ନୂଆଦିଲ୍ଲୀ : ଆମେ ପନିର ତରକାରୀ ଖାଇଥାଉ। କିନ୍ତୁ କେହି କେବେ ପନିର ଫୁଲର ସ୍ବାଦ ଚାଖିଛନ୍ତି କି? କେହି ହୁଏତ ନିଶ୍ଚିତ ଭାବରେ ଭାବୁଥିବେ ଯେ ପନିର ଏକ ଦୁଗ୍ଧଜାତ ଦ୍ରବ୍ୟ, ସେଥିରୁ ଫୁଲ କେଉଁଠୁ ଆସିବ। ତେବେ ଦ୍ୱନ୍ଦ୍ୱରେ ପଡ଼ିବାର କୌଣସି ଆବଶ୍ୟକତା ନାହିଁ। ପନିର ଫୁଲ ଏକ ଗଛର ଫୁଲ। ଭାରତ, ପାକିସ୍ଥାନ, ଆଫଗାନିସ୍ତାନରେ ପନିର ଫୁଲ ମିଳିଥାଏ। ଏହା ବହୁ ଔଷଧୀୟ ଗୁଣରେ ଭରପୁର। ଡାଇବେଟିସ ସମସ୍ୟା ଥିବା ଲୋକେ ଏହାକୁ ନିୟମିତ ଖାଇଲେ ବେଶ୍ ସୁଫଳ ମିଳିଥାଏ। ଏହାର ସ୍ବାଦ ସାମାନ୍ୟ ମିଠା ।ଏହାର ଡାଇୟୁରେଟିକ ଗୁଣ ଅଛି। ଏହା ଅନିଦ୍ରା ଏବଂ ଆଜମା ଭଳି ସମସ୍ୟାର ମୁକାବିଲା କରିବାରେ ସାହାଯ୍ୟ କରିଥାଏ।
ଡାଇବେଟିସକୁ ନିୟନ୍ତ୍ରଣ କରିବାରେ ପନରି ଫୁଲ ସହାୟକ ହୋଇଥାଏ । ମୂଷା ଉପରେ କରାଯାଇଥିବା ଗବେଷଣାରେ ଏହା ନିଶ୍ଚିତ ହୋଇଛି। ଗବେଷଣାରୁ ଏହା ଜଣାପଡିଛି ଏଥିରେ ଆଣ୍ଟି-ଡାଇବେଟିସ ଗୁଣ ରହିଛି ଯାହା ରକ୍ତରେ ଶର୍କରା ସ୍ତର ହ୍ରାସ କରିବାରେ ଏକ ପ୍ରମୁଖ ଭୂମିକା ଗ୍ରହଣ କରିଥାଏ।
ଏହି ଫୁଲଗୁଡ଼ିକରେ ଥିବା ରାସାୟନିକ ପଦାର୍ଥ ଅଗ୍ନାଶୟର ବିଟା କୋଷଗୁଡ଼ିକୁ ସକ୍ରିୟ କରିବାରେ ଏବଂ ଇନସୁଲିନର କ୍ଷରଣରେ ସାହାୟତା କରିଥାଏ। ବିଟା କୋଷଗୁଡ଼ିକ ମଣିଷ ଶରୀରରେ ଇନସୁଲିନ ଉତ୍ପାଦନ କରନ୍ତି। ଯେତେବେଳେ ଜଣେ ବ୍ୟକ୍ତିଙ୍କର ଡାଇବେଟିସ ସମସ୍ୟା ହୁଏ, ବିଟା କୋଷଗୁଡ଼ିକ ନଷ୍ଟ ହୋଇଯାଇଥାଏ। ଫଳରେ ଇନସୁଲିନ ଉତ୍ପନ୍ନ ହୁଏ ନାହିଁ। ଏପରି ପରିସ୍ଥିତିରେ, ଅଗ୍ନାଶୟକୁ ଇନସୁଲିନ ସଠିକ ଭାବରେ କାର୍ଯ୍ୟକ୍ଷମ କରାଇବାରେ ପନିର ଫୁଲର ବ୍ୟବହାର ଏକ ଭଲ ଉପାୟ । ମେଦବହୁଳତା ଥିବା ବ୍ୟକ୍ତି ଶୀଘ୍ର ଓଜନ ହ୍ରାସ କରିବାକୁ ଚାହିଁଲେ ଖାଦ୍ୟରେ ପନିର ଫୁଲ ସାମିଲ କଲେ ଉପକାର ମିଳିଥାଏ।