ନୂଆଦିଲ୍ଲୀ,୨୪।୧୨: ଦେଶର ପ୍ରମୁଖ ଅଟୋମୋବାଇଲ କମ୍ପାନୀ ‘ହୋଣ୍ଡା କାର୍ସ ଇଣ୍ଡିଆ ଲିମିଟେଡ୍ (ଏଚ୍ସିଆଇଏଲ୍) ଓ ଇଣ୍ଡିଆନ ବ୍ୟାଙ୍କ ମଧ୍ୟରେ ଏକ ଦ୍ୱିପାକ୍ଷିକ ବାଣିଜି୍ୟକ ସହଭାଗିତା ହୋଇଥିବା ଜଣାପଡିଛି। ବିଶେଷକରି ଏଚ୍ସିଆଇଏଲ୍ର ଗ୍ରାହକଙ୍କ ପାଇଁ ସହଜ, ସୁଲଭ ଏବଂ ଆକର୍ଷଣୀୟ ଆର୍ଥିକ ଯୋଜନା ଯୋଗାଇଦେବା ଲକ୍ଷ୍ୟରେ ଏହି ସହଭାଗିତା ହୋଇଥିବା ଉଭୟ ସଂସ୍ଥାଙ୍କ ପକ୍ଷରୁ କୁହାଯାଇଛି। ଏପରିକି ସହଜ ଋଣ ଆବଣ୍ଟନ, ଯୁକ୍ତିଯୁକ୍ତ ସୁଧହାର, ସ୍ବତନ୍ତ୍ର ଅଫର, ନମନୀୟ ନୀତି ସମୂହ ଏବଂ ସରଳୀକୃତ ପଦ୍ଧତି ଆଦି ଯୋଗାଇଦେଇ ହୋଣ୍ଡା ଉପତ୍ାଦଗୁଡିକ କ୍ରୟ ବ୍ୟବସ୍ଥାକୁ ଏହା ସହଜ କରିବ। ସେହିଭଳି ସମଗ୍ର ଦେଶରେ ଇଣ୍ଡିଆନ ବ୍ୟାଙ୍କର ୫୭୦୦ରୁ ଅଧିକ ଶାଖା ଏବଂ ଏଚ୍ସିଆଇଏଲ୍ ଡିଲର ନେଟ୍ୱର୍କରେ ଉକ୍ତ ସେବାର ଫାଇଦା ପାଇପାରିବେ।
ଏ ସମ୍ପର୍କରେ ଏଚ୍ସିଆଇଏଲ୍ର ଭାଇସ୍ ପ୍ରେସିଡେଣ୍ଟ (ମାର୍କେଟିଂ ଆଣ୍ଡ ସେଲ୍ସ) କୁନାଲ ବେହଲ କହିଛନ୍ତି, ସମସ୍ତ ହୋଣ୍ଡା ଗ୍ରାହକଙ୍କୁ ସରଳ ଫାଇନାନ୍ସ ବିକଳ୍ପ ସହ ଏହି ଶ୍ରେଣୀରେ ସର୍ବୋତ୍ତମ ଅନୁଭୂତି ଓ ସହାୟତା ଯୋଗାଇଦେବା ଲକ୍ଷ୍ୟରେ ଇଣ୍ଡିଆନ ବ୍ୟାଙ୍କ ସହ ଉକ୍ତ ବୁଝାମଣା କରାଯାଇଛି। ହୋଣ୍ଡା ସର୍ବଦା ତାହାର ଗ୍ରାହକଙ୍କ ଦାବି ପୂରଣକୁ ଅଗ୍ରାଧିକାର ପ୍ରଦାନ ନିମନ୍ତେ ପ୍ରୟାସ କରିଆସୁଛି ଏବଂ ଏହି ସହଭାଗିତା ଆମ ଗ୍ରାହକଙ୍କୁ ଏକ ଅନନ୍ୟ ମାଲିକାନା ଅନୁଭୂତି ପ୍ରଦାନ ନିମନ୍ତେ ଆମର ପ୍ରତିବଦ୍ଧତାକୁ ଦର୍ଶାଉଛି। ସେହିଭଳି ଇଣ୍ଡିଆନ ବ୍ୟାଙ୍କର ଜିଏମ୍ (ରିଟେଲ ଆସେଟ୍ସ) ବିକାଶ କୁମାର କହିଛନ୍ତି, ଏଚ୍ସିଆଇଏଲ୍ ସହ ଆମର ଏହି ସହଭାଗିତା ଗ୍ରାହକଙ୍କୁ ଦ୍ରୁତତର ଅର୍ଥଲଗାଣ ନିମନ୍ତେ ସୁଯୋଗ ପ୍ରଦାନ କରିବ। ଭାରତରେ ଇଣ୍ଡିଆନ ବ୍ୟାଙ୍କର ଦୃଢ ଉପସ୍ଥିତି ରହିଛି, ଆମେ ଦୃଢ ନିଶ୍ଚିତ ଯେ ଆମର ଡିଜିଟାଲ ଋଣ ପ୍ରଦାନ ପଦ୍ଧତି ନିଜ ପାଇଁ ଏବଂ ପରିବାର ପାଇଁ ଏକ ନୂଆ ଗାଡ଼ି କିଣିବାକୁ ଚାହୁଁଥିବା ଗ୍ରାହକଙ୍କୁ ସହଜ ଓ ସର୍ବୋତ୍ତମ ସ୍ବାଚ୍ଛନ୍ଦ୍ୟପୂର୍ଣ୍ଣ ଫାଇନାନ୍ସ ସୁବିଧା ଯୋଗାଇଦେବ। ଆମେ ଯାନବାହନ ଫାଇନାନ୍ସ ପ୍ରକ୍ରିୟାକୁ ସହଜ କରିବା ଏବଂ ଉଭୟ ଉପତ୍ାଦ ଓ ସେବା ଦୃଷ୍ଟିରୁ ଗ୍ରାହକଙ୍କୁ ପରିବର୍ଦ୍ଧିତ ଅନୁଭୂତି ପ୍ରଦାନ କରିବା ନିମନ୍ତେ ଉତ୍ସର୍ଗୀକୃତ ରହିଛୁ।
