ମହାକାଳପଡ଼ା, ୮ା୭ (ଡି.ଏନ୍.ଏ.): ‘ପେଟକୁ ମିଳୁନି ଭାତ, ମୁଣ୍ଡରେ ନାହିଁ ଛାତ’ ଶୀର୍ଷକ ଖବର ଧରିତ୍ରୀରେ ବୁଧବାର ପ୍ରକାଶ ପାଇଥିଲା। ଗୁରୁବାର ଜିଲା ପ୍ରଶାସନ ସହାୟତାର ରାଶି ସହ ରାଶନ କାର୍ଡ ଦୁର୍ଦ୍ଦିନରେ କାଳ କାଟୁଥିବା ଆଦିବାସୀ ମହିଳା ପାର୍ବତୀ ସିଂଙ୍କ ପରିବାର ନିକଟରେ ପହଞ୍ଚତ୍ ସହଯୋଗର ହାତ ବଢାଇଛି।
କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଅଧୀନ ବଉଳକଣି ପଞ୍ଚାୟତର ଆଦିବାସୀ ଅଧ୍ୟୁଷିତ ସିଂପଡ଼ା ଗଁାର ପାର୍ବତୀ ସିଂ ଓ ସାନ ଭଉଣୀ ଫୁଲ ସିଂ ଦୀର୍ଘବର୍ଷ ଧରି ସରକାରୀ ଯୋଜନାରୁ ବାଦ୍ ପଡ଼ିଥିଲେ। ଏହି ପରିବାର ଅତି ଦୟନୀୟ ଭାବେ କାଳାତିପାତ କରୁଥିଲେ। ବୟସାଧିକ କାରଣରୁ ସବୁ ସମୟରେ ମୂଲ ମଜୁରି ଲାଗିବା ସମ୍ଭବ ହେଉ ନ ଥିଲା। କେବେ କେବେ କାମ ମିଳିଲେ ସେଥିରୁ ଯାହା ଦୁଇ ପଇସା ରୋଜଗାର ହୁଏ, ପରିବାର ପ୍ରତିପୋଷଣ କରିବା କଷ୍ଟସାଧ୍ୟ ହୋଇଥାଏ। ଓଳିଏ ଖାଇଲେ ଆର ଓଳିକୁ ଉପବାସ ରହିବାକୁ ପଡ଼ିଥାଏ। ୨୪ ବର୍ଷ ତଳେ ପାର୍ବତୀଙ୍କ ସ୍ବାମୀଙ୍କ ପରଲୋକ ହୋଇଥିବା ବେଳେ ଅଦ୍ୟାବଧି ଭତ୍ତା, ରାଶନ କାର୍ଡ, ବିଜୁଳି, ଶୌଚାଳୟ, ଆବାସ ଗୃହ ଆଦି ଜନକଲ୍ୟାଣ ଯୋଜନାରେ ସାମିଲ ହୋଇ ପାରି ନ ଥିଲେ। ଏହାକୁ ନେଇ ବୁଧବାର ଧରିତ୍ରୀରେ ଖବର ପ୍ରକାଶ ପରେ ଜିଲା ପ୍ରଶାସନ ପକ୍ଷରୁ ତତ୍ପରତା ପ୍ରକାଶ ପାଇଥିଲା। କେନ୍ଦ୍ରାପଡ଼ା ଜିଲାପାଳ ଅମ୍ରିତ ଋତୁରାଜଙ୍କ ନିର୍ଦ୍ଦେଶକ୍ରମେ ଗୁରୁବାର ପୂର୍ବାହ୍ନରେ ଏକ ସ୍ବତନ୍ତ୍ର ଟିମ୍ ପାର୍ବତୀଙ୍କ ଘରେ ପହଞ୍ଚତ୍ଥିଲା। ଜିଲା ରେଡ୍କ୍ରସ ପାଣ୍ଠିରୁ ୮ ହଜାର ଟଙ୍କା ସହାୟତା ରାଶି ସହ ନୂଆ ରାଶନ୍ କାର୍ଡ ଓ ୨୦ କିଲୋ ଚାଉଳ ପ୍ରଦାନ କରାଯାଇଛି। ଏହି ଅସହାୟ ପରିବାରକୁ ଖୁବ୍ଶୀଘ୍ର ବିଧବା ଭତ୍ତା ସହ ସରକାରୀ ନିୟମ ଅନୁସାରେ ସମସ୍ତ ସହାୟତା ପ୍ରଦାନ କରାଯିବ ବୋଲି ଜିଲାପାଳ ଋତୁରାଜ କହିଛନ୍ତି। ଅପରପକ୍ଷେ ଉକ୍ତ ଖବର ନେଇ ସମଗ୍ର ଜିଲାରେ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛି। ଖବର ପଢ଼ି ସ୍ଥାନୀୟ ସରପଞ୍ଚ ସାଲବେଗ ମାହାଳି ଏହି ଅସହାୟ ପରିବାର ନିକଟରେ ପହଞ୍ଚତ୍ ଶୁଖିଲା ଖାଦ୍ୟ ଓ ରାଶନ୍ ସାମଗ୍ରୀ ପ୍ରଦାନ କରିଛନ୍ତି। ତେବେ ଖାଦ୍ୟ ସାମଗ୍ରୀ ମିଳିବା ପରେ ପାର୍ବତୀଙ୍କ ଖୁସି କହିଲେ ନ ସରେ। ଜିଲା ପ୍ରଶାସନକୁ ଧନ୍ୟବାଦ ଦେବା ସହ ପରିବାରକୁ ଆବାସ ଯୋଜନା ପକ୍କା ଗୃହ ଓ ବିଜୁଳି ଯୋଗାଇ ଦେବାକୁ ନେହୁରା ହୋଇଛନ୍ତି।
