ନୂଆଦିଲ୍ଲୀ,୧୨।୪: ବର୍ତ୍ତମାନ ଦେଶ ମଧ୍ୟରେ କରୋନାର ଦ୍ୱିତୀୟ ଲହର ଆସିଛି। ସଂକ୍ରମଣ ମାମଲା ବଢିଚାଲିଛି। ପୁଣି ଥରେ ହୁଏତ ଲକଡାଉନ ହୋଇପାରେ ଅନେକେ ଆଶଙ୍କା କରୁଛନ୍ତି। ଦେଶ ମଧ୍ୟରେ ଯଦି ଆଶିଂକ ଲକଡାଉନ ହୁଏ ଏହା ଦ୍ୱାରା ଉପୟ ଶ୍ରମ ଏବଂ ସାମଗ୍ରୀ ପରିବହନକୁ ପ୍ରଭାବିତ କରିବ। ଫଳରେ ଏହାର ପ୍ରଭାବ ଶିଳ୍ପ କ୍ଷେତ୍ର ଉତ୍ପାଦନ ଉପରେ ପଡିବ ବୋଲି ସିଇଓଙ୍କ ନେଇ ହୋଇଥିବା ସର୍ଭେରେ ପ୍ରକାଶ ପାଇଛି। କନଫେଡେରେଶନ ଅଫ୍ ଇଣ୍ଡିଆନ ଇଣ୍ଡଷ୍ଟ୍ରିଜ (ସିଆଇଆଇ) ପକ୍ଷରୁ ହୋଇଥିବା ଏହି ସର୍ଭେରେ କୁହାଯାଇଛି ଯେ, କରୋନାର ଦ୍ୱିତୀୟ ଲହର ସଂକ୍ରମଣକୁ ରୋକିବା ଲାଗି କର୍ଫ୍ୟୁ ଏବଂ ମାଇକ୍ରୋ କଣ୍ଟେଣ୍ଟମେଣ୍ଟ କୌଶଳ ଉପରେ କାମ କରିବାର ଆବଶ୍ୟକତା ରହିଛି।
ସର୍ଭେରେ ଭାଗ ନେଇଥିବା ଅଧିକାଂଶ ସିଇଓ କହିଛନ୍ତି, ଯଦି ଆଶିଂକ ଲକଡାଉନ ମଧ୍ୟ ସାରା ଦେଶରେ ଲାଗୁ କରାଯାଏ ତେବେ ଏହାର ପ୍ରଭାବ ଶିଳ୍ପ ଉତ୍ପାଦନ ଉପରେ ପଡିବ। ସର୍ଭେରେ ଅର୍ଦ୍ଧାଧିକ ସିଇଓ ସେମାନଙ୍କ ଉତ୍ପାଦନ ପ୍ରଭାବିତ ହେବାର ଆଶଙ୍କା ରହିଛି। ୫୬% କହିଛନ୍ତି ଉତ୍ପାଦନ ପ୍ରାୟ ୫୦% କମିବ। କାରଣ ସାମଗ୍ରୀ ଯୋଗାଣ ଏହା ଦ୍ୱାରା ପ୍ରଭାବିତ ହେବ। ଶିଳ୍ପ ଏବଂ ବାଣିଜ୍ୟ କ୍ଷେତ୍ରର କାର୍ଯ୍ୟକଳାପ ଯେଭଳି ନ ଅଟକେ ସେ ନେଇ ସରକାର ଧ୍ୟାନରେ ରଖିବା ଆବଶ୍ୟକ ସିଆଇଆଇର ସଭାପତି ଟି.ଭି. ନରେନ୍ଦ୍ରନ କହିଛନ୍ତି। ୬୭% କହିଛନ୍ତି, ସଂକ୍ରମଣକୁ କମ୍ କରିବା ଲାଗି ସରକାରଙ୍କ ସହ ଟିକାକରଣ କାର୍ଯ୍ୟକ୍ରମରେ ମିଳିତ ହୋଇ କାମ କରିବେ।
ଉଲ୍ଲେଖଯୋଗ୍ୟ, ସରକାର କରୋନାକୁ ନିୟନ୍ତ୍ରଣ କରିବା ଲାଗି ସାରା ଦେଶକୁ ସମ୍ପୂର୍ଣ୍ଣ ଲକଡାଉନ କରି ରଖିଥିଲେ। ଏହା ଦ୍ୱାରା ବଜାରରେ କାର୍ଯ୍ୟକଳାପ ସମ୍ପୂର୍ଣ୍ଣ ଠପ୍ ହୋଇଯାଇଛି। ଚଳିତ ଆର୍ଥତ୍କ ବର୍ଷରେ ଜିଡିପି ନକରାତ୍ମକ ହେବା ସହ ଏବେ ଯାଏ ବଜାର ଟ୍ରାକକୁ ଫେରିପାରିନାହିଁ। ସଙ୍କଟରେ ରହିଥିବା ଅର୍ଥ ବ୍ୟବସ୍ଥାକୁ ସହାୟକତା କରିବା ଲାଗି ସରକାରଙ୍କୁ ବିଭିନ୍ନ ପଦକ୍ଷେପ ନେବାକୁ ପଡିଛି। ଏହାର ଫଳ ତ୍ୱରିତ ଭାବେ ମିଳି ପାରିନାହିଁ। ଲକଡାଉନ ଯୋଗୁ ୨୦୨୦-୨୧ ଆର୍ଥତ୍କ ବର୍ଷ ପ୍ରଥମ ତ୍ରୈମାସ ଜିଡିପି ୨୩.୯% ଖସିଥିଲା। ଅନେକଙ୍କ ଚାକିରି ଚାଲିଯାଇଥିବା ବେଳେ କଳକାରଖାନା କାମ ଟ୍ରାକକୁ ଫେରିବା ଲାଗି ସମୟ ଲାଗିଛି। ପୁଣି ଥରେ ଯଦି ଆଂଶିକ ଲକଡାଉନ ହୁଏ ତେବେ ଏହା ଦ୍ୱାରା ଶିଳ୍ପ କ୍ଷେତ୍ର ପ୍ରଭାବିତ ହେବା ନେଇ ଅଧିକାଂଶ ସିଇଓ ମତ ରଖିଛନ୍ତି।
