ଇସଲାମାବାଦ୍,୧୭।୭: ପାକିସ୍ତାନୀ ଗଣମାଧ୍ୟମ ପୁଣିଥରେ ସାରା ବିଶ୍ୱରେ ମିଛ ପ୍ରଚାର କରିବା ମାମଲାରେ ଫସି ଯାଇଛି। ଅସୀମ ମୁନିରଙ୍କ ଆତିଥ୍ୟ ପରେ ଏବେ ସେପ୍ଟେମ୍ବରରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଇସଲାମାବାଦ ଗସ୍ତ କରିବେ ବୋଲି ପାକିସ୍ତାନ ଗଣମାଧ୍ୟମ ଦାବି କରିଥିଲା। ପାକିସ୍ତାନର ଏହି ଦାବି ମଧ୍ୟ ମିଥ୍ୟା ସାବ୍ୟସ୍ତ ହୋଇଛି। କାରଣ ଟ୍ରମ୍ପଙ୍କ କାର୍ଯ୍ୟସୂଚୀ ୧୭ରୁ ୧୯ ସେପ୍ଟେମ୍ବର ମଧ୍ୟରେ ବ୍ରିଟେନ ଗସ୍ତ ପାଇଁ ଅଟେ, ପାକିସ୍ତାନ ନୁହେଁ। ଏ ସମ୍ପର୍କରେ ହ୍ବାଇଟ ହାଉସ ପକ୍ଷରୁ କୌଣସି ସରକାରୀ ବିବୃତ୍ତି ଜାରି କରାଯାଇ ନାହିଁ ଏବଂ ପାକିସ୍ତାନୀ ଗଣମାଧ୍ୟମ ଏହି ମିଥ୍ୟା ଖବର ବିଶ୍ୱରେ ପ୍ରସାରିତ କରିଛି।
ପାକିସ୍ତାନର ସାମା ଟିଭି ଅନୁଯାୟୀ, ଡୋନାଲ୍ଡ ଟ୍ରମ୍ପଙ୍କ ଇସଲାମାବାଦ ଗସ୍ତ ୧୮ ସେପ୍ଟେମ୍ବରରେ ହୋଇପାରେ। ପୂର୍ବରୁ ୨୦୦୬ ମସିହାରେ ରାଷ୍ଟ୍ରପତି ଜର୍ଜ ଡବ୍ଲୁ ବୁଶ ପାକିସ୍ତାନ ଗସ୍ତ କରିଥିଲେ। କିନ୍ତୁ, ସତ୍ୟ ହେଉଛି ଯେ ଟ୍ରମ୍ପ ଏବଂ ତାଙ୍କ ପତ୍ନୀ ମେଲାନିଆ ୟୁନାଇଟେଡ କିଙ୍ଗଡମ (ୟୁକେ) ଯିବେ, ଯେଉଁଠାରେ ରାଜା ଚାଲର୍ସ ତୃତୀୟ ଏବଂ ରାଣୀ କାମିଲା ସେମାନଙ୍କୁ ୱିଣ୍ଡସର କ୍ୟାସଲରେ ସ୍ବାଗତ କରିବେ। ବ୍ରିଟେନର ରାଣୀ କାମିଲା ୱିଣ୍ଡସର ସୋମବାର (୧୪ ଜୁଲାଇ ୨୦୨୫) ଟ୍ରମ୍ପଙ୍କ ଗସ୍ତକୁ ନିଶ୍ଚିତ କରିଛନ୍ତି।
ଆମେରିକା ରାଷ୍ଟ୍ରପତି ଟ୍ରମ୍ପ ପୂର୍ବରୁ ତାଙ୍କ ପ୍ରଥମ କାର୍ଯ୍ୟକାଳରେ ୨୦୧୯ରେ ବ୍ରିଟେନ ଗସ୍ତ କରିଥିଲେ, ଯେତେବେଳେ ତାଙ୍କୁ ବ୍ରିଟେନର ସ୍ବର୍ଗତ ରାଣୀ ଏଲିଜାବେଥ ସ୍ବାଗତ କରିଥିଲେ। ଏହି ଗସ୍ତ ସମ୍ପର୍କରେ ଟ୍ରମ୍ପ କହିଥିଲେ, ରାଜପରିବାରରୁ ନିମନ୍ତ୍ରଣ ପାଇବା ତାଙ୍କ ପାଇଁ ଏକ ବଡ଼ ସମ୍ମାନ।
ଗତ ୧୯ ବର୍ଷ ଧରି କୌଣସି ଆମେରିକୀୟ ରାଷ୍ଟ୍ରପତି ଆତଙ୍କବାଦୀଙ୍କୁ ପୋଷଣ କରୁଥିବା ପାକିସ୍ତାନ ଗସ୍ତ କରିନାହାଁନ୍ତି। ଗତ ମାସରେ ଟ୍ରମ୍ପ ହ୍ବାଇଟ ହାଉସରେ ପାକିସ୍ତାନ ସେନା ମୁଖ୍ୟ ଅସୀମ ମୁନିରଙ୍କୁ ଆତିଥ୍ୟ ଦେଇଥିଲେ, ଯାହା ପରେ ପାକିସ୍ତାନ ଆନୁଷ୍ଠାନିକ ଭାବରେ ୨୦୨୬ ନୋବେଲ ଶାନ୍ତି ପୁରସ୍କାର ପାଇଁ ଟ୍ରମ୍ପଙ୍କ ନାମ ସୁପାରିଶ କରିଥିଲା।
ଏହା ପ୍ରଥମ ଥର ନୁହେଁ ଯେ, ପାକିସ୍ତାନୀ ଗଣମାଧ୍ୟମ ଭୁଲ ସୂଚନା ପ୍ରସାରଣ କରୁଥିବା ଧରାପଡ଼ିଛି। ଅପରେଶନ ସିନ୍ଦୁର ପରେ ଭାରତ ଏବଂ ପାକିସ୍ତାନ ମଧ୍ୟରେ ସାମରିକ ସଂଘର୍ଷ ସମୟରେ ମଧ୍ୟ, ପାକ ଗଣମାଧ୍ୟମ ଏବଂ ଏହାର ନେତାମାନେ ଅନେକ ଅବାନ୍ତର ଦାବି କରିଥିଲେ। ତଥାପି, ପରେ ବିଶ୍ୱ ଦେଖିଲା ଯେ ଭାରତର ଅସ୍ତ୍ରଶସ୍ତ୍ର ପାକିସ୍ତାନକୁ ସାହାଯ୍ୟ କରୁଥିବା ତୁର୍କୀ ଏବଂ ଚାଇନାର ଅସ୍ତ୍ରଶସ୍ତ୍ରକୁ କିପରି ନଷ୍ଟ କରିଦେଇଛି।
