ଭୁବନେଶ୍ୱର, ୨୫।୯(ସୁନିତ୍ ମିଶ୍ର): ଓଡ଼ିଶା ଦ୍ରବ୍ୟ ଓ ସେବା କର ସଂଶୋଧନ ବିଲ୍ ୨୦୨୫ ବୁଧବାର ଗୃହରେ ପାରିତ ହୋଇଯାଇଛି। ଏହି ବିଲ୍ ୨ ଦିନ ପୂର୍ବରୁ ଗୃହରେ ଆଗତ କରାଯାଇଥିଲା। ଏହା ଉପରେ ଅପରାହ୍ନ ୪ଟା ପରେ ଗୃହରେ ବିସ୍ତୃତ ଆଲୋଚନା ହୋଇଥିବାବେଳେ ଏଥିରେ ଉଭୟ ବିରୋଧୀ ଏବଂ ଶାସକ ଦଳର ସଦସ୍ୟମାନେ ସାମିଲ ହୋଇଥିଲେ। ଚଳିତ ମୌସୁମୀ ଅଧିବେଶନରେ ୭ଟି କାର୍ଯ୍ୟଦିବସ ଥିବାବେଳେ ୬ ଦିନ ଗୃହ ଚାଲି ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ ବିଧାନସଭା ମୁଲତବୀ ଘୋଷଣା କରାଯାଇଛି। ଏହା ଭିତରୁ ୫ଦିନ ବିରୋଧୀ ଗୃହ କାର୍ଯ୍ୟରେ ପ୍ରାୟତଃ ଭାଗନେଇ ନ ଥିଲେ। ତେଣୁ ବିଲ୍ ଉପରେ ଆଲୋଚନା ସମୟରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ନିଜ ବକ୍ତବ୍ୟ ରଖିବା ସମୟରେ ବିରୋଧୀଙ୍କୁ ତାଚ୍ଛଲ୍ୟ କରି କାହିଁକି ଏତେଦିନ ଯାଏ ସେମାନେ ଗୃହ କାର୍ଯ୍ୟରେ ସାମିଲ ହେଉ ନ ଥିଲେ ବୋଲି ପ୍ରଶ୍ନ କରିଥିଲେ। ଏହି ଅବସରରେ ମୁଖ୍ୟମନ୍ତ୍ରୀ କହିଛନ୍ତି, ବିରୋଧୀ ବିଜେଡି ଏବଂ କଂଗ୍ରେସ ସଦସ୍ୟମାନେ ଆଲୋଚନାରେ ଭାଗ ନେଇଥିବାରୁ ସମସ୍ତଙ୍କୁ ଧନ୍ୟବାଦ। ଏହା ହିଁ ଗଣତନ୍ତ୍ର। ଯଦି ପ୍ରଥମ ଦିନରୁ ବିରୋଧୀ ଆଲୋଚନାରେ ଭାଗ ନେଇଥାଆନ୍ତେ ତେବେ ସେମାନେ ଯାହା ଦାବି ରଖିଥାଆନ୍ତେ ସେ ତଥାସ୍ତୁ କରିଦେଇଥାଆନ୍ତେ। ଉଭୟ ଶାସକ, ବିରୋଧୀ ଏବଂ କଂଗ୍ରେସ ସଦସ୍ୟମାନେ ଏଠାରେ ଲୋକଙ୍କ ପାଇଁ ଲଢୁଛନ୍ତି। କଂଗ୍ରେସ ସଦସ୍ୟମାନେ ମଧ୍ୟ ଉପସ୍ଥିତ ରହିଥିବାରୁ ଧନ୍ୟବାଦ। ସେମାନଙ୍କ ବୁଦ୍ଧି ବିଳମ୍ବରେ ହେଲେ ମଧ୍ୟ ଉଦୟ ହୋଇଛି। କାହା କଥାରେ ସେମାନଙ୍କ ବୁଦ୍ଧିରେ ରାହୁ, କେତୁ ଲାଗିଯାଇଥିଲେ। ଯାହା ହେଉ ଶେଷରେ ସେମାନଙ୍କ ବୁଦ୍ଧି ଉଦୟ ହୋଇଛି ବୋଲି ମୁଖ୍ୟମନ୍ତ୍ରୀ କହିଛନ୍ତି।
ବିଲ୍ ଉପରେ ଅଧିକ ଆଲୋଚନାକରି ମୁଖ୍ୟମନ୍ତ୍ରୀ କହିଛନ୍ତି, ଜିଏସ୍ଟି କାଉନ୍ସିଲ ବୈଠକରେ ସବୁ ରାଜ୍ୟ ସାମିଲହୋଇ ଜିଏସ୍ଟି ସଂସ୍କାର ଉପରେ ଆଲୋଚନା ହୋଇଛି। ବିଧିର ବିଧାନ ହେଉଛି ଯାହା କେନ୍ଦ୍ର ସରକାର ଜିଏସ୍ଟି ଉପରେ ନିଷ୍ପତ୍ତି ନେବେ ତାକୁ ରାଜ୍ୟରେ ସମସ୍ତେ ଲାଗୁ କରାଇବା ଦରକାର। ଗତ ୮ ବର୍ଷ ତଳେ ଯେତେବେଳେ ଜିଏସ୍ଟି ଆସିଥିଲା, ସେତେବେଳେ ରାଜ୍ୟରେ ବିଜେଡି ସରକାର ଥିଲା। ସେମାନେ ଏବେ ବିରୋଧୀ ଦଳରେ ବସିଛନ୍ତି। ସେହି ସମୟରେ ମଧ୍ୟ କେନ୍ଦ୍ର ସରକାରଙ୍କ ଜିଏସ୍ଟି ବ୍ୟବସ୍ଥାକୁ ରାଜ୍ୟରେ ଲାଗୁ କରାଇବାରେ ବିଜେଡି ସରକାର ନିଷ୍ପତ୍ତି ନେଇଥିଲେ। ଏବେ ଜିଏସ୍ଟିରେ ସଂସ୍କାର ଆସିବା ଯୋଗୁ ରାଜସ୍ବ ଆଦାୟ କମିବ। ହେଲେ ବହୁ ବ୍ୟବସାୟୀ ଆଗକୁ ଜିଏସ୍ଟିରେ ପଞ୍ଜୀକରଣ କରିବେ। ବେପାର ବଢ଼ିବା ଯୋଗୁ ଜିଏସ୍ଟି ଆଦାୟ ବୃଦ୍ଧି ପାଇବ। ଜିଏସ୍ଟିରେ ସଂସ୍କାର ଆଣିବା ନିଷ୍ପତ୍ତି ନେବାକୁ କାହିଁକି ୮ ବର୍ଷ ଲାଗିଗଲା ବୋଲି ବିରୋଧୀ ପ୍ରଶ୍ନ କରୁଛନ୍ତି। ସେମାନଙ୍କୁ ଜଣାଇଦେବାକୁ ଚାହେଁ, ସମସ୍ତେ ଜିଏସ୍ଟିରେ ଅଭ୍ୟସ୍ତ ହୋଇଗଲେ। ଏଥିରେ ଷ୍ଟାବିଲାଇଜ ମଧ୍ୟ ଆସିଗଲା। ତେଣୁ ବ୍ୟବସାୟୀ ଏବଂ ଜନସାଧାରଣଙ୍କୁ ଲାଭ ଦେବା ପାଇଁ ଜିଏସ୍ଟିରେ ସଂସ୍କାର ଆସିଲା। ଯାହା ବର୍ତ୍ତମାନ ରାଜସ୍ବରେ ହାନି ଘଟିବ, ତାହା କୋଇଲାରୁ ଭରଣା କରାଯାଇପାରିବ। କେନ୍ଦୁପତ୍ର ଉପରୁ ଜିଏସ୍ଟି ଆଦାୟ ୫ ପ୍ରତିଶତକୁ ଖସିଲା ଅର୍ଥାତ୍ ଶୂନ କାହିଁକି ହେଲାନାହିଁ ବୋଲି ବିରୋଧୀ ପ୍ରଶ୍ନ କରିଥିଲେ। ସେମାନଙ୍କୁ ଜଣାଇଦେବାକୁ ଚାହଁ, ଆମେ ସମସ୍ତେ ଚାହୁଁଛେ ନିଶା କାରବାର କମୁ। ରାଜ୍ୟରେ ନିଶା କାରବାର ନ ବଢୁ। କେନ୍ଦୁପତ୍ରରୁ ବିଡି ତିଆରି ହେଉଛି। ଯଦି କେନ୍ଦୁପତ୍ର ଉପରୁ ଜିଏସ୍ଟି ଆଦାୟ ଶୂନ ହୋଇଯିବ ତେବେ ରାଜ୍ୟରେ ବିଡି ପ୍ରସ୍ତୁତ ଏବଂ ବ୍ୟବହାର ବଢ଼ିଯିବ। ତେଣୁ ଏହା ଉପରେ ୫ ପ୍ରତିଶତ ଜିଏସ୍ଟି ରଖାଗଲା ବୋଲି ସେ କହିଛନ୍ତି।
ବରିଷ୍ଠ ନେତା ରଣେନ୍ଦ୍ର ପ୍ରତାପ ସ୍ବାଇଁ ଆଲୋଚନାରେ ଭାଗନେଇ କହିଛନ୍ତି, ମୁଖ୍ୟମନ୍ତ୍ରୀ ଗୃହରେ ଗୋଟିଏ କଥା ସ୍ପଷ୍ଟକରିଛନ୍ତି କେନ୍ଦ୍ର ସରକାର ଯାହା ଜିଏସ୍ଟି ଉପରେ ନିଷ୍ପତ୍ତି ନେବେ ରାଜ୍ୟ ସରକାର ତାହା ଲାଗୁ କରିବାକୁ ଏକ ପ୍ରକାର ବାଧ୍ୟ। ତେବେ ଯେଉଁ ୧୫୦ଟି ଆଇଟମ୍ରେ ଜିଏସ୍ଟି ସଂସ୍କାର କାରଣରୁ ଦର ହ୍ରାସ ପାଇବ ତା’ର ତାଲିକା ଗୃହରେ ଉପସ୍ଥାପନ କରନ୍ତୁ। ସେହି ୧୫୦ଟି ଆଇଟମ୍ କେତେ ଦର ଥିଲା, ଏବେ କମିଲା ପରେ କେତେ ଟଙ୍କା ହେଲା ତା’ର ତାଲିକା ଗୃହରେ ଉପସ୍ଥାପନ କରାନ୍ତୁ ଏବଂ ବ୍ଲକ୍ସ୍ତରରେ ଯାଇ ଲଗାନ୍ତୁ। ସାଧାରଣ ଲୋକ ଏହା ଜାଣିବା ଦରକାର। ନ ହେଲେ ଦର କମିଲା ପରେ କେଉଁ ଜିନିଷ କେତେ ଟଙ୍କା ହେଲା କେମିତି ସେମାନେ ଜାଣିବେ। ଆଉ ୫୫ତମ ଜିଏସ୍ଟି କାଉନସିଲରେ ଏହା ଉପରେ ଆଲୋଚନା ହେବା ସମୟରେ ମୁଖ୍ୟମନ୍ତ୍ରୀ କିମ୍ବା ତାଙ୍କ ପ୍ରତିନିଧି କ’ଣ ପ୍ରସ୍ତାବ ଦେଇଛନ୍ତି, ସେକଥା ଗୃହରେ ଜଣାନ୍ତୁ ବୋଲି ରଣେନ୍ଦ୍ର କହଛନ୍ତି।
