ସିଂହପୁର,୧୯।୯(ଡି.ଏନ୍.ଏ.): ଯାଜପୁର ଜିଲା ବିଞ୍ଝାରପୁର ବ୍ଲକ ଅନ୍ତର୍ଗତ ସିଂହପୁର ନୋଡାଲ ବିଦ୍ୟାଳୟର ଶ୍ରେଣୀଗୃହରେ ବର୍ଷା ପାଣି ପଶିବାରୁ ଅଭିଭାବକଙ୍କ ମଧ୍ୟରେ ଉତ୍ତେଜନା ପ୍ରକାଶ ପାଇଛି। ପ୍ରକାଶ ଯେ, ସିଂହପୁର ନୋଡାଲ ଉଚ୍ଚ ବିଦ୍ୟାଳୟରେ ଆବଶ୍ୟକ ସଂଖ୍ୟକ ଶ୍ରେଣୀଗୃହ ନାହିଁ। ଆଠଟି ଶ୍ରେଣୀକୁ ତିନୋଟି କୋଠାଗୃହ ଓ ଦୁଇଟି ଆଜବେଷ୍ଟସ ଗୃହରେ ପାଠପଢା ଚାଲିଛି। ସୋମବାର ସକାଳ ସମୟରେ ପ୍ରବଳ ବର୍ଷା ଯୋଗୁ ଆଜବେଷ୍ଟସ ଗୃହରେ ପାଣି ପଶିଯାଇଥିଲା। ଫଳରେ ପିଲାମାନେ ଭିଜିବା ସହ ବହିପତ୍ର ଭିଜିଯାଇଥିଲା। ପିଲାମାନଙ୍କୁ ଅନ୍ୟ ଶ୍ରେଣୀକୁ ସ୍ଥାନାନ୍ତର ସମୟରେ କିଛି ପିଲା ଘରକୁ ଚାଲିଯାଇଥିଲେ। ଯାହାଦ୍ୱାରା ଘରକୁ ଯାଇଥିବା ପିଲା ସମ୍ପୂର୍ଣ୍ଣ ଭିଜିଯାଇଥିଲେ। ଏପରି ଅବସ୍ଥା ଦେଖି ପିଲାଙ୍କ ଅଭିଭାବକମାନେ ଉତ୍ତେଜିତ ହୋଇ ବିଦ୍ୟାଳୟରେ ପାଟିତୁଣ୍ଡ କରିବା ସହ ପ୍ରଧାନ ଶିକ୍ଷକ ଗଣେଶ ଚନ୍ଦ୍ର ସାହୁଙ୍କୁ ଦୋଷାରୋପ କରିଥିଲେ। ପରିସ୍ଥିତ ଉତ୍ତେଜନା ହେବାରୁ ସିଂହପୁର ସରପଞ୍ଚ ଓ ସ୍ଥାନୀୟ ଲୋକେ ବିଦ୍ୟାଳୟରେ ପହଞ୍ଚି ଆପୋଷ ବୁଝାମଣା କରାଇଥିଲେ। ଏ ସମ୍ପର୍କରେ ଏକ ବୈଠକ କରାଯାଇ ନିଷ୍ପତ୍ତି ନିଆଯିବ ବୋଲି ସ୍ଥିର କରାଯାଇଛି। ତେବେ ବିଦ୍ୟାଳୟରେ ଆବଶ୍ୟକ ସଂଖ୍ୟକ ଶ୍ରେଣୀ ଗୃହ ନିର୍ମାଣ କରିବାକୁ ଅଭିଭାବକମାନେ ବିଭାଗୀୟ ଉଚ୍ଚ କର୍ତ୍ତୃପକ୍ଷ ଓ ଜିଲାପାଳଙ୍କ ନିକଟରେ ଦାବି କରିଛନ୍ତି।
