁତ କରାଯାଇଛି। ଏତଦ୍ ବ୍ୟତୀତ ସେ କହିଛନ୍ତି, ଏହି ଔଷଧକୁ ପ୍ରୟୋଗ କରାଯିବା ସମୟରେ ପଜିଟିଭ୍ ଫଳାଫଳ ସାମ୍ନାକୁ ଆସିଥିଲା। ତେବେ ଏହି ଆୟୁର୍ବେଦିକ ଔଷଧ ବ୍ଲାକ୍ ଫଙ୍ଗସ୍ ସମେତ ଅନ୍ୟ ଫଙ୍ଗସ୍ରେ ମଧ୍ୟ ପ୍ରଭାବ ପକାଇବ।
